ỌYỌHỌ usen ita ke Jesus ama akakpa, iban ifan̄ emi ẹkedide mbet esie ẹdikụt ke ẹma ẹkpat itiat emi ẹkedade ẹfụk inua udi esie ẹsio. N̄ko ke udi akana ukpọk!

Angel iba ẹma ẹbiọn̄ọde. Angel kiet ọdọhọ ete: “Mbufo ẹyom Jesus eyen Nazareth. Ẹma ẹnam enye eset.” (Mark 16:6) Iban emi ẹma ẹsọsọp ẹfehe ẹka ndisian mme apostle. Nte mmọ ẹsụk ẹfehede ẹka, mmọ ẹkụt Jesus, ndien Jesus ọdọhọ mmọ ete: “Ẹkûfehe ndịk! Ẹka, ẹketịn̄ ẹnọ nditọete mi, ẹte mmọ ẹka ke Galilee; ndien mmọ ẹyekụt mi do.”—Matthew 28:10.

Mbubreyo usen oro, mbet Jesus iba ẹketo Jerusalem ẹka Emmaus. Esenowo kiet ama asan̄a ekpere mmọ onyụn̄ obụp se mmọ ẹnemede. Esenowo emi ekedi Jesus oro ẹkenamde eset, edi mmọ ikọsọpke idiọn̄ọ enye. Mmọ ẹma ẹbọrọ mfụhọ mfụhọ ẹte ke mmimọ isụk ineme iban̄a Jesus. Esenowo oro ama asiak mme n̄kpọ oro ẹketịn̄de ẹban̄a Messiah ke ofụri N̄wed Abasi ọnọ mmọ. Ke akpanikọ, Jesus ama osu kpukpru ntịn̄nnịm ikọ oro ẹkeban̄ade Messiah. * Ke ini mme mbet oro ẹkedide ẹdidiọn̄ọ ke esenowo oro ekedi Jesus emi ẹkenamde eset, enye osop mmọ ke enyịn.

Mbet iba oro ẹma ẹsọsọp ẹfiak ẹnyọn̄ Jerusalem. Mmọ ẹma ẹkụt mme apostle oro ẹkedọn̄ọde ke ubet oro ẹkọbide. Nte mbet iba oro ẹsụk ẹtịn̄de nte ikokụtde Jesus, enye ọbiọn̄ọde. Idem ama akpa mme mbet tutu! Jesus onyụn̄ obụp mmọ ete: “Ntak emi eyịghe onyụn̄ odụkde mbufo ke esịt? Ẹwet ẹte Christ enyene ndikụt ukụt nnyụn̄ nset ke n̄kpa ke ọyọhọ usen ita.”—Luke 24:38, 46.

Jesus ama owụt mme mbet esie idem ke nsio nsio ini ke usen 40 ke enye ama ekeset ke n̄kpa. Ini kiet, enye ama owụt se ibede mbet 500 idem! Etie nte ke ini emi ke enye ọkọnọ mmọ akwa utom emi: “Ẹka ẹkenam mme owo ke kpukpru idụt ẹdi mbet mi, . . . ẹkpep mmọ ẹnam kpukpru n̄kpọ eke n̄ketemede mbufo. Ndien, sese! Ami ndodu ye mbufo kpukpru usen tutu esịm utịt editịm n̄kpọ emi.”—Matthew 28:19, 20.

Ke akpatre ini emi enye okodude ye mme anam-akpanikọ apostle esie 11, Jesus ama ọdọhọ ete: “Mbufo ẹyebọ odudu ke ini edisana spirit edide edidoro mbufo ke idem, ndien mbufo ẹyedi mme ntiense mi . . . tutu esịm ke ata utịt ikpehe isọn̄.” (Utom 1:8) Ekem ẹmen Jesus ẹdọk ke enyọn̄, ntọn̄enyọn̄ onyụn̄ ofụk enye nte enye osụk ọdọkde aka heaven.

—Ẹda ẹto Matthew ibuot 28; Mark ibuot 16; Luke ibuot  24; John ibuot 20 ye 21; 1 Corinth 15:5, 6.