DIAD komatlon agew kayari impatey nen Jesus, anengneng na pigaran bibiin babangatan to a samay baton akasara ed angiponponan ed sikato et nitolin. Sakey ni, anggapo la imay bangkay!

Duaran anghel so nampanengneng. ‘Aanapen yo si Jesus, a Nazareno,’ so inkuan na sakey. “Sikato so inmoli ed bilay.” (Marcos 16:6) Nanapura iray bibii pian ibalita ed saray apostol. Diad dalan et asabat day Jesus. ‘Agkayo natatakot!’ inkuan to. “Onla kayon mangibaga ed saray agagik ya ompikal iran onla ed Galilea, et nanengneng da ak diman.”—Mateo 28:10.

Diad saginonor na saman ya agew, duaran babangatan so linma ed baley na Emaus a nanlapud Jerusalem. Walay agda kabat ya akiulop ed sikara tan tinepet to no antoy pantotongtongan da. Say katuaan to et si Jesus iman ya inmoli, a nen primero et agda abidbir. Maermen iran inmebat a say pantotongtongan da et si Jesus. Insan saman ya agda kabat et impaliwawa to iray nipaakar ed Mesias a walad Kasulatan. On, sinumpal nen Jesus so Mesianiko iran propesiya anggad sankamelagan a detalye. * Sanen amoria na saray babangatan a samay katongtong da et si Jesus manaya ya inmoli bilang sakey ya espiritu, sikatoy biglan naandi.

Tampol a pinmawil irayan duaran babangatan ed Jerusalem. Diman et aromog da iray apostol a nantitipon ed kuarto ya akatalak iray puerta. Legan ya iistoryaen na duara so naeksperiensya ra, pinmanengneng si Jesus. Ngalngali agmakapanisia iray mankelkelaw a papatumbok to! “Akin et manduaruwa kayo ni?” so intepet nen Jesus. “Oniay nisulat: nakaukolan a manirap so Kristo tan onoli’d bilay ed komatlon agew.”—Lucas 24:38, 46, Maung a Balita.

Diad loob na 40 agew kayari inkioli nen Jesus, sikatoy pinmanengneng ed saray babangatan to ed nanduruman pankanawnawa. Diad sakey ed saratan et diad arap na masulok a 500 a babangatan! Nayari a diad satan a pankanawnawa to inter ed sikara iyan baleg a kimey: “Onla kayo . . . tan manggawa kayo na saray babangatan ed amin a nasyones . . . ya ibangat yo ran mangunor na amin a bengabengatla ya ingganggan ko ed sikayo; tan nia, wala ak a naynay ed sikayo, ya angga ed kasampotan na mundo.”—Mateo 28:19, 20.

Diad unor ya impitongtong to ed saray 11 a matoor ya apostol to, insipan nen Jesus: “Mangawat kayo na pakayari, no onsabi ed sikayo so espiritu santo, et sikayo so tasik . . . angga ed kasampotan na dalin.” (Gawa 1:8) Insan si Jesus so kalkalnan amaatagey, tan sinaniban na lurem anggad agda la nanengneng so isesegep to ed tawen.

—Nibase ed Mateo kapitulo 28; Marcos kapitulo 16; Lucas kapitulo 24; Juan kapitulo 20 tan 21; 1 Corinto 15:5, 6.