DIOSEʼ tu tsʼáaj páajtalil tiʼ u Hijo utiaʼal u beetik yaʼabach milagroʼob, yaʼab tiʼ leloʼobaʼ tu beetaj tu táan yaʼab máakoʼob. Le milagroʼob tu beetoʼ tu yeʼesoʼobeʼ Jesuseʼ jeʼel u páajtal u luʼsik le baʼaxoʼob beetik u muʼyaj máakoʼ. Koʼox ilik jujumpʼéeliʼ.

Wiʼijil. Le yáax milagro tu beetaj Jesús le ka tu sutaj vinoi le jaʼoʼ, tu yeʼeseʼ letiʼeʼ jeʼel u páajtal u tsʼáaik baʼal ukʼbil yéetel jaantbileʼ. Tsʼoʼoleʼ tu beetaj u yaʼabtal upʼíit waaj yéetel upʼíit kay utiaʼal u tséentik u milesi máakoʼob, lelaʼ kaʼatéen tu beetaj, yéetel ka tsʼoʼok u janal tuláakaleʼ yaan tak pʼáatiʼ.

Kʼojaʼaniloʼob. Cristoeʼ tu tsʼakaj «tuláakal kʼojaʼaniloʼob yéetel kʼiʼinamil» ku muʼyajtik le máakoʼoboʼ (Mateo 4:23). Tu tsʼakaj le chʼóopoʼoboʼ, le kóokoʼoboʼ, le móochoʼoboʼ, le yaan lepra tiʼoboʼ yéetel le ku tsʼáaik ataque tiʼoboʼ. Mix upʼéel kʼojaʼanil pʼáat maʼ u tsʼakik.

Kʼaʼamkach iikʼoʼob. Upʼéel áakʼab tiaʼan Jesús yéetel u disipuloʼob tu kʼáaʼnáabil Galileaeʼ, káaj upʼéel kʼaʼamkach iikʼ. Le disipuloʼoboʼ jach sajakchajoʼob, baʼaleʼ Jesuseʼ chéen tu líiʼsaj u yich teʼ kaʼanoʼ ka tu yaʼalaj: «¡Chʼen a juum! ¡Jetsʼlen!». Tu séebaʼanileʼ jéetsʼ le iikʼoʼ (Marcos 4:37-39). Uláakʼ utéeneʼ xíimbalnaj yóokʼol le jaʼ kex táan upʼéel kʼaʼamkach iikʼoʼ (Mateo 14:24-33).

Kʼasaʼan angeloʼob. Le kʼasaʼan angeloʼob wa demonioʼoboʼ, maas yaan u páajtaliloʼob tiʼ wíinik. Letiʼobeʼ tsʼoʼok u beetkoʼob kʼaas tiʼ yaʼabach máakoʼob, yaʼab tiʼ le máakoʼobaʼ maʼ béeyak u tokikubaʼob tiʼ letiʼobiʼ. Baʼaleʼ Jesuseʼ maʼ sajakchaj tiʼobiʼ. Baʼaxeʼ letiʼob ku sajaktaloʼob kaʼach ken u yiloʼob Jesús yéetel tu yuʼuboʼob u tʼaan le ka aʼalaʼabtiʼob ka u pʼatoʼob le máaxoʼob ku beetkoʼob u muʼyajoʼoboʼ.

Kíimil. Le kíimiloʼ bey utúul nojoch enemigo mix máak jeʼel u páajtal u púutsʼul tiʼeʼ. Baʼaleʼ mix le kíimil páajchaj yéetel Jesusoʼ; letiʼeʼ tu kaʼa kuxkíintaj u hijo utúul koʼolel kimen u yíicham yéetel tu kaʼa kuxkíintaj utúul chan chʼúupal. Baʼaleʼ upʼéel tiʼ le maas nojoch milagroʼob tu beetoʼ, letiʼe ka tu kaʼa kuxkíintaj Lázaro tu táan yaʼabach máakoʼob kex tsʼoʼok kaʼach kampʼéel kʼiinoʼob kíimik. Tak le máaxoʼob pʼekmailoʼ maʼ páajchaj u yaʼalikoʼob wa maʼ jaaj le baʼax tu beetaj Jesusoʼ (Juan 11:38-48; 12:9-11).

Baʼaleʼ ka máan kʼiineʼ, le máaxoʼob áantaʼaboʼob tumen Jesusoʼ kaʼa kʼojaʼanchajoʼob yéetel kíimoʼob. Le oʼolaleʼ, ¿baʼax u beelal le milagroʼob tu beetaj Jesusoʼ? Tu yeʼesoʼobeʼ tuláakal le baʼaxoʼob aʼalaʼan ken u beet le Reinooʼ jach yaan u béeytaloʼob. Le Rey yéeyaʼan tumen Diosoʼ yaan u luʼsik wiʼijil, kʼojaʼaniloʼob, chak ikʼaloʼob yéetel uláakʼ loobiloʼob, yéetel yaan xan u xuʼulsik le kʼasaʼan angeloʼoboʼ bey xan le kíimiloʼ. Jéeobaeʼ u tsʼaamaj u páajtalil tiʼ u Hijo utiaʼal u beetik.

(Chʼaʼabaʼan tiʼ Mateo, Marcos, Lucas yéetel Juan.)