YÉSUS a beyé’é bé benyine be nga to Nkôle be Olivier yôp, be lô ane étison Jérusalem a temple wé bi bame a nalé; ane be nga tyi’i Yésus nkobô. Be nga bo de amu Yésus a mbe a kobô’ô na temple ya Jérusalem a ye tyameban. A nga taté fe kobô de mvus a lat “asu’ulane ya si nyô” nge asu’ulane ya nta’ane mame wu. (Matthieu 13:40, 49) Ajô te beyé’é be nga sili nye na: “Kate’e bia, mame mete m’ aye boban éyoñ évé? Za ndem j’ aye bo nzuan wo ye zu, a asu’ulane ya si nyô?”​—Matthieu 24:3.

Éyoñe Yésus a nga ve éyalane ya nsili ôte, a nga kate fe mame m’ aye boban ôsusua na Jérusalem a tyameban. Éyalane Yésus a nga ve é ne na mam abui me ne mba’atan été. Mame mete m’ afombô aval ényiñe bôte ya si se b’ aye nyiñ. Mame mete mese mme b’aloene na ndem. Ndem éte j’aye liti bôte be to si na Yésus a nyoñeya éto Njôô yôp été a na éjôé é tatéya. Nalé a tinane na Éjôé Messie Yéhova Zambe a nga ka’ale Yésus dene mimbu ayap, a veya nye je. Ndem éte j’ aliti fe na, Éjôé é nga tebe mfa’a ya mane va mbia be bôte bese, a so évôvoé si. Mame mese Yésus a nga jô me ne ndeme ya na nnôme nta’ane mame wu​—minyebe, bikôane bi pôlitik, a mefulu bia yene den—​a atata’a ya mfefe si é ntô bebé.

Yésus a nga jô na, mame ma mme m’aye kui éyoñ a ye nyoñe éto Njô yôp été. Mame mete m’aye bobane si ése: bita, zaé, beta mimfô’ôsane mi si, beta b’akon. Ébiasé metiñe j’aye bete bet. Beyé’é be Yésus b’aye kate mbamba foé ya Éjôé Zambe si se. Mame mete mese m’aye nenenen akekui éyoñ “abé abui” d’aye bo. Aval abé te é ngenane te bobane si ôsusua.​—Matthieu 24:21.

Aval avé beyé’é be Yésus b’aye yeme na beta abé é nto bebé? Yésus a nga jô na: “Yéka’an nkana élé ya figuier.” (Matthieu 24:32) Eyoñe mekaé ya figuier m’ akui mintyaé yôp, m’ aliti na ésep é nto bebé. Nalé fe éyoñe mame mese Yésus a nga kuli m’ aye boban, mone nté éyoñ, nalé aye bo ndeme na asu’ulan é nto bebé. Teke môte mfe a yeme môse ya mbia abé ate, a awolo dé, fo’o ve Ésa étam. Amu jamete, Yésus a nga kate beyé’é bé na: “Fomba’an, mi momba’an a ye’elane Zambe: amu mi ne te yem éyoñe te.”​—Marc 13:33.

​—Nkañete ôte wo so kalate Matthieu kabetôlô 24 akekui 25; Marc kabetôlô 13; Luc kabetôlô 21.