DIOS bidii poder Xiiñiʼ para guni stale cosa ni qué zanda guni binni guidxilayú. Pur poder ni gucuaabe ca bíʼnibe stale milagru, ne bíʼnibe stale de laacani nezalú stale binni. Ca milagru ni biʼniʼ Jesús, bisihuínnicani nápabe poder para cueebe guiráʼ ca guendanagana o yuubaʼ ni qué ganda cuee binni guidxilayú. Guidúʼyanu chupa chonna de laacani.

Guendarindaana. Primé milagru ni biʼniʼ Jesús nga ra bíʼnibe nisa que vinu, ne ni bíʼnibe ca bisihuínnini zanda guyaanabe binni ne gudiibe ni guecaʼ. Ne chupa biaje biquiiñebe chupa chonna si pan ne benda para biyaanabe mil binni. Lu guiropaʼ biaje riʼ biaanaruʼ guendaró.

Guendahuará. Cristu «bisianda [...] irá enda huará ne irá yuuba sti ca binni que» (Mateo 4:23). Bisiándabe cani nacheepaʼ lú, cani qué runadiaga, cani qué rizá, cani napa lepra ne cani rudii ataque laa. Qué ñuu diʼ nin ti guendahuará ni qué ñanda nusiándabe.

Nisaguié ne bi yooxhoʼ. Ti gueelaʼ, laga zeʼ Jesús ne ca discípulo que lu nisadóʼ stiʼ Galilea, málasi biaba ti nisaguié ne bindubi ti bi yooxhoʼ. Ca discípulo que nabé bidxíbicaʼ, peru Jesús qué nidxibi, sínuque gundisalú guibáʼ ne guníʼ: «Guta dxí». Ne oraqueca gulezadxí nisaguié que ne bi yooxhoʼ que (Marcos 4:37-39). Ne sti biaje gunda guzabe lu nisa, neca cayaba ti nisaguié roʼ ne cundubi ti bi yooxhoʼ (Mateo 14:24-33).

Ca espíritu malu. Ca espíritu riʼ runibiáʼ binni laacaʼ casi demonio, ne jma nadípacaʼ que laanu. Stale binni huachiiñaʼ ca demonio ca laacaʼ, ne stale de laacaʼ qué ganda guidxélacaʼ ximodo gusaana de guchiiñacabe laacaʼ. Peru Jesús qué nidxibi ca demonio que, sínuque laacaʼ nga bidxíbicaʼ ora bíʼyacaʼ laabe, ne ora gúdxibe laacaʼ gusaanacaʼ ca binni ni cayuninacaʼ la? oraqueca bizuubacaʼ stiidxabe.

Guendaguti. Guendaguti ca zeeda gaca casi xhenemígunu ne guirutiʼ zanda guilá de laani. Dede nin guendaguti ca qué nilá lu na Cristu, ne bihuínnini ora bisibánibe ti hombrehuiiniʼ xiiñiʼ ti viuda ne ora bisibánibe ti dxaapahuiiniʼ. Peru milagru ni jma runibiáʼ binni nga dxi gundísabe xhamígube Lázaro ni maʼ ziné tapa gubidxa de guti ne bíʼnibe ni nezalú stale binni. Dede ca binni ni jma nanalaʼdxiʼ laabe bidiicaʼ cuenta nápabe poder (Juan 11:38-48; 12:9-11).

Peru, xi para biʼniʼ Jesús ca milagru que, pa guiráʼ ca binni ni gucanebe que bibiguetaʼ guca huaracaʼ ne gúticaʼ yaʼ. Bisihuínnicani dxandíʼ zaca guiráʼ cani maʼ guníʼ ca profeta que chiguni Jesús lu Reinu stiʼ Dios. Nga runi, runi crenu zabee Rey ni maʼ gulí Dios ca guendarindaana, guendahuará, nisaguié ne bi yooxhoʼ, zunitilube ca demonio ca ne zabeebe dede ne guendaguti. Nanna dxíchinu maʼ bidii Jiobá poder Xiiñiʼ para guni cani.

(Zeedani lu libru stiʼ Mateo, Marcos, Lucas ne Juan.)