TRES día Jesucristo omano haguépe, mbohapy kuña ojeroviáva hese oho ohecha pe oñeñoty haguépe. Otopa hikuái ojepeʼa hague pe ita oĩva hokẽme, ha Jesús retekue ndaiporivéima.

Upévo oñemboja hendapekuéra mokõi ánhel. Peteĩva heʼi: ‘Peẽ piko peheka Jesús Nazaretguápe. Haʼe ningo oikove jeýma’ (Marcos 16:6). Umi kuña pyaʼe porã oho omombeʼu hag̃ua umi apostolkuérape. Ohokuévo ojotopa hikuái tapére Jesúsndi. Haʼe heʼi chupekuéra: ‘Ani pekyhyje. Tapeho pemomarandu che ermanokuérape, toho che rendápe Galiléape’ (Mateo 28:10).

Upe rire mokõi disípulo osẽ oho Emaúspe. Tape kuʼáre oñemboja peteĩ kariaʼy ha oñepyrũ oñemongeta hendivekuéra. Haʼekuéra ndohechakuaái upe kuimbaʼe haʼeha Jesucristo. Upévare mbaʼembyasýpe omombeʼu hikuái umi mbaʼe oiko ramóva Jerusalénpe. Haʼe katu oñepyrũ omyesakã chupekuéra mbaʼéichapa oñekumplipaite umi profesía oñeʼẽva pe Mesías rehe. a Opillávo hikuái pe kuimbaʼe haʼeha Cristo, haʼe okañy chuguikuéra.

Ou jey rire Jerusalénpe koʼa mokoĩ disípulo, oho umi apostolkuéra rendápe. Upérõ haʼekuéra oñembyatyhína peteĩ koty ñembotypýpe. Ha omombeʼu aja hikuái umi mbaʼe oikovaʼekue ou sapyʼa Jesús hendapekuéra, ha enterove oñemondyipa. Haʼe katu oporandu: ‘Mbaʼére piko ndapegueroviái?’. Ñandejára Ñeʼẽme ningo heʼi voi “pe Mesías omanovaʼerãha, ha upéi oikove jey mbohapy ára haguépe” (Lucas 24:​38, 46).

Cuarenta ára aja Jesúspe ojehecha heta vése. Peteĩ jey oĩvaʼekue 500 rupi voi ohecháva chupe. Oiméne upérõ haʼe omeʼẽ chupekuéra ko tembiapo tuichaitéva: ‘Tapeho opa tetã rupi pejapo disípulo, ha pemboʼe chupekuéra tojapo umi mbaʼe haʼevaʼekue peẽme. Peikuaáke che aimetaha penendive ára paha peve’ (Mateo 28:​19, 20).

Jesús oñembyatýrõ guare ipahaite umi 11 apóstol ndive opromete chupekuéra: ‘Espíritu sánto oúvo pende ári omeʼẽta peẽme puʼaka, ha pesẽta pemombeʼu che réra oparupiete ko yvy ape ári’ (Hechos 1:8). Upe rire Jesús ojupi yvágape ha peteĩ arai omoʼã chupe.

(Oñeguehohẽ Mateo kapítulo 28; Marcos kapítulo 16; Lucas kapítulo 24; Juan kapítulo 20, 21; ha 1 Corintios 15:​5, 6-gui.)