PÎSKA 21
¡Jisas ba kli raya takan!
Jisas ai disaipilka nani kupia bukaia dukiara param takan bara adar raya nani yaban
JISAS yu yumhpa pruan kan wina buan taim, witin disaipilka mairin kum kum ba anira bikan pliska ra wan bara kwâkan kan. Upla kum tasba untika pura prakan walpaya ba sakan. Baha mita untika bilara diara âpu kan.
Mairin nani ra insal wâl param takan. Insal kum win: ‘Man nani Jisas Nasaret wina plikisma ba. Witin buan sa’ (Mark 16:6). Minitka ra, mairin nani ba apastil nani ra wih win. Yabal ra auya kan taim Jisas wal prawan. Jisas win: “Man nani si bripara. Muihki nani ra wih maisa paks Galili ra wabia, bara bahara ai kaikbia” (Matiu 28:10).
Sim yua ra, disaipil wâl Jerusalem wina Emus ra wapi auya kan taim, tringsar kum witin nani ra makabi walan dîa dukiara aisi kan sapa. Baha uplika ba Jisas kan, sakuna wîna daukra wala bri kan ba mita, witin nani ba ya sapa nu âpu kan. Disaipil nani ba sari lâka wal win ai Smasmalkra dukiara aisi kan ba. Bara tringsar uplika ba Ulbanka nani Misaya dukiara aisi kan ba tânka witin nani ra smalkan. Jisas ra Misaya dukiara aisi kan dahra aisanka nani sut sitnika kat aimakan. * Disaipil nani ba Jisas wal aisi kan nu takan taim, witin ba spirit uplika kum kan ba mita, kau sip kaikras kan.
Disaipil nani wâl ba apastil nani ra Jerusalem ra wih win dîa takan ba. Apastil nani ba utla kum ai durka nani praki bilara kan. Bara disaipil nani kata ba dîa takan ba dukiara aisi kan taim, Jisas kli param takan. Jisas win: ‘¿Dîa muni man nani kupiam ra namhpa namhpa baman lukisma ki?’. Baha wina aisan: “Baku ulban sa, Misaya ba pruaia kan, bara yu yumhpa kat pruan nani wina kli buaia” (Luk 24:38, 46).
Yu 40 bilara, Jisas aima kum kum ra param takan. Yu kum, upla 500 pura Jisas ra kaikan. Ban kra baha piua ra ai disaipilka nani ra win: ‘Bamna man nani was, bara yang disaipilki nani dauki banhs; bara smalki banhs dîa dîa man nani ra adar maikri ba bîla wali kaia. Bamna kaiki bas yang na man nani aikuki yu bani kamna, tasba tnata kat’ (Matiu 28:19, 20).
Jisas ai apastilka kasak nani wal aima lâs asla takan taim pramis munan: ‘Man nani puramra spirit holikira balbia ba ra karnika brima, bara yang dukira witnis nani kama ban wan tasba wala ra kau laihura ba kat sin’ (Apastil Nani Sturka 1:8). Baha wina, Jisas heven ra uli wan bara kasbrika kum pura prakan bara disaipil nani ba kli kaikras kan.
(Matiu sapta 28, Mark sapta 16, Luk sapta 24, Jan 20 bara 21 bara 1 Korint 15:5, 6 wina sakan sa.)
^ baiki.s 3 Misaya dukiara aisanka kum kum naha wauhkataya pîska 14, 15 bara 16 ba kaiks; baku sin Rait pali Baibil ba Dia Smalkisa ki? bukka wina Ulbanka Tâka “Misaia Balbia Pramis Munan ba sika, Jisas Kraist sa” laki kaiks.
