NKULUNKULU wanika Jesu emandla ekwenta tintfo bantfu labebangeke bakwati kutenta. Jesu wenta timangaliso letinyenti, etikhatsini letinyenti kwakusembikwebantfu lebebabukele. Leto timangaliso tabonisa kutsi Jesu unemandla kunetitsa, kanye netitsiyo bantfu labangakapheleli labangeke bakhone kuticedza. Ase uhlole nati tibonelo letimbalwa.

Jesu wapha bantfu kudla nekwekunatsa. Simangaliso sekucala Jesu lasenta, kugucula emanti abe liwayini lelimnandzi. Etikhatsini letimbili, Jesu wesutsisa ticumbi tetinkhulungwane lebetilambile ngetinkhwa kanye netinhlanti letimbalwa. Kuto totimbili letikhatsi, bekuba nekudla lokwenele kwawo wonkhe umuntfu.

Jesu welapha labagulako. Jesu welapha bantfu ‘kuto tonkhe tinhlobo tetifo nasekuguleni kwabo.’ (Matewu 4:23) Waphilisa bantfu lebebatimphumphutse, tihhulu, lebebanebulephelu, sifo sekuwa, nalabebakhubatekile. Kwakute sifo labengeke aselaphe.

Jesu wathulisa sivunguvungu. Ngesikhatsi Jesu nebafundzi bakhe basesikebheni bewela Lwandle lwaseGalile, kwaba nesivunguvungu lesikhulu. Bafundzi bakhe besaba kakhulu, ngako-ke wabuka lesivunguvungu wase utsi kuso: “Thula, utsi nya!” Savele sathula khona lapho. (Makho 4:37-39) Ngalesinye sikhatsi, wahamba etikwemanti lapho kunesivunguvungu lesesabisako.—Matewu 14:24-33.

Jesu wacosha imimoya lemibi. Imimoya lemibi inemandla kakhulu kunebantfu. Bantfu labanyenti bayebehluleka kutikhulula kuletitsa taNkulunkulu letinelulaka. Kanyenti, Jesu watjela lemimoya kutsi iphume kubantfu, futsi ayizange iphindze ibahluphe labo bantfu. Abengayesabi lemimoya, kunaloko ngiyo lebeyimesaba, ngoba yati kutsi uneligunya.

Jesu wavusa labafile. Kufa kubitwa kufanele ngekutsi “sitsa sekugcina,” futsi bantfu labangeke bakwati kusincoba. (1 Khorinte 15:26) Kepha Jesu yena wakhona kubavusa labafile, njengendvodzana yemfelokati, kanye nentfombatana leyatsi nayifa batali bayo baba selusizini. Esentakalweni lesiphawulekako, wavusa Lazaro umngani wakhe lebekamtsandza, embikweticumbi tebantfu lebebalila nanobe-nje besekuphele emalanga lamane afile! Ngisho netitsa takhe tavuma kutsi wasenta lesimangaliso.—Johane 11:38-48; 12:9-11.

Jesu watentelani tonkhe letimangaliso ngoba phela bonkhe labantfu labasita bagcina bafile? Kepha timangaliso takhe tatinebuhle lobuhlala njalo, futsi tafakazela kutsi tonkhe letiphrofetho letijabulisako letatimayelana nekubusa kweMbuso waMesiya, tatiliciniso. Kute sizatfu sekungabata kutsi leNkhosi lebekwe nguNkulunkulu, itawucedza indlala, kugula, tivunguvungu, imimoya lemibi, ngisho nekufa imbala. Jesu sewuvele ubonisile kutsi Nkulunkulu wamnika emandla ekukwenta loko.

—Lendzaba itsetfwe encwadzini yaMatewu, Makho, Lukha, kanye naJohane.