AUM dredden Dach no Jesus sienen Doot jinjen eenje Frues, waut Jesus nojefolcht hauden, no daut Grauf. Oba de Steen, waut ver daut Grauf wia, wia doa wajchjerolt. Un daut Grauf wia ladich.

Met eemol sagen see doa twee Enjel. De eena säd to an: “Jie sieekjen no Jesus von Nazaret . . . Hee es oppjestonen” (Markus 16:6). Fuaz oppe Städ randen de Frues de Apostel daut sajen. Hinjawäajes bejäajenden see Jesus. Hee säd to an: “Fercht junt nich! Got un sajcht miene Breeda, daut see sellen no Galiläa gonen. Doa woaren see mie seenen” (Matäus 28:10).

Lota dänselwjen Dach jinjen twee Jinja von Jerusalem no daut Darp Emmaus. Oppem Wajch schloot sikj an met eemol een Maun aun. Dis Maun wia Jesus, oba de Jinja kjanden am nich, wiels am aundasch leet. Jesus wia aus Jeist oppjestonen, oba hee kunn sikj doawäajen aus Mensch seenen loten. Hee fruach an, von waut see sikj unjahilden. De Jinja säden gaunz truarich, daut see von Jesus räden deeden. Dan läd hee an ut, waut en de Schreften äwa dän Messias jeschräwen stunt. Jesus haud werkjlich aules bat oppet latste erfelt, waut äwa dän Messias wia profezeit worden. * Aus de Jinja dan moakjten, daut de framda Maun Jesus wia, veschwunk hee ver an.

De twee Jinja jinjen dan schwind trigj no Jerusalem. Aus dee de Apostel jroz vetalden, waut see beläft hauden, wia Jesus doa met eemol medden mank an, uk wan de Stow, wua see wieren, toojeschloten wia. Dee kunnen daut nich jleewen, waut see sagen! Jesus fruach an, wuarom see twiewelden, un säd: “Soo steit jeschräwen, daut Christus lieden woat un aum dredden Dach [woat] vom Doot oppstonen” (Lukas 24:38, 46).

Nodäm daut Jesus oppjestonen wia, leet hee sikj noch 40 Doag bie veschiedne Jeläajenheiten von siene Jinja seenen. Opp eene Sauz sagen am äwa 500 Menschen opp eemol! Veleicht wia daut bie dit Mol, aus hee siene Jinja waut sea besondret oppjeef. Hee säd: “Got . . . no de Velkja von de Welt un moakt an to Lieelinja . . . Lieet an aules to doonen, waut ekj junt befolen hab. Un velot junt doaropp, ekj sie emma bie junt, batem Enj von de Welt” (Matäus 28:19-20).

Aus Jesus daut latste Mol met siene 11 true Apostel toop wia, vespruak hee an: “Wan de Heilja Jeist äwa junt komen woat, woa jie Krauft kjrieen, un jie woaren miene Zeijen sennen . . . äwa de gaunze Welt” (Aposteljeschicht 1:8). Dan hoof Jesus opp un fua trigj nom Himmel. Eene Wolkj bedakjt am un de Jinja kunnen am nich mea seenen.

Stett sikj opp Matäus, Kapitel 28, Markus, Kapitel 16, Lukas, Kapitel 24, Johanes, Kapitels 20 un 21 un opp 1. Korinta 15:5-6.