TULO ka adlaw katapos mamatay hi Jesus, nakita han pipira han iya disipulo nga kababayin-an nga waray na an bato ha entrada han lubnganan. Dugang pa, an lubnganan waray na sulod!

Duha nga anghel an nagpakita. “Nagbibiniling kamo kan Jesus nga Nasaretnon,” siring han usa. “Hiya nabanhaw.” (Markos 16:6) Han hibatian ito, dinalagan dayon an kababayin-an basi sumatan an mga apostol. Kondi ha dalan, nakita nira hi Jesus. “Diri kamo mahadlok,” hiya nagsiring. “Lakat kamo pagsumati an akon mga kabugtoan, nga hira magkalakat ngadto ha Galilea, ngan didto ira ako hikikit-an.”​—Mateo 28:10.

Ha kulop hito nga adlaw, duha nga disipulo an nagbabaktas tikang ha Jerusalem tipakadto ha barangay han Emaus. Usa nga estranghero an dinaop ha ira ngan nagpakiana kon ano an ira gin-iinistoryahan. Ha pagkamatuod, hiya amo an binanhaw nga hi Jesus ha iba nga pisikal nga lawas nga waray dayon nira hikilal-i. Masurub-on nga binaton hira nga nag-iinistorya hira mahitungod kan Jesus. Katapos, an estranghero nagtikang magsaysay han tagna mahitungod han Mesias. Oo, tanan nga tagna mahitungod han Mesias, bisan an pinakagutiay nga detalye, natuman kan Jesus. * Han hikilal-an nira nga hi Jesus an estranghero nga ginbanhaw sugad nga espiritu, hiya nawara.

Binalik dayon an duha nga disipulo ha Jerusalem. Didto, hin-abotan nira an mga apostol nga nagkakatirok ha nakakandado nga kwarto. Samtang nagsusumat an duha han ira naeksperyensyahan, nagpakita hi Jesus. Haros diri makatoo an iya nanhipausa nga mga sumurunod! “Kay ano nga nagpaparopakianahay kamo ha iyo kasingkasing?” nagpakiana hi Jesus. “Sugad hini an nahisurat, nga kinahanglan nga hi Kristo mag-antos, ngan mabanhaw tikang ha mga minatay ha ikatulo ka adlaw.”​—Lukas 24:38, 46.

Ha sulod hin 40 ka adlaw tikang han banhawon hi Jesus, nagpakita hiya ha iya mga disipulo ha iba-iba nga okasyon. Ha usa nga higayon, nagpakita hiya ha sobra 500 ka tawo! Posible nga hini nga takna, iya iginhatag inin seryoso nga toka: “Lakat . . . ngan manhimo kamo hin mga tinon-an ha ngatanan nga mga nasud . . . pagtutdoi hira han pagbantay han ngatanan nga mga bagay, nga akon iginsugo ha iyo; ngan kitaa, ako upod ha iyo ha ngatanan nga mga adlaw tubtob ha kataposan han kalibotan.”​—Mateo 28:19, 20.

Ha ultimo nga pakigkita ni Jesus ha iya 11 nga magtinumanon nga apostol, hiya nagsaad: “Kamo makarawat hin gahum kon kumanhi na an Espiritu Santo ha iyo: ngan kamo mga matitestigo ko . . . ngadto ha sidsid gud han kalibotan.” (Buhat 1:8) Katapos ginbayaw hiya, ngan natabonan hin dampog samtang nakayab ngadto ha langit.

​—Iginbasar ha Mateo kapitulo 28; Markos kapitulo 16; Lukas kapitulo 24; Juan kapitulo 20 ngan 21; 1 Korinto 15:5, 6.