JESUS dajiztsą́ą́dóó tááʼ yiską́ągo, sáanii łaʼ hódahoołʼaahii danilı̨́ı̨́ ńtʼééʼ yę́ę tséníʼootséelgi níʼáázh. Ńtʼééʼ tsé dáádiníʼánę́ę nahjįʼ eelmááz lágo bikʼízhníʼáázh. Ńtʼééʼ Jesus nihoʼdeeltínę́ęgi doo jiztı̨́į da!

Níłchʼi nidaalʼaʼí nidiltʼéego hachʼįʼ yitʼíní áʼdiilyaago łaʼ áháłní; Názarethdóó Jesus hádínóhʼı̨́ı̨́ʼ, éí yeeʼ “daaztsą́ą́dę́ę́ʼ náádiidzá.” (Mark 16:6) Daalʼaadii 11ígíí bił hozhdoolnih biniyé tʼáá ákǫ́ǫ́ tsı̨́įłgo dah ahizhdíʼníilchą́ą́ʼ. Ákǫ́ǫ́ bichʼįʼ ałhaa jootʼashgo Jesus hadááh níyá. “Tʼáadoo náłdzidí níyáago ání, Nihílááh, shikʼisóó Gáliliigóó dookah, áadi dashiidoołtséełgo bee bił hołneʼ.”​—Matthew 28:10.

Tʼahádóó tʼáá éí bijı̨́ Jesus naakigo bídahoołʼaahii, Eméíyasgóó jooʼash. Ńtʼééʼ diné léiʼ hodiiyá, áádóó haʼátʼíísh baa yáłtiʼ hałní. Díí diné éí Jesus daaztsą́ą́dę́ę́ʼ náádiidzá yę́ę átʼı̨́. Łah ázhnoolingo áłtsé éí tʼáadoo bééhojoosįįd da, łah ázhnoolningo biniinaa. Yínííł jílı̨́įgo ájíní, éí yeeʼ Jesus baa yéiiltiʼ ńtʼééʼ. Áádóó díí diné éí tʼáá ałtso Diyin Bizaad biiʼdóó Mesáíyah bídadéétʼiʼígíí hazhóʼó yee hoł ahoʼniilneʼ. Jesus éí Mesáíyah tʼáá bítséedi baa chʼíhwiistʼánę́ę tʼáá ałtsojįʼ yikʼeh hoolaa. * Áko díí naakigo jooʼash yę́ę éí díí diné hodiiyáhígíí, Jesus daaztsą́ą́dę́ę́ʼ níłchʼi jílı̨́įgo nááhoʼdiilzáhígíí átʼı̨́ı̨́ lágo baa ákozhniizı̨́ı̨́ʼ. Ńtʼééʼ tʼáá áajįʼ ájísdįįd.

Díí naakigo jooʼash yę́ę, tsı̨́įłgo Jerúsalemgóó níjítʼáázh. Ńtʼééʼ áadi dáádílkał bichʼą́ą́h dah astą́ągo daalʼaadii 11ígíí naháaztą́ą́ lágo bikʼízhníʼáázh. Áádóó ákweʼé, Jerúsalemdę́ę́ʼ jooʼashgo áhóótʼįįd yę́ę baa hojoolnihgo Jesus hachʼįʼ yitʼı̨́įgo ánááʼdiilyaa. Áko hakʼee dadeesyizgo, daʼ díísh tʼáá aaníí dazhniizı̨́ı̨́ʼ! Ńtʼééʼ, “Haʼátʼéegoshąʼ danihijéí biyiʼdi nihił naaki dahazlı̨́ı̨́ʼ?” níigo Jesus nahódééłkid. “Jó, bee akʼeʼashchı̨́, éí Christ tiʼhwiidoonih áádóó tágí jı̨́ aleeh góneʼ daaztsą́ą́dę́ę́ʼ náádidoodááł.”​—Luke 24:38, 46.

Jesus náábiʼdiilzáádóó bikʼijįʼ dízdiin jı̨́ hódahoołʼaahii díkwíidi shı̨́ı̨́ bichʼįʼ jitʼı̨́įgo ánízhʼdiilyaa. Łah da éí 500go diné bichʼįʼ jitʼı̨́įgo ázhʼdiilyaa! Bééhózínígo éí ákweʼégi naanish ílínígíí yeidiyiizʼą́: “Nihílááh, ałʼąą dineʼé tʼáá ałtso ídahoołʼaahii danilı̨́įgo ádaahłeʼ, . . . áádóó bee nihichʼįʼ hahásdzíiʼii tʼáá ałtso yikʼeh dahółʼı̨́į dooleełgi bee nidanohtin, áádóó jóʼakon, łahgo náhodeesdzáajįʼ tʼáá áłahjįʼ nihił honishłǫ́.”​—Matthew 28:19, 20.

Jesus éí 11go hakééʼ naazínę́ę akéedi bił áłah jizlı̨́įʼgo ábijiní: “Nihí Níłchʼi Diyinii nihikʼi hooleʼgo bee adziilii nihee dahodooleeł . . . índa nahasdzáán nidaneesʼą́ą́góó shá dahołneʼ dooleeł.” (Acts 1:8) Áko Jesus yáʼąąsh biyiʼgóde níjísdlı̨́ı̨́ʼ, tʼáá dazhníłʼı̨́įgo kʼos bichʼą́ą́h eeldogo doo yitʼı̨́į da silı̨́ı̨́ʼ.

​—Naaltsoos Matthew 28gi; Mark 16gi; Luke 24gi; John 20 dóó 21gi; 1 Corinthians 15:5 dóó 6gi biiʼ baa haneʼ.