ASS wis tlata mbeεd lmut n Σisa, kra n tlawin yellan ger inelmaden-is, ufant aẓru-nni yellan zdat n uẓekka n Σisa iwexxeṛ yerna ulac lǧeţţa-s zdaxel.

Snat n lmalayekkat ḍehrent-ed i tlawin-nni. Yiwen n lmelk yenna-yasent: “Teţnadimt ɣef Σisa anaṣari [...]. Yeḥya-d si ger lmegtin.” (Marqus 16:6) S lemɣawla, tilawin-nni uzzlent ad sseεlment imceggεen-is. Deg webrid, mmugrent Σisa i sent-yennan: “Ur ţţaggademt! Ṛuḥemt inimt i watmaten-iw ad ṛuḥen ɣer tmurt n Jlili, dinna ara yi-ẓren.”—Matta 28:10.

Ass-nni, mi gεedda kra n lweqt, sin inelmaden ṛuḥen si Yarucalim ɣer Amawes. Yiwen ubeṛṛani iqerreb ɣur-sen, isteqsa-ten ɣef wacu i heddṛen. Di tin n ṣṣeḥ d Σisa, i d-yeḥyan si ger lmeggtin, i sen-d-iḍehren. Lameεna, ibeggen-ed iman-is s ṣṣifa ur εqilen ara imir imir. Leḥzen deg wul, rran-as belli ţmeslayen ɣef Σisa. Skud leḥḥun, argaz-nni issefham-asen ifyar n Tira Iqedsen yeεnan Lmasiḥ. Di mkul taɣawsa, Σisa yessefεel licaṛat yeεnan Lmasiḥ. * Mi fehmen inelmaden belli abeṛṛani-yagi d Σisa i d-yeḥyan am ṛṛuḥ, iɣab zdat-sen.

Imiren-nni kan, sin inelmaden-agi uɣalen ɣer Yarucalim. Dinna, ufan imceggεen di texxamt iwumi ɣelqent tewwura. Llan ḥekkun-asen ayen yeḍran, mi sen-d-yeḍher Σisa. Inelmaden-is ggumman ad amnen. Σisa yesteqsa-ten: “D acu-t ccekk-agi deg ulawen-nwen? [...] Atah wayen yuran di tira iqedsen: ‘ilaq Lmasiḥ ad yeεteb, a d-iḥyu ass wis tlata si ger lmegtin.’” —Luqa 24:38, 46.

Acḥal d abrid, Σisa isbanay-ed iman-is i inelmaden-is di ṛebεin-nni n wussan i d-iḍefren ḥeggu-ines. Yiwet n tikkelt, iḍher-ed i wakteṛ n 500. Ahat ass-nni i sen-yefka ccɣel-agi ameqran: “Ṛuḥet ɣer tmura meṛṛa n ddunit, slemdet imdanen iwakken ad uɣalen d inelmaden-iw [...]. Slemdet-asen ad tebεen ayen akk i wen-slemdeɣ. Ma d nekk ad iliɣ yid-wen yal ass alamma ţ-ţaggara n ddunit.”—Matta 28:19, 20.

Asmi i geẓra tikkelt taneggarut 11 n yemceggεen-is unṣiḥen, Σisa yewεed-asen: “Kunwi a wen-d-teţţunefk tezmert n Ṛṛuḥ iqedsen ara d-yersen fell-awen, imiren aţ-ţilim d inagan-iw [...] alamma d ixfawen n ddunit.” (Lecɣal 1:8) Umbeεd Σisa yebda yeţţali s igenni, imiren tesɣab-it yiwet n tagut ɣef wallen n inelmaden-is.

—Ayagi yers ɣef Matta ixef wis 28; Marqus ixef wis 16; Luqa ixef wis 24; Yuḥenna ixef wis 20 d wis 21; 1 At Kurintus 15:5, 6.