ENGA Kristu tanimu jurhiatikua páni japkia uarhiri, uarhiticha máru engaksï Jesusiri jorhenguarhitichepka, nirasptiksï jima enga Jesusi jatsinhantapka ka mítakataksï exentaspti. Nema kénditaspti tsakapuni enga jima ómutaenga ka exesptiksï eska Jesusi nóteru jima jarhaspkia.

Jiájkani tsimani ánjilicha xarhakuasptiksï. Ka ma arhiaspti: “Chajtsï jirinhantasïnga Jesusi Nasareti anapuni [...]. Ima tsíntastia” (Markusʌ 16:6). Uarhiticha, jirejiresï nirasptiksï uiripani apostulichani eianguani, engaksï nirani japkia, exentasptiksï Jesusini ka ima arhiaspti: “Asï ché je, sino ni je eianguani juchiti ermanuechani para eskaksï niuaka Galilea ka jimajtsïni exentaati” (Mateu 28:10).

Tátsekua, tsimani jorhenguarhiticha Jerusaleniksï uéraspti paraksï Emausi nirani, ka achati ma engaksï ima no mítipka, andarheraaspti ka kurhamarhiaspti ambeksï uandontskuarhipaxapi. I achati Jesusispti, joperu imaksï no úsïrendi mítintani jimboka ménderueni xarharasïrengia. Kánikuaksï kómu pʼikuarheraparini mókukusptiksï, eskaksï imeri Jorhentpitiri ambe uandontskuarhipaxapka, ima achamasï úndaspti arhiani iámindu ambe enga Diosïri Karakata uandaenga Mesiasiri ambe. Sési jimbo, Jesusi úspti iámindu ambe eska na uandakata japkia Mesiasiri ambe. * Engaksï mítintapkia eska Kristuespka engaksï jingoni uandontskuarhini japka, enga iásï espiritu máepkia, ima jimajku no néespti.

I tsimani Jesusiri jorhenguarhiticha kʼuanhatsentasptiksï Jerusaleni, ka nirasptiksï apostulichani exeani, jima engaksï tánguarhitini japka mínhakata. Engaksï i eianguani japka apostulichani ambe enga úkuarhipka, Jesusi ménderu xarhakuaspti ka iáminduechaksï ísku pakaraspti. Jesusi kurhamarhiaspti: “[¿]Andijtsïsï no jakajkujki?” Ka ístu arhiaspti: “Ísïmindu karakata jarhasti [...] eska Kristu tekantapiringa ka tanimu jurhiatikua jimbo tsíntani uarhiricharhu uératini” (Lukasʌ 24:38, 46, NM).

Kuarenta jurhiatikua jimbo Jesusi uánikua uelta xarhakuaspti imeri jorhenguarhitichani. Ma jurhiatikua, jukari quinientu kʼuiripuecha exesptiksï. Jamberi jiájkani íntsapti imeri chúxapatichani ini kʼéri ánchikuarhitani: “Ni je jorhendaani iámindu kʼuiripuechani, [...] ka jorhendaani eskaksï patsaka iámindu ambe engaksïni ji juramuchika, ka ji méntkisï jauaka chánksïni jingoni astaka jamberi kʼamaraka parhakpini” (Mateu 28:19, 20).

Ultimu uelta enga Jesusi tánguarhipka imeri onse apostulichani jingoni engaksï no méni jurajkupka, aiakuaspti: “Chajtsï intsïnhaka uinhapikua espiritu santueri enga juuaka para[jtsï] jukaratini jarhani, ka uandantakajtsï juchiti ambe [...] iápurhu parhakpinirhu asta jimanga sánderu iauanika” (Ukuecha 1:8). Jimajkani, uénaspti karhanchintani auandarhu, ka nubi ma úndaspti ójchakurani astaka nóteru nema úpkia exeni.

(Pʼitakata jarhasti Mateu kapitulu 28, Markusʌ kapitulu 16, Lukasʌ kapitulu 24, Juanu kapituluecha 20 ka 21 ka 1 Korintu 15:5, 6.)