GINTAGAN han Dios hi Jesus hin gahum ha pagbuhat hin diri mahihimo han tawo. Nagbuhat hi Jesus hin damu nga milagro​—agsob ha atubangan han damu nga tawo. Iginpapakita hito nga mga milagro nga may gahum hiya ha pagbungkag han mga kaaway ngan pagwara han kakurian—mga butang nga diri nahihimo han diri hingpit nga tawo. Tagda ini nga mga ehemplo.

Gutom. An siyahan nga milagro ni Jesus amo an paghimo hin tubig nga maopay nga alaksiw. Ha duha nga sitwasyon, yinukot nga nagugutom an iya ginpakaon pinaagi hin pipira la nga tinapay ngan isda. Hiton duha nga kahimtang, nagsobra pa an pagkaon.

Sakit. Gintambal ni Jesus an mga tawo nga may iba-iba nga klase han “sakit, ngan ngatanan nga karat-an.” (Mateo 4:23) Iya gintambal an mga buta, bungol, piang, sanlahon, buntugon, paralisado, ngan baldado. Waray sakit nga waray niya matambal.

Peligroso nga klima. Han hi Jesus ngan an iya mga disipulo nagbibiyahe ha Dagat han Galilea, tigda nga nag-alipuros hin makusog. Nahadlok hinduro an mga disipulo. Kondi, ginsaway la ni Jesus an hangin ngan nagsiring: “Himurayaw; maglinaw ka!” Ngan kinalma an panahon. (Markos 4:37-39) Ha usa pa nga kahimtang, naglakat hiya ha bawbaw han tubig bisan kon may makusog nga bagyo.​—Mateo 14:24-33.

Magraot nga espiritu. An magraot nga espiritu mas gamhanan gud kay ha tawo. Pinamatud-an han damu nga tawo nga waray nira gahum ha pag-ato hinin magdarahog nga kaaway han Dios. Kondi ha damu nga higayon, ginsugo ni Jesus ito nga mga espiritu nga bumaya ha mga tawo nga ira ginsudlan, salit diri na nira makukontrol an ira mga biktima. Waray hiya mahadlok ha ira. Ha kabaliktaran, hira an nahadlok ha iya tungod kay maaram hira han iya gahum.

Kamatayon. An kamatayon kaaway nga waray tawo nga makakapirde, salit husto gud tawagon ito nga “an kataposan nga kaaway.” (1 Korinto 15:26) Bisan pa hito, nagbanhaw hi Jesus hin mga patay, upod hito an batan-on nga lalaki nga anak hin balo ngan batan-on nga babaye nga anak hin nasusubo nga mga kag-anak. Ha pinakadiri-katoohan nga sitwasyon, ginbanhaw niya an iya hinigugma nga sangkay nga hi Lasaro ha atubangan han damu nga nagmiminatay, bisan kon haros upat ka adlaw na ito nga patay. Salit, ginkilala bisan han mga nakontra gud kan Jesus nga nagbuhat hiya hini nga milagro.​—Juan 11:38-48; 12:9-11.

Kay ano nga ginbuhat ni Jesus ini ngatanan nga milagro, tutal namatay man gihapon an ngatanan nga iya ginbuligan? Aw, ini nga mga milagro nagkaada nagpapadayon nga kapulsanan. Ginpamatud-an hito nga an tanan nga makalilipay nga tagna mahitungod ha pagmando han Mesias nga Hadi may-ada gud basihan. Diri gud sadang ruhaduhaan nga an pinili han Dios nga Hadi makakagwara han gutom, sakit, peligroso nga klima, magraot nga espiritu, o kamatayon. Ginpamatud-an na niya nga iginhatag na han Dios ha iya an gahum ha pagbuhat hito ngatanan.

​—Iginbasar ha mga libro han Mateo, Markos, Lukas, ngan Juan.