ПАШИ мьрьна Иса Мәсиһ, се рʹож дәрбаз дьбә, у чәнд жьн жь шагьртед Иса дьчьн бәрбь тʹьрба ԝи у дьвиньн, ԝәки кәвьре кӧ шкәфт дадьда, ведакьри йә у тʹьрб вала йә!

Ньшкева дӧ мәләк хӧйа дьбьн, у йәк жь ԝан дьбежә: «Һун ль ԝи Исайе Ньсрәте дьгәрʹьн . . . әԝ жь мьрьне рʹабуйә!» (Марԛос 16:6). Әԝана зускава рʹәвин щәм шагьртед Иса, ԝәки әван тьшта гьли кьн. Ԝи чахи рʹева Иса рʹасти ԝан һат, у ԝанарʹа гот: «Нәтьрсьн! Һәрʹьн бежьнә бьред мьн, кӧ әԝ һәрʹьнә Щәлиле у ль ԝьр ԝе мьн бьбиньн» (Мәтта 28:10).

Ԝе рʹоже һьнә ԝәʹдә шунда, дӧ шагьртед Иса жь Оршәлиме дьчунә гӧнде Әмԝасе. Йәки хәриб незики ԝан бу у пьрси, кʹа дәрһәԛа чь әԝана хәбәр дьдьн. Әԝ Исайе сахбуйи бу, ле ԝана әԝ нас нәкьр. Шагьртед мәʹдәкьри щаба ԝи дан, ԝәки дәрһәԛа Иса Мәсиһ хәбәр дьдьн. Мере нәнас дәстпекьр әԝ гьлийед жь Кʹьтеба Пироз, йе кӧ дәрһәԛа Мәсиһ һатьбун ньвисаре, ԝанарʹа гьли кьр у шьровәкьр. Рʹасти жи, пʹехәмбәрти дәрһәԛа Мәсиһ, ль сәр Иса һур бь һур һатьн сери. a Чахе шагьрта фәʹм кьр, ԝәки әв мәри Иса йә, йе кӧ ча рʹӧһʹ һатьбу сах кьрьне, Иса бәтавәбу.

Әв дӧ шагьрт перʹа-перʹа вәгәрʹийан Оршәлиме. Ԝана шагьртед Исайә кӧ тʹәвайи тʹоп бьбун, дитьн у һʹәму тьшт ԝанарʹа гьли кьрьн. Ԝе гаве, рʹаст ә дәри дадайи бу, ле ньшкева Иса хӧйа бу у бәр ԝан сәкьни. Шагьртед әʹщебмайи, нькарьбун баԝәр кьрана ԝәки әԝ Иса йә! Ле Иса пьрс кьр: «Һун чьма шашмайи манә у дӧдьли нә?». У паше зедә кьр: «Аԝа ньвисар ә, кӧ Мәсиһ гәрәке щәфа бькʹьшинә у рʹожа сьсийа жь мьрьне рʹабә» (Луԛа 24:38, 46).

Нава 40 рʹожада, Иса гәләк щар хԝә нишани шагьрта кьр. Щарәке, Иса хԝә нишани 500 шагьрта зедәтьр кьр! Ча те кʹьфше, һьнге Иса шьхӧләки фәрз да ԝана: «Ньһа һәрʹьн һʹәму мьләта һин кьн, . . . у ԝан һʹәму тʹәмийед кӧ мьн данә ԝә мьләта һин кьн, ԝәки әԝ хԝәй кьн. Әз ирода тʹьме һʹәта ахьрийа дьнйайе тʹәви ԝә мә!» (Мәтта 28:19, 20).

Чахе Иса щара пашьн рʹасти 11 шагьртед хԝәйә амьн һат, әԝи соз да: «Гава Рʹӧһʹе Пироз бе сәр ԝә, һуне ԛәԝате бьстиньн у . . . һʹәта сәре дьне жи бьбьнә шәʹдед мьн» (Кʹаред Шандийа 1:8). Паши ве йәке, Иса һьлкʹьшийа ль әʹзмана у нава әʹԝьрада бәр чʹәʹве шагьрта бәтавәбу.

​—Сәр һʹиме кʹьтебед Мәтта сәре 28; Марԛос сәре 16; Луԛа сәре 24; Йуһʹәнна сәре 20 у 21; 1 Корьнтʹи 15:5, 6.