JESUS éí tááʼ dóó nááʼáłnííʼ nááhai nahojilneʼgo nazhʼneeztą́ą́ʼ. Éí hweʼiinaʼ nidootʼihígíí bichʼįʼ hoolzhishgo hoł bééhózin. Jew dineʼé hastóí dahodísinii ánaazíiníí éí dahodiyiilyééł daaníigo, tʼáá nahontʼineego honidahazʼą́. Ndi díí biniinaa diné hah hodidoołdlałgi béédajildzid, háálá Jesus éí God yá halneʼé nilı̨́įgo dayoodlą́. Jesus éí bikééʼ naakai yę́ę łaʼ Júdas Iskáriyat, Séítan hániʼ áhoolaago Jesus bikʼijįʼ jizlı̨́ı̨́ʼ. Hastóí dahodísinii ánaazíiníí éí Júdas, Jesus ninéiididooʼááł biniyé béésh łigaii 30go yaa deiznil.

Jesus éí yiską́ągo hoʼdiyoolyééł bitłʼééʼ, hakééʼ naakai yę́ę bił ahíjiikai, éí Atisʼadeesdzá bééhániih biniyé bił ádaʼjiilaa. Júdas bizhʼníłniiʼ bikéédóó, bee ééhániih biniyé ánáʼálʼįįh ániidígíí hayííłwod. Jesus éí bááh néidiiʼą́, sodoolzin, áádóó 11go tʼahdii hoł naháaztánígíí yitaizniiʼ. Áádóó ání, ‘Díí shitsʼíís nihá ninádiníʼánígíí átʼé.’ Díí átʼéego ánídaʼoołʼįįhgo ‘bee shéédaałniih doo.’ Bąąh haʼíízhahí wáin biiʼígíí ałdóʼ tʼáá ákótʼéego yaa haadzíiʼgo ání, “Díí doodlı̨́įłii shidił bee ahaʼdeetʼáanii ániidíii átʼé.”​—Luke 22:19, 20.

Tʼáá éí bitłʼééʼ Jesus éí díí 11 yiltʼéhígíí ląʼígóó bichʼįʼ hajiisdzííʼ. Bee hazʼáanii ániidígíí łaʼ yee diníʼą́, éí ahidiníłnáago ayóóʼádaʼahijóʼníi doo. Éí kóháłní, “ayóóʼádaʼahíínóhʼníigo shídahoołʼaahii danohłı̨́įgo diné tʼáá ałtso bił béédahózin doo.” (John 13:34, 35) Díí áhóótʼįįdígíí tʼááká nihijéí bikʼee yínííł ádanihóleʼ lágo ałdoʼ yił níigo yee náyozkan. Áádóó Jesus há sodoolzin. Ałtso ádaʼjiilaadóó bikʼijįʼ dahojíítáál, áádóó tʼah tłʼéeʼgo chʼíjíkai.

Gethsémanii dáʼákʼehgi jíkai, ákwii Jesus nitsidinígoʼgo sozdoolzin. Áádóó hodíínaʼgo, silaó, náádaʼiiłniihii, dóó diné tʼóó ahayóí bá dahachįʼgo hodiʼdooltsoł biniyé haa níná. Júdas éí Jesus yichʼįʼ niníyáago, díí éí bí átʼı̨́ jiníigo jiztsʼǫs. Silaó éí Jesus dayiiłtsood, áádóó hakééʼ naakai yę́ę hatsʼą́ą́ʼ ííjééʼ.

Jew dineʼé aláahgo aa dahwiinítʼı̨́įgi bidááhdóó jiizįʼgo, Jesus éí shí God biYeʼ nishłı̨́ jiníigo hajoodzííʼ. Ńtʼééʼ God baaʼihgo baa yáníłtiʼ dahodííniid, áko hodiʼyoolyéełgo há ndahazʼą́. Áádóó Rome biNaatʼáanii Pántiyas Páílat bichʼįʼ hoʼdeedlóóz. Ndi, tʼáadoo bee bikʼi hótʼáhídago baa ákojiniizı̨́ı̨́ʼ. Áko diné dahoʼniiłhínę́ę bichʼįʼ kóníjiidlaa.

Gálgathagóó adahazlóóz, ákweʼé Roman bisilaó tsin bikáaʼjįʼ hoł adaʼaskaal. Ńtʼééʼ tʼah azʼą́ągo, táadi ahééʼílkidjįʼ chahóółhéél. Táadi oolkiłgo daatsʼí Jesus daaztsą́, áádóó ayóó átʼéego niʼ hideesʼnááʼ. Bitsʼíís yę́ę éí tséníʼootséél góneʼ adeestı̨́. Biiskání, náádaʼiiłniihii tséníʼootséél yę́ęgi tsé yichʼą́ą́h ndeesmááz, áádóó yaa ádahalyą́ą dooígíí niiʼnil. Ákoósh Jesus tʼóó ákoneʼ jiztı̨́į doo? Ndagaʼ. God bibee adziilii tsʼídá aláahdi bee áhodooníłígíí yeeʼ baa hoolzhiizh.

​—Naaltsoos Matthew wóltaʼii 26 dóó 27gi; Mark wóltaʼii 14 dóó 15gi; Luke wóltaʼii 22 dóó 23gi; John wóltaʼii 12dóó 19jįʼ biiʼ baa haneʼ.