SAMPULONG aldaw pakasakat ni Jesus sa langit, mga 120 sa saiyang mga disipulo an nagtiripon sa sarong harong sa Jerusalem sa panahon kan Judiong Kapiestahan nin Pentecostes, kan 33 C.E. Bigla na sana, sarong ribok na siring sa hagobohob nin doros an nakapano sa harong. An mga disipulo milagrosong nagpoon na magtaram nin mga lenguahe na dai ninda aram. Ano an makakapagpaliwanag sa pambihirang mga pangyayaring ini? An Dios nagtao nin banal na espiritu sa mga disipulo.

Sa luwas, dakol an tawo huling may nag-abot na mga bisita hale sa dakol na lugar para sa kapiestahan. Nagngalas sinda nin labi-labi kan madangog an sainda mismong mga lenguahe na klarong itinataram kan mga disipulo ni Jesus. Sa pagpaliwanag kan nangyari, sinambit ni Pedro an hula ni propeta Joel na “ibububo” nin Dios an saiyang espiritu, na magtatao sa mga maako kaiyan nin balaog na makagibo nin milagro. (Joel 2:28, 29) Huli sa mapuersang pruebang ini nin banal na espiritu, nagin malinaw na may nangyaring mahalagang pagbabago: An pabor nin Dios ibinalyo hale sa Israel pasiring sa bago pa sanang establisaron na Kristianong kongregasyon. An mga gustong maglingkod sa Dios sa inaakong paagi kaipuhan ngonyan na magin parasunod ni Cristo.

Mientras tanto, naggrabe an pagtumang, asin an mga disipulo ibinilanggo kan mga kaiwal. Alagad kan banggi, binuksan kan anghel ni Jehova an mga pinto kan bilanggoan asin sinabihan an mga disipulo na magpadagos sa paghuhulit. Kan mag-aagahon na, iyan nanggad an ginibo ninda. Sinda naglaog sa templo asin nagpoon na magtokdo kan maogmang bareta manongod ki Jesus. An relihiosong mga nagtutumang sa sainda grabe an kaanggotan asin pinagbotan sinda na pumondo sa paghuhulit. An mga apostol daing takot na nagsimbag: “Dapat na kuyogon niamo an Dios bilang namamahala imbes na mga tawo.”​—Gibo 5:28, 29.

Naggrabe an pagpersegir. An nagkapirang Judio inakusaran si disipulo Esteban nin paglanghad asin ginapo sia sagkod na magadan. Sarong hoben na lalaki​—si Saulo nin Tarso—​an nagmasid asin nag-oyon sa paggadan na iyan. Dangan, sia nagduman sa Damasco tanganing arestaron an siisay man na nagsusunod ki Cristo. Mantang si Saulo naglalakaw sa tinampo, suminilyab sa palibot nia an liwanag gikan sa langit asin sarong tingog an nagsabi: “Saulo, Saulo, tadaw ta pinepersegir mo ako?” Huling nabuta dahel sa liwanag, si Saulo naghapot: “Siisay ka?” An tingog nagsimbag: “Ako si Jesus.”​—Gibo 9:3-5.

Pakalihis nin tolong aldaw, isinugo ni Jesus an disipulong si Ananias na ibalik an pagheling ni Saulo. Si Saulo binautismohan asin nagpoon na maghulit nin pusoan manongod ki Jesus. Namidbid si Saulo bilang si apostol Pablo asin nagin maigot na miembro kan Kristianong kongregasyon.

An mga disipulo ni Jesus nagpapahayag kan maogmang bareta kan Kahadean nin Dios sa mga Judio asin Samaritano sana. Sarong anghel an nagpaheling ngonyan ki Cornelio, sarong may takot sa Dios na opisyal kan hukbo nin Roma, asin nagsabi sa saiya na ipaapod si apostol Pedro. Kairiba an iba pa, si Pedro naghulit ki Cornelio asin sa kasararo nia sa harong. Mantang nagtataram si Pedro, an banal na espiritu nag-abot sa nagturubod na Hentil, asin ipinagboot kan apostol na bautismohan sinda sa ngaran ni Jesus. An dalan pasiring sa buhay na daing katapusan bukas na ngonyan para sa mga tawo kan gabos na nasyon. An kongregasyon andam na ngonyan na ihulit an maogmang bareta sa gabos na lugar.

​—Basado sa Gibo 1:1–11:21.