SEKSION 19
Angiter si Jesus na Malaklaknab a Propesiya
Insalaysay nen Jesus iray nagawa a tanda na igapo to lan man-ari tan say panaon na anggaan
DIAD Palandey na saray Olibo, a sankabantag so inkarakep na Jerusalem tan say templo ditan, si Jesus so tinepetan na apatira ed saray apostol nipaakar ed pigaran nibaga to la’d akadkauna. Kapkapangibaga nen Jesus a say templo ed Jerusalem et naderal. Tan diad mas akadkaunan inkagawa, abitla to la ed sikara so nipaakar ed “anggaan na [sistema na] mundo.” (Mateo 13:40, 49) Intepet natan na saray apostol: “Anto kasi so tanda ed isabim tan say anggaan na [sistema na] mundo?”
Diad ebat to, imbaga nen Jesus no antoray nagawa antis na kaderal na Jerusalem. Balet ta wala ni tutukoyen to. Say propesiya to et walaan na mas baleg nin kasumpalan a lanoren toy interon mundo. Impropesiya nen Jesus iray nagawa tan kipapasen na mundo a manugyop na tanda. Lapud satan a tanda, napatnagan na totoo a say presensia nen Jesus bilang Ari ed tawen et ginmapo la. Diad arum a panangibaga, say tanda so pakapatnagan a ginawa la nen Jehova a Dios si Jesus ya Ari ed satan ya abayag lan insipan a Mesianikon Panarian. Say tanda et pakaamtaan a magano lan ekalen na Panarian so kaugsan tan mangiter na tuan kareenan ed katooan. Saray impasakbay nen Jesus so pakatandaan sirin na unor la ran agew na daan a sistema na mundo, salanti, say relihyon, politika, tan saray sistema na sosyedad, tan magano lan salatan na balo.
Impasakbay nen Jesus a legan ton Ari ed tawen et walaray guerra ed nanduruman nasyon, kakulangan na naakan, maksil iran yegyeg, tan ikayat na saray sakit. Onloor met so kaugsan. Ipulong na tuan babangatan nen Jesus so maong a balita na Panarian na Dios ed interon dalin. Amin na sarayan bengatla so mansumpal ed “baleg ya irap” ya agnin balot agawa nensaman.
Panoy pakaamta na saray patumbok nen Jesus ya asingger la itan a kairapan? ‘Makaaral kayo ed kiew a higos,’ so inkuan nen Jesus. (Mateo 24:32) Napatnagan ed saray bulong na higos a magano lay tiagew. Ontan met, no nagagawa la irayan amin ya impasakbay nen Jesus ed sakey a panat na panaon, tanda itan ya asingger lay anggaan. Anggapoy makaamta ed eksakton agew tan oras na igapo na baleg ya irap noag say Ama labat. Kanian, binilin nen Jesus iray babangatan to: “Manbantay tan mikasi kayo, ta agyo amta no kapigan [so] panaon.”
^ par. 14 Parad kaaruman ya impormasyon ed propesiya nen Jesus, nengnengen so kapitulo 9 na libron Anto so Peteg ya Ibabangat na Biblia? ya impalapag na saray Tasi nen Jehova.
