ИИСУСЛЭН кулэмез бере куинетӥ нуналаз кышномуртъёс, кудъёсыз солэн дышетскисьёсыз пӧлын вал, адӟизы, шайгуэ пыронэз пытсась из палэнтэмын шуыса, нош пушказ — буш.

Шӧдтэк шорысь соос азе кык кылчинъёс султӥзы. «Тӥ Назаретысь кортӵогаськем Иисусэз утчаськоды,— шуиз одӥгез соос пӧлысь. — Со улӟыса султӥз» (Марк 16:6). Кышномуртъёс соку ик бызьыса мынӥзы со сярысь апостолъёслы ивортыны. Сюрес вылысен соосты Иисус пумитаз. Со шуиз: «Эн кышкалэ. Мынэлэ, Мынам братъёсылы ивортэлэ. Галилеяе мед мынозы, отысен соос Монэ адӟозы» (Матфей 28:10).

Берлогес, со нуналэ ик, кык дышетскисьёс Иерусалимысь Еммаус гуртэ мыно вал. Соос доры матазы адями лыктӥз но юаз, мар сярысь соос верасько. Со улӟытэм Иисус вал, нош соос сое ӧз тодмалэ. Ӝоже усем дышетскисьёс веразы, Иисус сярысь вераськыса мыно шуыса. Соку со адями валэктӥз соослы сое, мар Мессия сярысь вань Гожтэмъёсын верамын вал. Зэм но, Мессия сярысь азьпалзэ ивортонъёс Иисус вылын пыр-поч быдэсмизы *. Куке дышетскисьёс валазы, со улӟытэм Иисус шуыса, со ышиз.

Дышетскисьёс соку ик Иерусалиме берытскизы но, огазе люкаськем апостолъёсты шедьтыса, сюрес вылын луэм учыр сярысь веразы. Со куспын, ӧсъёс пытсамын вал ке но, пӧлазы Иисус султӥз. Абдрам дышетскисьёс ас синъёссылы ӧз оске! «Малы таӵе малпанъёс тӥляд сюлмады пыро? — юаз Иисус но ватсаз: — Тазьы гожтэмын, тазьы ик луыны кулэ вал Христосэн: курадӟонэз адӟыны но куинетӥ нуналаз улӟыса султыны» (Лука 24:38, 46).

40 нунал ӵоже Иисус дышетскисьёсызлы трос пол возьматскылӥз. Одӥг пол сое 500-лэсь тросгес дышетскисьёсыз адӟизы! Ӵапак соку, вылды, со соослы кулэ луись уж сётӥз: «Мынэлэ, вань калыкъёсты дышетэлэ... ваньзэ, мае Мон тӥледлы косӥ, соосты быдэсъяны дышетэ; вань нуналъёсы, дунне бырытозь, Мон тӥледын огазьын» (Матфей 28:19, 20).

Куке Иисус 11 оскымон апостолъёсыныз берпуметӥзэ пумиськиз, со кылзэ сётӥз: «Тӥ вылэ Святой Дух васькоз но, тӥ кужым басьтоды... быдэс музъемлэн пумысеныз пумозяз ик Мынам адӟисьёсы-ивортӥсьёсы тӥ луоды» (Апостолъёслэн ужъёссы 1:8). Со бере Иисус вылӥе ӝутэмын вал, пилем сое ворсаз но, со инме ӝутскиз.

Пыкиськемын: Матфей, 28-тӥ люкет; Марк, 16-тӥ люкет; Лука, 24-тӥ люкет; Иоанн, 20-тӥ но 21-тӥ люкетъёс; 1 Коринфъёслы 15:5, 6.