MLUNGU ŵampele Yesu macili gakutenda yindu yakuti pangali mundu jwalijose jwakayikombwele kutenda. Yesu ŵatesile yakusimonjesya yejinji, soni ndaŵi syejinji ŵatendaga yeleyi pameso pa ŵandu ŵajinji. Yakusimonjesyayo yalosisye kuti Yesu akwete macili pa acimmagongo ni pa yakusawusya yaŵele mkulepela ŵandu ŵaulemwa kuyimasya. Kwende tulole yine mwa yakusimonjesyayi.

Yesu ŵapele ŵandu yakulya ni yakumwa. Cakusimonjesya candanda ciŵatesile Yesu caliji kugatendekasya mesi kuti gaŵe finyo jwambone. Mu yakutendekwa yine yiŵili, jwalakwe ŵakamulicisye masengo mikate ni somba syamnono, ni kwalisya ŵandu ŵajinji ŵajakwete sala. Mu yakutendekwa yosopeyi, yapali yakulya yejinji yakwakwanila ŵandu wosope, yinesoni yasigele.

Ŵaposisye ŵakulwala. Yesu “ŵaliji mkuposya yilwele yosope ya ŵandu, yakupweteka ya m’yiilu mwawo.” (Matayo 4:23) Jwalakwe ŵaposisyesoni ŵangalola, ŵangapikana, ŵamatana, ŵamanjilinjili, soni ŵalemale. Nganiwupagwa ulwele wanganawukombola Yesu kuwuposya.

Ŵajilamwile mbungo jakonanga. Yesu ni ŵakulijiganya ŵakwe paŵajombokaga Nyasa ja Galilaya, patendece cimbungo camacili. Ŵakulijiganyawo wakamwile woga. Nambo Yesu ŵagambile kujilola mbungojo ni kuŵeceta kuti: “Tulalani! Mtende bata.” Pandaŵi jijojo patendece bata jajikulungwa. (Maliko 4:37-39) Pandaŵi jine, Yesu ŵajesile panyasa pali mkutendekwa cimbungo cakogoya.—Matayo 14:24-33.

Ŵajilamwile misimu jakusakala. Misimu jakusakala jili jamacili mnope kwapunda ŵandu. Ŵandu ŵajinji alepele kulilekanganya ku acimmagongo ŵakogoya ŵa Mlunguŵa. Nambope mu yakutendekwa yejinji, Yesu paŵajilamulaga misimuji kuti jikopoce mwa ŵandu, ŵajitendekasyaga kuti jikasawusyagasoni ŵanduwo. Jwalakwe nganajijogopaga misimujo. Misimu jakusakalaji jamanyililaga kuti Yesu ŵakwete ulamusi, ni jamjogopaga.

Yesu ŵakwete ulamusi pa ciwa. Ciwa cakusacikolanga kuŵa “mmagongo jwakumalicisya,” cili cangakomboleka mundu kucigomeka. (1 Akolinto 15:26) Nambotu Yesu ŵajimwisye ŵawe. Ŵamjimwisye mcanda juŵaliji mwanace jumope jwa jwamkongwe jwine jwamasije, soni ŵamjimwisye mwali jwine ni kumpeleka kwa acinangolo ŵakwe. Mu cakutendekwa cine cakusimonjesya mnope, Yesu ŵamjimwisye mjakwe jwapamtima Lasalo pameso pa likuga lya ŵandu ŵakulila malilo, atamose kuti galiji gali gapite masiku mcece ciwile munduju! Atamose acimmagongo ŵa Yesu ŵanganamsoselaga yambone atapanandi ŵajiticisye kuti jwalakwe ŵatesile cakusimonjesya celeci.—Yohane 11:38-48; 12:9-11.

Ana ligongo cici Yesu ŵatesile yakusimonjesya yosopeyi? Soni ana wosope ŵaŵajimwisye ku ciwa ngati wawilesoni? Elo yakuwona, nambo yakusimonjesya ya Yesuyi yakamwile masengo gambone gangamala. Yalosisye kuti yakulocesya yosope yambone pakwamba ya ulamusi wa Mwenye Masiya, yaliji yakomboleka. Pangalisoni ligongo lyakuŵela mkayicila kuti Mwenye jwamsagwile Mlunguju ali jwakomboleka kumasya sala, ulwele, mbungo jakonanga, misimu jakusakala, soni atamose ciwa cisyesyeneco. Yesu alosisye kala kuti Mlungu ampele macili pa yosopeyi.

—Nganiji jityocele m’mabuku ga Matayo, Maliko, Luka, ni Yohane.