MIŃA milalo ombusa kwed’a Yesu bito bō̱ bena ba ta bókwedi bao ba so̱i ná dale di ta di kudumane̱ byingedi ba so̱ngo̱ di sumwabe̱. Batatedi ba mańa mila, so̱ngo̱ pe̱ ńe ewolo!

Ange̱l ibā i busea babo̱ na mō̱ ńabu a kwala ná: “Lo mapulise̱ nde Yesu ńa Nasaret . . . a mapumbwa.” (Marko 16:6) Esibe̱ jenge̱le̱, ba bito bāla langwea bamuloloma. O nge’abu ńa lo̱ndo̱ ba bomane̱ Yesu. A kwalane̱ babo̱ ná: “Lo si bwa bo̱ngo̱; bińo̱ ala, lo langweye bonatete̱ ná bāle o Galilea, oten nde ba me̱nde̱no̱ je̱ne̱ mba.”​—Mateo 28:10.

O bo buńa me̱ne̱, bókwedi babā ba ta basumwe̱ o Yerusale̱m wala o mundi ma Emaus. Mue̱n a moto a sisea babo̱ be̱be̱ a baise̱ babo̱ nje ba tano̱ ba kwalea. Nde nu mue̱n a moto a ta nde Yesu nu pumbo, ńena nu busedi babo̱ na ńolo ba s’ēmbino̱ o dibokime̱ne̱. Na babo̱ balabe̱ mo̱ na ndutu ná, ba ta nde ba kwalea ońol’a Yesu. Nu mue̱n a moto a botea teleye̱ babo̱ mambo me o Betiledi be̱se̱ jombwea Mesia. Yesu a londise̱ bedinge̱ jombwea Mesia ewo̱-ewo̱ esibe̱ dia to̱ lambo. * Póndá bókwedi ba so̱ṅtane̱no̱ ná nu mue̱n a moto e nde Yesu ńena nu pumbo na ńol’a edi na mo̱ a ńo̱ngo̱ babo̱ o miso̱.

Ba bókwedi babā ba timba o Yerusale̱m o dibokime̱ne̱. Ba po̱ino̱ wo ba bomane̱ mo̱mbe̱ ma wuma bamuloloma ba ko̱to̱me̱no̱ ma kwesam. Ba botedino̱ langwea babo̱ nje ba kusino̱, na Yesu a busea babo̱. Bókwedi bao ba mańme̱ye̱ nika e buka babo̱ o dube̱! Yesu á baise̱ babo̱ ná: “Ońola nje penda ńeno̱ bińo̱ o mulema e? Nika nde e tilabe̱no̱ ná Kristo ángame̱ne̱ kusa ndenge̱ a pumbwa pe̱ o kwedi o buńa bo londe̱ milalo.”​—Lukas 24:38, 46.

Oteten a 40 ma mińa mi bupe̱ bepumbwedi bao, Yesu a busedi bókwedi bao o ngedi ye diwengisan. O ngedi po̱, a busedi buka 500 ba bato! O nin ngedi a bola babo̱ muloloma ma bodilo ná: “Bińo̱ ala . . . timbise̱ matumba me̱se̱ bókwedi bam, . . . na lee̱ babo̱ o ne̱nge̱ mambo me̱se̱ nanedino̱ bińo̱. Nde ombwa, ne na bińo̱ mińa me̱se̱ nate̱na o su la wase.”​—Mateo 28:19, 20.

O ndongame̱n ni sukan a jaino̱ na 11 la bamuloloma bao ba jemea, Yesu a ta a kakane̱ ná: “Nde lo me̱nde̱ kusa ngiń’a [Edi e sangi yena] e me̱nde̱ po̱ omo̱ń’ańu, nde lo me̱nde̱ be̱ mboṅ am . . . nate̱na o masu ma wase.” (Bebolo 1:8) Na Yesu a mamabe̱, diwindiwindi pe̱ di bola ná ba se̱ne̱ pe̱ mo̱ ke̱ a mondea o mo̱ń.

​—Nika e se̱medi o Mateo epasi 28; Marko epasi 16; Lukas epasi 24; Yohane bepasi 20 na 21; 1 Korinto 15:​5, 6.