JESÚS kiuikiliyaya eyi xiuitl uan tlajko tlajtolmoyauayaya uan kimatiyaya nechka tlamiskia inemilis ipan Tlaltipaktli. Tlayakananij tlen religión judía kinekiyayaj kimiktisej, maske amo momakayayaj pampa moiljuiyayaj kualaniskiaj katli kiitayayaj Jesús kej se tlajtolpanextijketl ipan nopa altepetl. Uajka, Satanás kiyololinik Judas, —se tlen nopa 12 omej apóstoles— ma kinamaka itlamachtijka. Nopa tlayakananij tlen religión judía kitlaxtlauijkej ika 30 platatomi.

Ipan youali tlen Pascua, Jesús itstoya iuaya iapóstoles pampa iljuichiuaskiaj. Teipa kema kiiljuik Judas ma kisteua, Cristo kipeualtik se yankuik tlamantli tlen moilnamikiskia: toTeko iTlakualis. Kiitski se achi pantsi, momaijtok uan kinpanoltilik nopa 11 apóstoles. Uan kinixtomilik: “Ni notlakayo tlen nitemaktilis inmopampa. Xijchiuakaj ya ni para inkineskayotisej innechilnamikij”. Teipa kinpanoltilik se copa ika vino uan kiijtok: “Ni noeso. Ika noeso tlen nijtoyauas inmopampa nijpeualtis itekiuejkayo nopa yankuik tlajtolsenkauali” (Lucas 22:19, 20).

Jesús kinmachtik miak tlamantli iapóstoles nopa youali kema san uajka itstoskia. Kinmakak se yankuik tlanauatili: ma moiknelikaj ika nochi ininyolo. Yeka kiniljuik: “Nochi tlakamej kimachilisej para nelia innomomachtijkauaj intla nelia inmoiknelisej” (Juan 13:34, 35). Kiniljuik ma amo moyolkokokaj kema kiitaskiaj tlen nechka ipantiskia, yeka kineltlajtlanik toTeotsij ma kinpaleui. Teipa, kiueyichijkej toTeotsij ika uikatl uan yajkej kampa xochimili Getsemaní.

Nopaya Jesús motlankuaketski uan momaijtok ika nochi iyolo iixpa Jehová. Teipa, asitiuetsikoj miakej soldados, tlakamej ika inintepos ininuaya sacerdotes pampa kinekiyayaj kiitskisej. Inijuantij kimatiskiaj ajkia Jesús, kema Judas kitsoponiskia, kej kiniljuijtoya. Nopa soldados kiitskijkej Cristo, uan apóstoles cholojkej.

Jesús kiijtok ya eliyaya toTeotsij iKone ininixpa tetlajtolsenkauanij tlen Jerusalén. Inijuantij kiitakej kej se tlatelchiualistli, se tlajtlakoli tlen ika akajya ueliskia kimiktisej. Teipa kiuikakej kampa Poncio Pilato, se tlanauatijketl tlen Roma. Maske kiitak amo tlaixpanotoya, kichijki tlen kitlajtlaniyayaj maseualmej katli tlauel kinekiyayaj kimiktisej Jesús.

Cristo kiuikakej Gólgota, uan nopaya soldados tlen Roma kilavosminkej ipan se kuauitl. Teipa, maske tonaya tlatlayouixtiuetski. Nopa tiotlak, kema mijki Jesús tlauel chikauak molinik tlali. Itlakayo kikalakitoj ipan se ueyi tetl katli kikoyonijtoyaj, uan kema tonilik, nopa sacerdotes kuali kitsajkej uan tlanauatijkej ma kimokuitlauikaj. ¿Nochipa nopaya mokauaskia? Amo, pampa nechka mochiuaskia se tlauel ueyi tlamantli.

(Mokixtijtok ipan Mateo capítulo 26 uan 27, Marcos capítulo 14 uan 15, Lucas capítulo 22 uan 23 uan Juan capítulos 12 uan tlami ipan 19.)