TÖLU ngaluo me no aefa mate Yesu, so nifaha’önia ira alawe samaigi lewatö, no aheta gowe balu-balunia. Me lafaigi lewatö andrö lö hadöi boto Yesu!

Darua ndra mala’ika si so ba lewatö, muhede zi samösa imane, ’Yesu banua Nazareta andrö ni’aluimi, no maoso ia.’ (Mareko 16:6) Lö laradö ira, fagohi ndra alawe andrö ba wangombakha khö ndra nifaha’ö tanö bö’ö. Falukha khöra Yesu ba lala, imane khöra, ”böi mi’ata’ufi, mi’ae’e miwa’ö ba dalifusögu, ena’ö möi ira ba Galilaia, ba ba da’ö la’ilado dania.”​—Matai’o 28:10.

Ba meluo da’ö, so darua ndra nifaha’önia si möi ba Ema’usa la’otarai Yeruzalema. Samösa niha si lö la’ila si fao khöra ba lala, ba isofu-sofu hadia nifadunö-dunöra. Si ndruhuniasa, Yesu zi fahuo-huo khöra ba lala andrö si no tesusugi moroi ba ngai zimate, iforoma’ö ia khöra ba mboto si lö la’ila. No lafakuru gangangora ba lamane, Yesu nifadunö-dunöma. Niha si lö la’ila no mege ibörögö ifatunö khöra wama’ele’ö si no tesura ba Zura Ni’amoni’ö sanandrösa khö Mesia. Si ndruhunia, fefu nifa’ele’ö sanandrösa khö Mesia i’otarai wondrege zide-ide no alua khö Yesu. * Me no aboto ba dödö ndra nifaha’ö wa awöra ba lala andrö Yesu, si no tesusugi ba mboto eheha, ba izumaigö taya ia.

Mangawuli ba Yeruzalema nifaha’ö andrö si darua. No owulo fönara ndra nifaha’ö Yesu tanö bö’ö ba da’ö. Me ladunö-dunö hadia zi no alua khöra, izumaigö so Yesu fönara. Tokea ndra nifaha’önia ba lö faduhu dödöra! Isofu khöra Yesu, ”Hana wa tokea ami ba hana wa manufa dödömi?”. Simane si so ba Zura, ”sanaögö famakao Keriso ba si maoso moroi ba ngai zi mate, na no irugi tölu ngaluo.”​—Luka 24:38, 46.

Ba zi 40 ngaluo me no tesusugi Yesu, iforoma’ö ia khö ndra nifaha’önia ba ginötö si fabö’ö-bö’ö. Samuza ma’ökhö, iforoma’ö ia ba zi töra 500 niha! Ba ginötö da’ö, i’ombakha’ö khöra halöwö sabölö moguna lafalua, ”Mi’ae’e, mibali’ö nifaha’ö fefu soi, . . . mifaha’ö ira ba wolo’ö fefu hadia ia niwa’ögu khömi. Ba hiza, fao khömi ndra’o, ero ma’ökhö, irugi gamozua götö danö andre.”​—Matai’o 28:19, 20.

Me falukha ia safuria khö ndra nifaha’önia si-11, fawu’u li Yesu khöra, ”Ba mitema dania wa’abölö geheha ni’amoni’ö simöi khömi, ba samaduhu’ö ami khögu . . . irugi wondrege danö.” (Halöwö Zinenge 1:8) Me no aefa iwa’ö da’ö, ba tefazawa ia ba zorugo, ba anehe ira, ihawui ia lawuo.

​—Te’odane-dane ba mbuku Matai’o faza 28; Mareko faza 16; Luka faza 24; Yohane faza 20 ba 21; I Korindro 15:5, 6.