XIKWEMBU xi nyike Yesu matimba yo endla swilo leswi vanhu va nga kotiki ku swi endla. Yesu u endle masingita yo tala, naswona yo tala ya wona u ma endle emahlweni ka mintshungu. Masingita wolawo a ma kombisa leswaku u ni matimba ku tlula valala vakwe nileswaku u ni matimba ku tlula swihinga leswi vanhu lava nga hetisekangiki va nga kotiki ku swi herisa. Xiya swikombiso swin’wana.

U phamele vanhu swakudya a va nyika ni swakunwa. Singita ro sungula ra Yesu a ku ri ku hundzula mati ma va vhinyo. Eka swiendlakalo swimbirhi, u tirhise tinhlampfi ni swinkwa leswi nga tatiki xandla leswaku a phamele magidi ya vanhu. Eka swiendlakalo sweswo hinkwaswo, vanhu va dye swi tlhela swi sala.

U horise vanhu lava vabyaka. Yesu u hanyise vanhu lava nga ni “swifo swa mixaka hinkwayo ni vulema bya mixaka hinkwayo.” (Matewu 4:23) U hanyise vanhu lava nga voniki, lava nga twiki, lava nga ni nhlokonho, lava nga ni switshetshela ni lava lamaleke. A a tshungula mavabyi ya mixaka hinkwayo.

U lawule maxelo yo biha. Loko Yesu ni vadyondzisiwa vakwe va tluta eLwandle ra Galeliya, hi xitshuketa ku sungule xidzedze. Vadyondzisiwa vakwe va khomiwe hi rhumbyana. Yesu a a nga chuhanga kambe u byele xidzedze xexo a ku: “Miyela! U ku whii!” Hiloko xidzedze xi namba xi miyela. (Marka 4:37-39) Siku rin’wana u fambe ehenhla ka mati hi nkarhi lowu a ku ri ni xidzedze lexi chavisaka.—Matewu 14:24-33.

U hlule mimoya yo homboloka. Mimoya yo homboloka yi ni matimba ku tlula vanhu. Vanhu vo tala va tsandzekile ku hlula valala lava va Xikwembu lava nga ni tihanyi. Minkarhi yo tala loko Yesu a lerisa mimoya leswaku yi huma eka vanhu, mimoya yoleyo a yi namba yi tsandzeka ku lawula vanhu volavo. A a nga yi chavi mimoya yoleyo naswona hambi ku ri yona a yi swi tiva leswaku u ni matimba ku yi tlula naswona a yi n’wi chava.

U hlule ni rifu. Tanihi leswi rifu ri vuriwaka “nala wo hetelela,” i nala loyi vanhu va nga kotiki ku n’wi hlula. (1 Vakorinto 15:26) Hambiswiritano, Yesu u pfuxe vafi ku katsa ni n’wana wa jaha wa noni ni xinhwanyatana lexi vatswari va xona a va ri ni gome hileswi xi loveke. Eka xiendlakalo xin’wana xa nkoka, Yesu u pfuxe Lazaro munghana wa yena loyi a a n’wi rhandza, loyi a a ri ni masiku ya mune a file naswona sweswo u swi endle emahlweni ka ntshungu lowu a wu ri karhi wu rila! Hambi ku ri valala va Yesu lavakulu va pfumerile leswaku u ri endlile singita rero.—Yohane 11:38-48; 12:9-11.

Ha yini Yesu a endle masingita lawa hinkwawo? Phela, vanhu hinkwavo lava a nga va pfuxa va tlhele va fa. Masingita lawa a ma endleke ma kombise leswaku vuprofeta hinkwabyo lebyi tsakisaka lebyi vulavulaka hi mfumo wa Hosi leyi nga Mesiya byi sekeriwe entiyisweni. Kutani a swi kanakanisi nikatsongo leswaku Hosi leyi hlawuriweke hi Xikwembu yi ta herisa ndlala, vuvabyi, yi lawula maxelo yo biha, yi hlula mimoya yo homboloka ni rifu. Ana se yi swi kombisile leswaku Xikwembu xi yi nyike matimba yo endla swilo sweswo hinkwaswo.

—Xi sekeriwe eka Matewu, Marka, Luka na Yohane.