യേശു മരിച്ച് മൂന്നാംനാൾ അവന്‍റെ അനുഗാമികളായ ചില സ്‌ത്രീകൾ അവന്‍റെ കല്ലറ സന്ദർശിക്കുന്നു. കല്ലറവാതിൽക്കൽ വെച്ചിരുന്ന കല്ല് ഉരുട്ടിമാറ്റിയിരിക്കുന്നതായി അവർ കാണുന്നു. കല്ലറയും ശൂന്യമായിരുന്നു.

അപ്പോൾ രണ്ട് ദൂതന്മാർ അവർക്കു പ്രത്യക്ഷപ്പെട്ടു. “നസറായനായ യേശുവിനെയാണല്ലോ നിങ്ങൾ തിരയുന്നത്‌. . . . അവൻ ഉയിർപ്പിക്കപ്പെട്ടിരിക്കുന്നു” എന്ന് അതിലൊരു ദൂതൻ അവരോടു പറഞ്ഞു. (മർക്കോസ്‌ 16:6) സ്‌ത്രീകൾ ഉടനെ അപ്പൊസ്‌തലന്മാരെ വിവരം അറിയിക്കാൻ ഓടി. പോകുന്ന വഴിക്ക് അവർ യേശുവിനെ കണ്ടുമുട്ടി. യേശു അവരോട്‌, “ഭയപ്പെടേണ്ട! പോയി എന്‍റെ സഹോദരന്മാർ ഗലീലയ്‌ക്കു പോകേണ്ടതിന്‌ അവരെ വിവരം അറിയിക്കുക. അവിടെ അവർ എന്നെ കാണും” എന്നു പറഞ്ഞു.—മത്തായി 28:10.

അന്നേ ദിവസം രണ്ടുശിഷ്യന്മാർ യെരുശലേമിൽനിന്ന് എമ്മാവുസ്‌ എന്ന ഗ്രാമത്തിലേക്ക് പോവുകയായിരുന്നു. വഴിയിൽവെച്ച് ഒരു അപരിചിതനും അവരോടൊപ്പം കൂടി. അവർ എന്താണ്‌ ചർച്ചചെയ്യുന്നതെന്ന് ആ മനുഷ്യൻ തിരക്കി. വാസ്‌തവത്തിൽ, ഉയിർത്തെഴുന്നേറ്റ യേശുതന്നെയായിരുന്നു അവരോടു സംസാരിച്ചത്‌. എന്നാൽ അവർക്ക് യേശുവിനെ ആദ്യം തിരിച്ചറിയാനായില്ല. കാരണം മരിക്കുന്നതിനുമുമ്പുള്ള അതേ ശരീരമായിരുന്നില്ല അപ്പോൾ അവന്‍റേത്‌; ആത്മസ്വരൂപിയായി ഉയിർപ്പിക്കപ്പെട്ട യേശു പുതിയൊരു ജഡശരീരം ധരിച്ചാണ്‌ അവർക്കു പ്രത്യക്ഷനായത്‌. തങ്ങൾ യേശുവിനെക്കുറിച്ചാണ്‌ സംസാരിക്കുന്നതെന്ന് വാടിയ മുഖത്തോടെ അവർ അറിയിച്ചു. മിശിഹായെക്കുറിച്ച് തിരുവെഴുത്തുകളിൽ പറഞ്ഞിരിക്കുന്നത്‌ അവൻ അവർക്കു വ്യാഖ്യാനിച്ചുകൊടുത്തു. മിശിഹായെ സംബന്ധിച്ചുള്ള പ്രവചനങ്ങൾ * അതേപടി യേശുവിൽ നിവൃത്തിയേറിയിരുന്നു. ആ അപരിചിതൻ യേശുവാണെന്ന് അവർ തിരിച്ചറിഞ്ഞപ്പോഴേക്കും അവൻ അപ്രത്യക്ഷനായി.

ആ രണ്ടുശിഷ്യന്മാർ ഉടനെ യെരുശലേമിലേക്കു തിരിച്ചുപോയി. അവർ ചെല്ലുമ്പോൾ അപ്പൊസ്‌തലന്മാർ ഒരു മുറിയിൽ കതകടച്ചിരിക്കുകയായിരുന്നു. ആ രണ്ടുപേർ അവരുടെ അനുഭവം വിവരിക്കവെ, യേശു വീണ്ടും പ്രത്യക്ഷനായി. അവർക്ക് അവരുടെ കണ്ണുകളെ വിശ്വസിക്കാനായില്ല! അപ്പോൾ യേശു അവരോടു പറഞ്ഞു: ‘നിങ്ങളുടെ ഹൃദയത്തിൽ സംശയങ്ങൾ ഉയരുന്നതെന്ത്? ക്രിസ്‌തു കഷ്ടം സഹിക്കുകയും മൂന്നാംനാൾ മരിച്ചവരിൽനിന്ന് ഉയിർക്കുകയും ചെയ്യണമെന്ന് എഴുതപ്പെട്ടിരിക്കുന്നു.’—ലൂക്കോസ്‌ 24:38, 46, 47.

ഉയിർത്തെഴുന്നേറ്റ്‌ 40 ദിവസത്തിനുള്ളിൽ യേശു പല തവണ ശിഷ്യന്മാർക്കു പ്രത്യക്ഷനായി. 500-ലധികം പേർക്ക് പ്രത്യക്ഷനായ അവസരത്തിലായിരിക്കണം, പ്രധാനപ്പെട്ട ഈ നിയോഗം അവൻ തന്‍റെ ശിഷ്യന്മാർക്കു നൽകിയത്‌: “നിങ്ങൾ പോയി സകല ജനതകളിലുംപെട്ട ആളുകളെ ശിഷ്യരാക്കിക്കൊള്ളുവിൻ. . . . ഞാൻ നിങ്ങളോടു കൽപ്പിച്ചതൊക്കെയും പ്രമാണിക്കാൻ തക്കവണ്ണം പഠിപ്പിക്കുകയും ചെയ്യുവിൻ. ഞാനോ യുഗസമാപ്‌തിയോളം എല്ലാനാളും നിങ്ങളോടുകൂടെയുണ്ട്.”—മത്തായി 28:19, 20.

വിശ്വസ്‌തരായ 11 അപ്പൊസ്‌തലന്മാരുമായുള്ള അവസാന കൂടിക്കാഴ്‌ചയുടെ അവസരത്തിൽ യേശു അവർക്ക് ഈ വാഗ്‌ദാനം നൽകി: “പരിശുദ്ധാത്മാവ്‌ നിങ്ങളുടെമേൽ വരുമ്പോൾ നിങ്ങൾക്കു ശക്തി ലഭിച്ചിട്ട് നിങ്ങൾ . . . ഭൂമിയുടെ അറ്റംവരെയും എനിക്കു സാക്ഷികൾ ആയിരിക്കും.” (പ്രവൃത്തികൾ 1:8) ഇതു പറഞ്ഞു കഴിഞ്ഞപ്പോൾ യേശു സ്വർഗത്തിലേക്ക് എടുക്കപ്പെട്ടു; ഒരു മേഘം അവനെ അവരുടെ കാഴ്‌ചയിൽനിന്നു മറച്ചു.

—മത്തായി 28-‍ാ‍ം അധ്യായം, മർക്കോസ്‌ 16-‍ാ‍ം അധ്യായം, ലൂക്കോസ്‌ 24-‍ാ‍ം അധ്യായം, യോഹന്നാൻ 20, 21 അധ്യായങ്ങൾ, 1 കൊരിന്ത്യർ 15:5, 6 എന്നിവയെ ആധാരമാക്കിയുള്ളത്‌.