JESU vwo ruiruo rẹ aghwoghwo vẹ eyono rọyen vwẹ akpọ na omarẹ ẹgbukpe erha gbẹ ubro nu, ọ da rhe riẹn nẹ ọke ro che vwo ghwu sikẹrẹ re. Ilori ẹga ri Ju na guọnọ oborẹ ayen vwo hwe, jẹ oshọ rẹ ihwo na mu ayen kidie ihwo na vwo imuẹro kpahen Jesu nẹ ọmraro o ruẹ. Ẹkẹvuọvo, Eshu da riẹriẹ ọvo usun rẹ idibo 12 ri Jesu na, vwọ shẹ, ọyehẹ Judas Iskariọt. Ilori ẹga na veri nẹ ayen cha vwẹ idọnọ efuanfon 30 vwọ kẹ Judas siẹrẹ ọ da shẹ kẹ ayen.

Vwẹ ason rọ koba, Jesu de koko idibo rọyen vwọ kẹ orẹ rẹ Ọwanvrẹn na. Ọke rẹ Judas vwo nẹ uvwre rayen nu, Jesu da ton orẹ kpokpọ ọvo phiyọ, re se Emu Ovwọnvwọn rẹ Orovwori Na. Ọ da reyọ ikara na, nẹrhovwo phiyọ, ọ da gharọ kẹ idibo 11 ri chekọ na. Ọ da tanẹ: “Ọnana hẹ oma mẹ ra vwọ kẹ wẹ. Ru ọnana vwọ karohọ ovwẹ.” Eriyin o ji ru kẹ uko rẹ udi na, rọ vwọ tanẹ: “Ọnana ọbara mẹ rẹ ọphọ ọkpokpọ na.”—1 Kọrẹnt 11:23-25.

O vwo erọnvwọn buebun rẹ Jesu guọnọ vuẹ idibo rọyen vwẹ ason yena. Ọ kẹ ayen iji kpokpọ nẹ ayen vwo ẹguọnọ rẹ ohwohwo. Ọ da ta: “Vwẹ oma rẹ ọnana kọye ihwo ejobi vwọ riẹn nẹ ovwan ghine idibo mẹ, ọ da dianẹ ovwan guọnọ ohwohwo.” (Jọn 13:34, 35) Ọ je vuẹ ayen nẹ e jẹ erọnvwọn re cha phia na kpokpo ayen ẹwẹ-ẹn. Jesu nẹrhovwo gangan vwọ kẹ ayen. Ayen vwọ so ine ujiri nu, ayen de kpo ogba rẹ Getsimani vwẹ ason yena.

Vwevunrẹ ogba na, Jesu de shiguẹ, ọ da nẹrhovwo kẹ Ọghẹnẹ nẹ otọ rẹ ẹwẹn rọyen rhe. O rhe kri-i, isodje, irherẹn, vẹ ihwo efa buebun ri mu ekuakua rẹ ohọnre de rhi mu Jesu. Judas da ra fiọnfiọn unu ri Jesu, rọ diẹ oka ro vwo dje Jesu kẹ ayen. Isodje na vwo mu Jesu, idibo na da djẹ.

Ọke rọvwọ hẹ aguare rode ri Ju na, Jesu da tanẹ ọyen Ọmọ Ọghẹnẹ. Aguare na de bruhwe nẹ ọ tota rẹ ẹgua, ọtiọyena, o fo ughwu. Ayen de mu Jesu bru Pọntiọs Pailet ra, rọ dia Osun rẹ Rom. Dede nẹ ọ mrẹ abe vuọvo vwẹ obọ ri Jesu-u, jẹ o phi Jesu phiyọ abọ rẹ ihwo na ri kperẹ nẹ a teyọn hwe.

Isodje ri Rom de muo kpo Golgọta ra kanrọ mu urhe roja. Siẹvuọvo na, ebri de mu vwẹ oghẹruvo na. Bẹsiẹ ovwọnvwọn vwo te, Jesu de ghwu, otọ na de rhi kpogho gangan. E de muo re shi phiyọ unu rẹ oragha. Ẹdẹ rọ vwọ kpahọn, irherẹn na de din anurhoro rẹ ushi na, ji phi isodje phiyọ nẹ ayen rhẹrẹ. Ushi na yen Jesu cha dia bẹdẹ? Ẹjo. A cha mrẹ igbunu rọ ma rho kparobọ.

​—E muro kpahen ẹbe rẹ Matiu uyovwin 26 vẹ 27; Mak uyovwin 14 vẹ 15; Luk uyovwin 22 vẹ 23; Jọn uyovwin 12 re te 19.