ǗRÜWA weyu lárigiñe lounwen Kristu, ñǘdüntiña fiú lani disipulugu würiña arihei umúahaü ani daragu liña hadariruni. Gidá laali somu gürigia dübü le adourubei lau, ani malaali umúahaü.

Ábati hasaliragun biama ánheligu houn. Ariñagati aban hádangiñe: “Háluahañein san Hesusu le Nasarétüna [...]. Sará lídangiñe óunweni” (Márükosu 16:6). Lau loufudagun, aba héibaagun würiña abahüdaguei houn apostolugu. Ǘmada aba hadunragun luma Hesusu, lariñaga houn: “Manufudeda humá. Heiba awisaraña nánigu lun houdin Galiléoun, luagu ñeinba lan harihana” (Matéu 28:10).

Lárigiñe, dan le hóudiña lan disipulugu Herusaléngiñe lun Emaúsu, aba layarafadun aban gürigia houn, aba lálügüdüniña ka lan uagu hadimureha. Hesusu gürigia ligía, ani masubudirun hamuti ladüga ámuhali lan lariyawagun. Aba hóunabun lau íruni hadimurehaña lan luagu Hesusu, ábati lafuranguagüdüni wügüri ligía houn sun le tariñagubei Lererun Bungiu luagu Mesíasi. Le linarün katei, gúnfuli lumuti Hesusu sun profesía le ayanuhabei luagu Mesíasi darí lagumuhóun dimurei. a Dan le híchugunbei fe hayanuhaña lan luma Kristu, le sífirihalibei, aba lagumuchagun.

Aba hagiribudun biángubei disipulugu Herusaléun arihaña apostolugu, damuriguhaña lau bena darugu. Lidan añaha lan abahüdahei le asuseredubei, aba taweiridun hanigi dan le harihini lachülaagunya Hesusu. Aba lálügüdüniña: “Ka uagu lilouguanbei afiñeni tidan hanigi?”. Ábaya lariñagun: “Bürüwañu liña luagu lunti lan lounwen Kristu, aba lanme lásaarun lídangiñe óunweni luagu lǘrüwan weyu” (Lúkasi 24:38, 46).

Luagu 40 weyu ariha hamuti disipugu Hesusu. Lidan aban ókaasion ariha hamuti hóugiñe 500 gürigia. Háfuga ñein líchigei wadagimanu súdiniti le houn: “Heiba lubeiti habügürü gürigia ha lílana sun fulasu, adüga humaña nánime disipulugu [...] arufudaha huguyame houn gaganbadi hamá lun sun le uágubei nariñaga hun. Subudi huméi luagu anahein lan huma sagü weyu darime lagumuchun ubóu” (Matéu 28:19, 20).

Lagumuhóunbei ladamuridagun hama unsu lani apostolugu ha úaraguabaña füramaseti houn: ‘Danme le liabin sífiri sandu huagun, hibihuba ubafu lun gefén humá nuagu chülǘ lumoun lidise-agei fulasu ubouagu’ (Adügaü 1:8). Aba lamudeirun sielun aba tadouragun aban dúeri lau darí lun marihin hamaali lan.

(Lídangiñeti Matéu kapítulu 28, Márükosu kapítulu 16, Lúkasi kapítulu 24, Huan kapítulu 20 luma 21 luma 1 Korintuna 15:5, 6.)