চহি অহুমগা মখায় পাউ শন্দোকপা অমসুং তাকপি তম্বিবা তৌরবা মতুংদা যীশুনা পৃথিবীদা মহাক্কী মতম লোইগদৌরে হায়বা খঙলম্মী। যিহূদিশিংগী ধর্ম্মগী লুচিংবশিংনা মহাকপু হাৎননবা লৌতুনরম্মী। অদুবু মহাক অসি মীয়াম অমনদি ঈশ্বরগী পাউ তাকথোকপা মীশক্নি হায়দুনা লৌবা মরম্না ইরাং হৌরক্কদ্রা হায়বগী অকিবশু লৈরম্মী। তান্জা অসিদা সৈতান্না যীশুগী সেবোক ১২গী মনুংদা যিহূদা ঈস্কারিয়োৎপু থাজবা মাংহন্বা মীশক ওইহল্লম্মী। ধর্ম্মগী লুচিংবশিংদুনা যীশুবু লৌনম তৌন্নবা যিহূদাদা লুপাগী শেন ময়েক ৩০ পীরম্মী।

মহাক্কী অরোয়বা নুমিদাং অদুদা যীশুনা লান্থোকপীবগী থৌরম পাংথোক্নবগীদমক মহাক্কী পাখোনচৎপশিংগা পুনলম্মী। যিহূদাবু চৎহনখ্রবা তুংদা মহাক্না প্রভুগী নুমিদাং ৱায়রমগী চাকখাং হায়দুনা খংনবা অনৌবা থৌরম ঙাকপগী থবক অদু পাঙথোক্লম্মী। মহাক্না তল অমা লৌরগা ঈশ্বরদা প্রার্থনা হায়জরবা মতুংদা লৈহোরিবা পাখোনচৎপা ১১ অদুদা মথং মথং লানলম্মী। মহাক্না হায়রম্মী “ঐনা নখোয়গীদমক পীরবা ঐগী হকচাং অদু অসিনি; ঐবু নীংশিংনবা মসি তৌ।” মহাক্না য়ু য়াওবা তেঙ্গোৎ অদুশু চপ মান্ননা তৌরগা, হায়রম্মী: “তেঙ্গোৎ অসি ঐনা নখোয়গীদমক তাবিখ্রবা ঐগী ঈগী অনৌবা ৱালেপ্নবা অদুনি।”—লুক ২২:১৯, ২০.

নুমিদাং অদুদা যীশুনা মহাক্কী পাখোনচৎপশিংদা হায়গদৌবা ৱারোল ময়াম অমা লৈরম্মী। মহাক্না মখোয়দা অনৌবা য়াথং অমা পীরম্মী। মখোয়না অমগা অমগা মশাগী ওইজবা থিদনা নুংশিবা উৎনগদৌবনি। মহাক্না হায়রম্মী: “নখোয় অমগা অমগা নুংশিনরবদি, মসিনা মী খুদিংনা নখোয় ঐগী সেবোকশিংনি হায়বা খঙগনি।” (যোহান ১৩:৩৪, ৩৫) মহাক্না মখোয়দা ইকুই কুইদনা থৌক্লগদৌবা অৱা অনাশিং অদুনা নুংঙাইহন্দবা তৌগনু হায়দুনা হায়বিরম্মী। যীশুনা মখোয়গীদমক য়াম্না কন্না প্রার্থনা তৌবিরম্মী। মখোয়না পুন্না থাগৎ ঈশৈ শকমিন্নরবা তুংদা নুমিদাংদা মপান থোরক্লম্মী।

গেৎসেমানীগী লৈকোলদা যীশুনা খুরু খুদক কুল্লগা য়াম্না কন্না প্রার্থনা তৌজরম্মী। ইকুই কুইদনা খুৎলায় পায়বা লান্মি ময়াম অমা পুরোহিৎশিং অমদি অতৈ অতোপ্পাশিংগা লোয়ননা মহাকপু ফাবা লাক্লম্মী। যিহূদানা চঙশিল্লক্লগা চুপ্পিরদুনা যীশুবু তোঙান্না খন্দোক্লম্মী। লান্মিশিং অদুনা যীশুবু পুললবদা পাখোনচৎপশিং অদু চেনখি।

যিহূদিশিংগী অৱাংবা থাক্কী ৱায়েল শঙ অদুদা লেপ্লদুনা যীশুনা ঈশ্বরগী মচানুপানি হায়দুনা শক তাক্লম্মী। ৱায়েল মপু অদুনা মহাকপু ঈশ্বরদা লংজৈ হায়বগী মরালদা শিবগী দন্দি ফংফম থোকই হায়দুনা ৱায়েনখি। মদুদগী যীশুবু রোমগী লৈঙাকপা পোন্তিয়স পিলাৎকী মনাক্তা পুরম্মী। মহাক্না যীশুবু মরাল লৈতে হায়বা খঙলবশু লাও খোঙদুনা মহাকপু অশিবগী দন্দি পীগদবনি হায়দুনা লাওরিবা মীয়ামদুদা খুৎশিন্নখি।

যীশুবু গোলগোথাদা লমজিংদুনা পুরবা মতুংদা রোমগী লান্মিশিংনা মহাকপু উচুক অমদা য়োৎপি থারগা হাৎখি। নুংশানা পুমঙান ঙাল্লম্বা অদু অঙকপা মত্তংদা পুংমম মমশিনখি। তুংদা মদুগী নুমিদাংৱাইরম অদুদা যীশু শিখি অমসুং অকন্বা য়ুহার হাখি। মহাক্কী হকচাং অদু নুংজাওদগী কক্লগা শেম্বা মোঙফম অমদা থমখি। মথংগী নুমিৎতা পুরোহিৎশিংনা মোঙফমদু চেৎনা থিংজল্লম্মী অদুগা চংফমদুদা সনত্রি থম্লম্মী। যীশু মোঙফম অদুদা লেঙদনা লৈরমগদৌব্রা? লৈরম্লোই। অঙকপ থবকশিংগী মনুংদা খ্বাইদগী হেন্বা অঙকপা থবক অদু থোক্লগদৌবা খজিক্তমক ঙাইরে।

​—মাত্থি পন্দুপ ২৬ অমসুং ২৭; মার্ক পন্দুপ ১৪ অমসুং ১৫; লুক পন্দুপ ২২ অমসুং ২৩; যোহান পন্দুপ ১২ দগী ১৯ ফাওবদা য়ুম্ফম ওইবা।