KEMA uiptlatitoya ika miktoya Cristo, miakej siuamej katli no eliyayaj itokilijkauaj yajkej kampa kikalakijtoyaj uan kiitatoj tlapojtok. Se akajya kiijkuinijtoya nopa tetl katli kiixtsaktoya. ¡Uan iijtik amo tleno onkayaya!

Uajka monextijkej omej iluikaeuanij. Uan se kiijtok: “Nijmati inkitemouaj Jesús, nopa Nazaret ejketl [...]. Ya moyolkuitok” (Marcos 16:6). Nopa siuamej motlalojtejkej kiniljuitoj apóstoles. Kema yauiyayaj ojtipa kipantijkej Jesús, uan kiniljuik: “Amo ximomajmatikaj. Xiyakaj, xikinyolmelauatij noikniuaj para ma yakaj estado Galilea uan nepa timopantisej” (Mateo 28:10).

Teipa, kema omej Jesús itokilijkauaj kistejkej Jerusalén uan yauiyayaj Emaús, kinnechkauik se katli amo kiixmatiyayaj uan kintlajtlanik tlake kiijtojtiauiyayaj. Eliyaya Jesús, uan amo kiixmatkej pampa ayokmo nesiyaya kej ipa. Kiiljuijkej ika kuesoli kiilnamiktiauiyayaj ininTlamachtijka, uan nopa tlakatl pejki kinixtomilia nochi tlen Biblia kiijtoua tlen Mesías. Nelnelia ipan Jesús mochijki nochi tlajtolpanextili katli kiijtouayayaj tlen Mesías. * Kema kiitakej katli iuaya monojnotstoyaj eliyaya Cristo, tlen mokueptoya se tonaltsi, ixpolijtejki.

Nopa omej Jesús itokilijkauaj mokuepkej Jerusalén uan kinitatoj apóstoles, katli mokaltsaktoyaj kampa mosentilijtoyaj. Kema kinpouiliyayaj tlen kinpanotoya, nochi katli nopaya itstoyaj momajmatijkej kema kiitakej sampa monextik Jesús. Ya kintlajtlanik: “¿Para tlen inmajmauij uan inmoiljuiaj ipan imoyolo keja nopa?”. Uan teipa kiniljuik: “Keja ni ijkuilijtok para nopantiskia na niCristo. Monejki nitlaijiyouis uan nimikis uan ika eyi tonali monejki nimoyolkuis” (Lucas 24:38, 46).

Ipan 40 tonali, Jesús miakpa kiitakej. Se tonali, kiitakej se 500 maseualmej. Uelis uajka kinnauatik itokilijkauaj ma kichiuakaj ni tekitl tlen tlauel moneki: “Xiyakaj ipan nochi tlaltinij uan xikinmachtikaj tlakamej ma elikaj nomomachtijkauaj. [...] Xikinmachtikaj ma kichiuakaj nochi tlen niinmechiljuijtok. Uan xijmatikaj ya ni, na niitstos inmouaya nochi tonali” (Mateo 28:19, 20).

Kema san uajka mosentilik ika iapóstoles katli amo kikauayayaj kiniljuik: “Kema asis itonal toTeko ipan inmoyolo, inkipiasej chikaualistli uan inyasej intlayolmelauatij tlen na [...] kampa más uejuejka pilaltepetsitsij ipan ni Tlaltipaktli” (Hechos 1:8). Teipa pejki tlejko iluikaktli, uan se mixtli kitsaktiajki uan ayokmo kiitakej.

(Mokixtijtok ipan Mateo capítulo 28, Marcos capítulo 16, Lucas capítulo 24, Juan capítulo 20 uan 21 uan 1 Corintios 15:5, 6.)