JESUS haud dreeunhaulf Joa jeprädicht uk jelieet un wist nu, daut siene Tiet oppe Ieed meist aufjerant wia. De Gloowesleidasch von de Juden wullen am dootmoaken. Dee ferchten sikj oba fa dee, waut Jesus fa eenen Profeet hilden. Äwadäm brocht Soton eenen von de twalf Apostel doatoo, Jesus to veroden. Daut wia Judas Iskariot. De Gloowesleidasch booden dän 30 Selwastekja doafäa aun.

Aun sienen latsten Owent ver sienen Doot hilt Jesus toop met siene Apostel daut Passamol. Aus hee Judas ieescht wajchjeschekjt haud, fieed Jesus eene niee Feia en. Daut wia daut Owentmol. Jesus neem een Biet Broot, säd een Jebäd un jeef siene 11 Apostel daut un säd: “Dit es mien Kjarpa dee fa junt jejäft woat; doot dit om aun mie to denkjen”. Dautselwje deed hee uk met een Kuffel Wien un säd: “Dit Kuffel es de niea Bunt en mien Bloot” (Lukas 22:19-20).

Aun disen Owent haud Jesus siene Apostel väl to sajen. Hee jeef an een nieet Jeboot. See sullen unjarenaunda woare Leew haben. Jesus säd: “Wan jie Leew unjarenaunda haben, woat aulemaun seenen, daut jie miene Jinja sent” (Johanes 13:34-35). Hee root siene Apostel uk sea too, nich dän Moot to velieren wäajens de schlemme Sachen, waut boolt passieren wudden. Jesus deed uk iernstlich fa an bäden. Dan sungen see Leeda toom Gott lowen un veleeten. Daut wia aul lot enne Nacht.

See jinjen no dän Goaden Getsemane, wua Jesus sikj hankjneed un sikj em Jebäd ver Gott utschedd. Boolt kjeem doa eene Grupp von Soldoten, Priestasch un noch aundre han. Dee wieren bewaufnet un kjeemen, om Jesus fausttonämen. Om de Soldoten to wiesen, woont Jesus wia, kjeem Judas un jeef dän eenen Kuss. Aus de Soldoten Jesus dan jeleewat neemen, stuaken de Apostel ut.

Aus Jesus dan ver dän judischen Huagen Rot stunt, säd hee daut gaunz frie, daut hee Gott sien Sän wia. De Huaga Rot hilt daut doafäa, daut hee hiamet Gott jelastat haud, un veuadeeld am toom Doot. Von doa wort Jesus dan no dän reemischen Harscha Pontius Pilatus jebrocht. Pilatus kunn nuscht orrajchtet aun Jesus finjen, oba daut Volkj velangd, Jesus sull omjebrocht woaren. Schlieslich jeef Pilatus bie.

Jesus wort no de Städ Golgata jebrocht, wua hee von reemische Soldoten aun eenen Pol jenoagelt wort. Daut wia aum frieen äwa Dach, oba met eemol wort daut stockdiesta. Aus Jesus lota aum Nomeddach storf, jeef daut een grootet Ieedbäben. De Dooden wort dan en een Grauf nenjelajcht, waut em Steen utjehakt wia. Näakjsten Dach vesechaden de Priestasch daut Grauf un leeten daut bewoaken. Oba wudd Jesus doa em Grauf bliewen? Nä! Boolt wudd daut jratste Wunda passieren, waut daut jejäft haft.

Stett sikj opp Matäus, Kapitels 26 un 27, Markus, Kapitels 14 un 15, Lukas, Kapitels 22 un 23 un Johanes, Kapitels 12 bat 19.