PES 21
Yésu a ntuge!
Yésu a mpémél banigil bé le a niiga bo ni ti bo maként
DILO diaa i mbus nyemb Yésu, banigil bé ba bôdaa ba léba le ngok i bé i majubul ma soñ i mbingana. Batat soñ ba bi ke ngwéé, soñ i bak hôlô!
Biañgel biba bi pémél bo, yada i kal bo le: “Ni nyéñ Yésu, mut Nasaret, . . . A ntuge.” (Markô 16:6) Bana bôdaa ba bem bé, ba nand gwéé i kal baôma. Ndi ba boma Yésu i njel. Ni nye a kal bo le: “Ni kon bañ woñi, kena, kala lôktata le ba ke Galiléa, nyoo nyen b’a téé me.”—Matéô 28:10.
Yokel, banigil iba ba nyodi Yérusalem i ke i nkoñ wada le Emaus. Nkén mut wada a kôôge bo bebe, a bat bo yom ba nkwel. Yésu nu nyen a bi pémél bo i mbus bitugne gwé, a banga nyu ipe. Ndi ba bi hoo bé yi le nye nu. Ni minkañag mi masu, ba timbhe nye le ba yé kwélél inyu Yésu. Ha nyen nkén mut a bôdôl koble bo mam ma mbéñge Mésia ikété Bitilna gwobisôna. Ni maliga, Yésu a bi yônôs bindéé bi bé béñge Mésia letee ni disii di mam. * Banigil ba nsôk bañ yi le nu nkén mut a yé Yésu nu a bi tuge i libak li mbuu, ni nye a nyoi bo mis.
Bana banigil iba ba hoo témb i Yérusalem. Ba koba baôma ba kodi nyoo, ba ma kwés makôga ma ndap. Ngéda bana banigil iba ba bi bôdôl añal yom ba bi tehe, Yésu a pémél bo. Bobasô ba hel ngandak ni yom ba bé tehe! Jon Yésu a bat bo le: “Ni nkon ki woñi? . . . I yé ntilbaga lana le Kristô a nlama son njonok, a tuge ki ikété bawoga kel i nyônôs iaa.”—Lukas 24:38, 46.
Yésu a bi kônde pémél banigil bé ngandak ngélé ikété 40 ma dilo mbus bitugne gwé. Kel yada ki ba kôdi bebe ni 500 bôt, ni nye a pémél bo! Bebeg i kel i nyen Yésu a ti bo nunu soso bôlô le: “Kenana, yilhana biloñ gwobisôna banigil . . . Ni niigaga bo i tééda mam momasôna me bi kal bé. Ndi nuna-ki, me yé ni bé dilo tjodisôna i pam lisuk.”—Matéô 28:19, 20.
Ngélé nsôk Yésu a kodba ni 11 baôma ba ba téñbe ni nye, a bôn bo le: “N’a kôs ngui ngéda mbuu mpubi a’ lôl ngi nan; n’a ba ki mbôgi yem letee ni masuk ma ‘isi.” (Minson mi Baôma 1:8) Ha nyen, Yésu a bédhana ngii, ni ont i nyôyôs nye mis map.
—Biniigana bini bi nyôñna i bikaat bi Matéô pes 28; Markô pes 16; Lukas pes 24; Yôhanes bipes 20 ni 21; 1 Korintô 15:5, 6.