NGA ḓuvha ḽa vhuraru nga murahu ha lufu lwa Yesu, vhaṅwe vhafumakadzi vhe vha vha vhe vhafunziwa vhawe vho wana uri tombo ḽe ḽa vha ḽo vala bako ḽe a vha o vhulungwa khaḽo ḽo phiguluswa. Zwiṅwe hafhu, bakoni ho vha hu si na tshithu!

Ho ḓa vharuṅwa vhavhili. Muṅwe muruṅwa o ri: “Ni ṱoḓa Yesu wa Nazareta . . . O dzamuluwa!” (Marko 16:6) Nga u ṱavhanya, vhenevho vhafumakadzi vho mbo ḓi gidima vha ya u vhudza vhaapostola. Musi vhe nḓilani vha ṱangana na Yesu. O ri: “Ni songo ofha; tshimbilani ni yo vhudza vharathu vhanga, vha ye Galilea; vha ḓo mbona henengei.”—Mateo 28:10.

Nga murahu nga ḽeneḽo ḓuvha, vhafunziwa vhavhili vho vha vha tshi khou bva Yerusalema vha tshi khou ya Emausi. Muṅwe muthu vha sa mu ḓivhi o mbo ḓi ḓa a tshimbila navho nahone a vha vhudzisa zwine vha khou amba nga hazwo. Onoyo munna ho vha hu Yesu o vuswaho, we a bvelela e kha tshivhumbeo tshe vha si mu ṱalukanye musi vha tshi thoma u mu vhona. Vho mu fhindula vho ṱungufhala uri vho vha vha tshi khou amba nga ha Yesu. Onoyu muthu vha sa mu ḓivhi o thoma u vha ṱalutshedza zwithu zwi tshimbidzanaho na Messia zwi re Maṅwaloni. Vhukuma, Yesu o vha o ḓadzisa vhuporofita hoṱhe ha Messia. * Musi vhafunziwa vha tshi ṱhogomela uri onoyo muthu vha sa mu ḓivhi ndi Yesu, we a vuswa sa muthu wa muya, o mbo ḓi ngalangala.

Nga u ṱavhanya vhafunziwa vhavhili vha mbo ḓi humela Yerusalema. Henefho vha mbo ḓi wana vhaapostola vho kuvhangana nḓuni yo hoṋwaho. Musi vhenevho vhavhili vha tshi khou anetshela yeneyi tshenzhelo, Yesu a mbo ḓi bvelela. Vhatevheli vhawe vho mangalaho a vho ngo zwi kholwa zwenezwo! Yesu a vha vhudzisa a ri: “Mihumbulo iyo i dzhenela’ni dzimbiluni dzaṋu? Maṅwalo o zwi amba zwauri Kristo u ḓo shengedzwa, a vuwa vhafuni nga ḓuvha ḽa vhuraru.”—Luka 24:38, 46.

Nga murahu ha maḓuvha a 40 musi o no vusiwa, Yesu o mbo ḓi bvelela kha vhafunziwa vhawe kha zwiitea zwo fhambanaho. Kha tshiṅwe tshiitea, o bvelela kha vhathu vha fhiraho 500! Zwi vhonala uri kha tshenetshi tshiitea, o vha ṋea hoyu mushumo wa ndeme: “Iyani-ha ni ite vhathu vhoṱhe vhafunziwa . . . Ni vha funze u ita zwoṱhe zwe nda ni laya. Huno vhonani, ndi na’nwi misi yoṱhe u swika vhufheloni ha ḽifhasi.”—Mateo 28:19, 20.

Kha muṱangano wawe wa u fhedza na vhaapostola vhawe vha fulufhedzeaho vha 11, Yesu o vha fulufhedzisa uri: “Ni ḓo dzhia maanḓa musi Muya-mukhethwa a tshi ḓa kha inwi na vha dziṱhanzi dzanga . . . na swika nga mugumo wa shango.” (Mishumo 1:8) Nga tshenetsho tshifhinga Yesu o mbo ḓi takuselwa nṱha, nahone gole ḽa vha tsira vha si tsha mu vhona musi a tshi khou gonya ṱaḓulu.

—Enea mafhungo a wanala kha Mateo ndima ya 28; Marko ndima ya 16; Luka ndima ya 24; Yohane dzindima 20 na 21; 1 Vha-Korinta 15:5, 6.