MÔSE LALE ya Yésus a nga wômô, binga be mbe beyé’é be Yésus be nga ke avuse dé. Ane be nga yene na be nga va akok é mbe é fete avuse te. Éyoñe be nga fombô avus été, be nga yene na é ne ékôkoé!

Ane beéngele bebaé be nga suan. Wua ve jô na: “Mi ajeñe Jésus ya Nazareth, a wômôya.” (Marc 16:6) Teke jañelé éyoñ, ane binga be nga bumi mimbile na be ke kate minlômane jame be nga yen. Éyoñe be mbe zen, ane Yésus a nga yene be be. Ane a nga jô be na: “Te koane woñ: kele’ katane bobejañe na be kôlô’ô be ke Galilée, nne be aye yene me wôé.”​—Matthieu 28:10.

Mvuse melu melal, beyé’é bebaé be mbe be so’o Jérusalem be kele Emmaüs. Ane môt éziñ a nga fubu be nsamba a sili be jame be nga to be kobô’ô. Môt ate a mbe Yésus, éyoñe te a wômôya, ve a nga ku be nsamba avale ya na be bo te ji’a yemelane na nye le. Ane be nga yalane a ôtat asu na bia kobô ajô Yésus. Ane môt ate a nga taté na a timine be mame m’afombô Messie aval ése é mbe Mintilan été. Ane a nga liti na, Yésus a nga jalé minkulane mi mame mi afombô Messie akekui bone be mam. * Eyoñe beyé’é be nga zu yeme na môte a kobô nyô a ne Yésus, a wômôya minwuan, ane môt a nga jañ.

Été été nde beyé’é bete bebaé be nga bulane Jérusalem. Be nga koone minlômane mi to nda été mbé ô fete. Be ngenane be kañete jame be nga yene zen, ane Yésus émien a nga yené be be. Jamete é nga to ayaé ya kañese asu beyé’é amu ayete minleme dap! Ane Yésus a nga sili na: “Mi asôane minlem été amu jé? É ne ntilane na, Christ a yiane wu, a wômô soñ môse lale.”​—Luc 24:38, 46.

Melu 40 me lôteya nté ane Yésus a wômô soñ. Beyé’é bé be nga yene nye abui biyoñ. Éyoñe jia ya été beyé’é bebé 500 be nga yene nye! Éyoñ ése a nga kui be beyé’é bé a nga ve be ésaé ji: “Kelan, mi bo meyoñe mese beyé’é, . . . a ye’ele be be ba’ale mejô mese me nga jô mia: me aye tabe be mia melu mese, akekui asu’ulane ya si nyô.”​—Matthieu 28:19, 20.

Ékôan a nga kandane bo a beyé’é bé 11, Yésus a nga ka’ale na: “Mi aye nyoñ ngu, éyoñ mbamba nsisim a ye zu be mia: mi aye bo bekañete bam. . . akekui mfa’a si nyô je adañ ôyap.” (Mam minlôman 1:8) Éyoñe Yésus a nga taté na a bete yôp, nde nkut ô nga bo na beyé’é bé be bo te yene nye ane a ke yôp été.

​—Nkañete ôte wo so kalate Matthieu kabetôlô 28; Marc kabetôlô 16; Luc kabetôlô 24; Jean kabetôlô 20 a 21; 1 Becorinthien 15:5, 6.