MIDID 21
Jesús riás lad gueʼet
Jesús rareʼ lóo xpiin par gacné né guisuidy layibu
ÓRNI bisaʼ Jesús tzón govitz de goló goity, xpiimbu ni nac buñgonaʼ goyee roʼ baʼ né bibiʼyibu que xobialsani. Noʼ ni goleʼ guiee ni nasieg roʼ baʼ reʼ, né ma nadachni.
Ór cú chop ángeles bireʼ lóoyibu, né toibtica de layibu goniʼ: «Lóoto cayopyto Jesús ni nac Nazareno [...]. Láabu ma biásbu» (Marcos 16:6). Órcuca xidal buñgonaʼ reʼ bixony par gaibyibu láani xpiin Jesús. Ló néz bidzaglóyibu Jesús ni goniʼ: «¡Diti guidzuibyto! Coltzé, colgaiby guirá buchi par tzeeyibu Galilea, né cú sabiʼyibu naʼ» (Mateo 28:10).
Dzú cuca laʼga chop xpiimbu rareʼ Jerusalén né see lagary ni laa Emaús, toib buñ ni diti rimbuyibu rabigax né ranabdiitz layibu de xi caniʼyibu. Buñguieeu reʼ nac Jesús, per xpiimbu diti bimbu láabu portín ma gadzé mod nacbu. Layibu cuapyibu que caniʼyibu de Xomextrayibu né que noʼyibu nabann, né buñguieeu reʼ golexabu guirá ni raniʼ Escrituras de Mesías. Scú láani, Jesús buny cumplirbu guiráxadit profecías ni rasetlaa de láabu. * Órni biduidyibu cuent que caninéyibu Cristo, ni ma nac espíritu, tiptisi ma diti labúu bibiʼyibu Cristo stoib.
Chop biinreʼ bibiguetyibu Jerusalén né goyeeyibu ronoʼ xpiin Jesús ni dxee lainy cuart ni nayeg. Laʼga caniʼyibu ni gosacloyibu, guirá ni cacadiag layibu nigolú bidziguiaʼyibu órni bibiʼyibu que Jesús radxin ronoʼyibu stoib. Jesús gonabdiitz layibu: «¿Xigony diti raluladxto?». Né láaca goniʼbu: «Scareʼ caani: que Cristo nadudybu ló galrrioʼob né que ñásbu lad gueʼet de goló tzón govitz» (Lucas 24:38, 46).
Por 40 dzú xidal buñ labúu bibiʼyibu Jesús, ndeʼ góc después ni Jesús biás lad gueʼet. Toibtica ór más de 500 buñ bibiʼ láabu. Sigory dzúcu órni Jesús góoch a guirá ni racanal láabu gonyibu toib dxiin: «Coltzé né colgony más xpiina guidopynac gudxlio, [...] colguisuidy layibu guisobyibu guirá ni bisuidy lóoto. Né ¡colguibiʼ!, noʼya né lóoto guirá dzú dada dzú ma guidubylagaʼ gudxliogoxreʼ» (Mateo 28:19, 20).
Né último buelt ni bidopbu né xpiimbu goniʼbu ndeʼ: «Sacaʼto galnadip órni espíritu santo guidxin laidyto, né sacto testigos xtuni [...] dada lagary ni noʼ más sit ló gudxlio» (Hechos1:8). Né ór cú bibiguetbu guibá, né toib xcaay godudy né láani bunyni que ma diti labúu nabiʼyibu Jesús.
(Bireʼni ló Mateo capítulo 28, Marcos capítulo 16, Lucas capítulo 24, Juan capítulos 20 né 21 né 1 Corintios 15:5, 6.)
^ Sadzelo xidal profecías ni góc cumplir en Jesús ló Midid 14, Midid 15 né Midid 16 de follet reʼ, né ni sieed ló «apéndice Jesucristo, Mesías ni Dios goniʼ guieed» de libro ni laa, ¿Xí ni merpa rasuidy la Biblia?
