KÍXNUU 21
Jesús naga̱bi̱i̱
Jesús nikujmaa náa kúwi̱i̱n discípulos ndrígio̱o̱ mú maxnún sie̱khi̱i̱ ma̱ngaa maxnún iʼwááʼ nuxi̱ʼ ikhoo
AJTSÚ mbiʼi má eʼni rí nikháñu Cristo, mbiʼin gu̱ʼu̱ bi̱ ñajúúnʼ discípulos nigun náa iñáwajinʼ, kambaʼta nixkamaa. Nixtáa mbáa bi̱ nirígúu itsí rí kúgo náa iñáaʼ, nímba̱a̱ nda̱wa̱á tsáa kua̱ʼa̱a̱n.
Ikhú nikhujmin a̱jmi̱i̱n ángeles. Mbáa dí ikhíínʼ niʼthí: «Ikanʼla iʼyaʼla Jesús Nazareno [...].Ndiʼya-ma [o nigabi̱i̱]» (Marcos 16:6, AMM). Tajyúuʼ má nigúu̱n ragañun gu̱ʼu̱, mú muthún apóstoles dí káʼnii ndiyáá. Náa ka̱mba̱a̱ niraʼníí Jesús, ikhaa niʼthúún: «Maxamiñaʼla, aʼguala gutunla angüinʼ ri magon Galilea, iki guyeʼ» (Mateo 28:10, AMM).
Wakhíʼ rúʼko̱, índo̱ a̱jmi̱i̱n discípulos nigajnaán náa Jerusalén nagun náa Emaús, ni̱ʼkha̱ mbáa xa̱bu̱ bi̱ tseniʼnii niraxu̱u̱n ndiéjunʼ eguwáanʼ ruthi. Mínaa má Jesús, mú nanguá niniʼnii numuu rí i̱mba̱ nuthii kayuu. Migíná niriʼñáa ikhíínʼ mu naguwáanʼ ruthi ga̱jma̱a̱ numuu bi̱ Niʼsngún, xa̱bu̱ buʼko̱ nigíʼdu̱u̱ niʼthúún rí káʼnii xtáa raʼthí Ajngáa raunʼ Diúu̱ ga̱jma̱a̱ numuu Mesías. Xúgíʼ rí kiʼtáriyaaʼ ga̱jma̱a̱ numuu Mesías, Jesús niʼnimbánuu káxi̱. * Índo̱ nigu̱u̱ idúún rí Cristo eni dxajkhun gajmiún, rí xúgi̱ ni̱ndxu̱u̱ mbáa espíritu, nda̱wa̱á nánguá ndiyáá náa nijkha̱.
Nájmi̱i̱n discípulos nitangi̱i̱n náa Jerusalén ma̱ngoo nigun guñun apóstoles, bi̱ kajtin náa awúu̱n guʼwá dí kúgo. Índo̱ kuwa ruthi rí káʼnii nigiʼni, xúgínʼ niguanún tsiángua índo̱ nikujmaa Jesús mbu̱júu̱, ikhú ikhaa niraxu̱u̱n ikhíínʼ. «Narijngo xkuaʼni indxaʼhuamijnala naʼ aun akianʼla-roʼ.» Ma̱ngoo niʼthí: «Xkuaʼni ndiʼyo ri mbayaminuʼ Cristo, jame mbaʼya naʼ majñu wajinʼ rido aganu riatsu mbiʼi» (Lucas 24:38, 46, AMM).
Mbaʼa nuthu nikujmaa Jesús rí eʼni a̱jma̱ skiñuʼ mbiʼi. Mbá mbiʼi ndiyáá itháan dí witsu cientu xa̱bu̱. Mbáa ikhú niʼthúún xa̱bi̱i̱ bi̱ naguwaʼ kidxuuʼ dí muni mbá ñajunʼ dí gíʼdo wéñuʼ numuu: «Aʼguala, [...] gusjngun mba xuguinʼ xabo gentil [...]. Gusjngunla ri munimbani mba xugui ri nitañajuanʼla. Jenla guejioʼ xta gajma nindxaʼla jamba mbiʼi, asjndo jamu» (Mateo 28:19, 20, AMM).
I̱mbó aʼphu̱ rí nigimbíin i̱mbá gu̱wa̱ʼ i̱mbi̱i̱n apóstoles bi̱ niguajun jmbu náa ikhaa, ikhaa nixná ajngóo: «Rido aʼka Espíritu Tsi Kaʼhui maruguaruhuanʼla, aʼkue ri mudrigula tsiake ri mutaraʼala numuʼ [...] jame asjndo naʼ ndambarigo raun numba» (Hechos 1:8, AMM). Nda̱wa̱á nigi̱ʼdu̱u̱ nitsima̱a̱ mekuíí, gíiʼ mbá du̱u̱n náa nita̱ʼa̱a̱.
(Na̱ʼkha̱ náa tsinaʼ mba̱a̱ 28 ndrígóo Mateo, náa tsinaʼ mba̱a̱ 16 ndrígóo Marcos, náa tsinaʼ mba̱a̱ 24 ndrígóo Lucas, tsinaʼ mba̱ʼu̱ 20 ga̱jma̱a̱ 21 ndrígóo Juan ga̱jma̱a̱ 1 Corintios 15:5, 6.)
^ párr. 6 Mataxkamaa mbaʼa xkri̱da rí kiʼtáriyaʼ ga̱jma̱a̱ numuu Mesías rí nimbánuu náa Jesús atayáá náa sección 14, sección 15 ga̱jma̱a̱ sección 16 ndrígóo folleto rígi̱ xó má náa apéndice “Jesucristo, Mesías bi̱ nijuiʼthá ma̱ʼkha̱” ndrígóo libro Ndiéjunʼ phú eʼsngáa náa Biblia rá.
