ÍNDO̱ rí ikhaa grígu náa inuu kúbá rí mbiʼyuu Olivos, grigu nayexima̱ʼa̱ xígií náa Jerusalén ga̱jma̱a̱ náa guʼwóo Jeobá, ajkhui̱i̱n apóstoles ninda̱ʼa̱a̱ Jesús rí muthan rí xú káʼnii eʼyoo ikhaa. Ndiʼkhú má niguambóo niʼthí rí majngudi guʼwóo Jeobá, ma̱ngoo niʼthúún ga̱jma̱a̱ «índo̱ rí mambáa xúgíʼ dí xtáa rarígá náa numbaaʼ» (Mateo 13:40, 49, NM). Ikha jngó niraxi̱i̱: «Nguánáa gáʼni xúgíʼ rígi̱ ma̱ngaa ndiéjunʼ lá garígá índo̱ rí ikháánʼ gatagíʼdi̱i̱ maratañájunʼ náa numbaaʼ ga̱jma̱a̱ índo̱ rí mambáa xúgíʼ dí xtáa rarígá náa numbaaʼ rá.» (Mateo 24:3, NM).

Jesús niriñáa ndiéjunʼ garigá nákha xóó tsejngudi Jerusalén ga̱jma̱a̱ guʼwóo Jeobá. Mú, ráʼkháa i̱ndó ikhú rí nijuiʼtáriyaaʼ mambanúu, xúgíʼ numbaaʼ gambánuu. Mu mbuyáá nguanáa gagiʼdu̱u̱ maʼtáñajunʼ, xúgínʼ bi̱ kúwi̱i̱n náa Ku̱ba̱ʼ ndayóóʼ makuwi̱i̱n xawii ga̱jma̱a̱ tsinaʼ índo̱ rí ikhaa gaxtáa maʼtáñajunʼ: Mbaʼa rí garigá xúgíʼ numbaaʼ xajyuuʼ má mba̱yu̱u̱ʼ índo̱ ganújngoo xúgíʼ rígi̱. Tsinaʼ má rígi̱ gasngájma rí Jeobá nixnúu má ñajunʼ Jesús Rey ndrígóo Reino mesiánico, ikhaa Xa̱bu̱ Ñajunʼ bugi gíiʼ mijngii rí maʼnigámboo xúgíʼ dí tséjmaa ga̱jma̱a̱ dí maʼni̱i̱la mbu̱júu̱ tsímáá xúgíʼ ku̱ba̱ʼ. Xúgíʼ dí niʼtáriyaaʼ Jesús makujmaa dí gíiʼ mijngii mambáa xúgíʼ rí xtáa rarígá náa numbaaʼ rígi̱ —ga̱jma̱a̱ xúgínʼ Xa̱bu̱ Ñajunʼ, xa̱bu̱ ga̱jma̱a̱ religión— ga̱jma̱a̱ magi̱ʼdu̱u̱ i̱mbo̱o̱ nuxi̱ʼ numbaaʼ.

Jesús niʼthí, rí índo̱ ikhaa gagi̱ʼdu̱u̱ maʼtáñajunʼ náa mekhuíí, xúgíʼ Ku̱ba̱ʼ garigá aguʼ mba̱ʼu̱, ewiiʼ, gaʼxmaʼ ga̱jma̱a̱ nandii. Ná xárígá gamajkhu náa xtángoo. Ma̱ngoo, discípulos ndrígio̱o̱ bi̱ gajkhun mutaraʼa xúgíʼ xuajin ajngáa rí májánʼ numuu Reino ndrígio̱o̱ Diúu̱. Rígi̱ ñajunʼ i̱mbóó tsinaʼ rí «ma-pu mba gaʼko mariga», rí nimbá miʼtsú tarígá xóo rígi̱ (Mateo 24:21, AMM).

Xú káʼnii lá guyaa bi̱ cristianos rí na̱ʼkha̱nú mijngii mbiʼi rí gakhi̱i̱ wéñuʼ rá. Jesús niʼthúún discípulos ndrígio̱o̱: «Gamañaʼla ajnga xkrida numu ixi higo» (Mateo 24:32, AMM). Índo̱ má ixi̱ rugua nagu̱u̱ inúu, nakujmaa rí nacho̱o̱ má maxnáa ruʼwa. Ikhaa ma kayuuʼ, xajyúuʼ ma mba̱yu̱u̱ʼ índo̱ ganújngoo xúgíʼ rígi̱ rí niʼthí Jesús, ikhaa rígi̱ makujmaa dí na̱ʼkha̱ rangiyuu dí gíiʼ mijngii mambáa xúgíʼ rí xtáa rarígá náa numbaaʼ. Jesús niʼthí dí mbáwii Anu̱u̱ eʼyoo náa mbi̱ʼi̱i̱ ga̱jma̱a̱ náa hora gagi̱ʼdu̱u̱ gaʼku dí phú mba̱a̱. Ikha jngó, niʼthí: «Gajuhuala xahui, [...] numu ri tsiyala guana aganu mbiʼi ruʼkue» (Marcos 13:33, AMM).

(Na̱ʼkha̱ náa tsinaʼ mba̱ʼu̱ 24 ga̱jma̱a̱ 25 ndrígóo Mateo, tsinaʼ mba̱a̱ 13 ndrígóo Marcos ga̱jma̱a̱ tsinaʼ mba̱a̱ 21 ndrígóo Lucas.)