OHASÁVO 10 día Jesús oho hague yvágape, og̃uahẽ Pentecostés ára. Upérõ 120 disípulo rupi oñembyaty peteĩ ógape Jerusalénpe. Upeichaháguinte oiko peteĩ tyapu, haʼete voi oúva hiʼarikuéra torménta vai mbaʼe, ha umi disípulo oñepyrũ oñeʼẽ heta idiómape. Mbaʼéichapa oñeʼẽ hikuái koʼã idióma oikuaaʼỹvape? Ñandejára espíritu oguejy hiʼarikuéra.

Upérõ henyhẽte Jerusalénpe umi hénte oúva opa tetãgui ohasa hag̃ua upépe Pentecostés ára. Enterove omombaʼeterei ohechávo mbaʼéichapa umi disípulo oñemongetajoa umi héntendi iñeʼẽme. Apóstol Pedro opuʼã ha omombeʼu chupekuéra mbaʼépa upe oikovahína. Haʼe heʼi proféta Joel heʼíma hague voi Ñandejára omeʼẽtaha ijespíritu isiervokuérape ojapo hag̃ua heta milágro (Joel 2:​28, 29). Koʼã milágro ohechauka porã Ñandejára oĩha hendivekuéra ha omboykemaha tetã Israélpe. Upe ára guive umi oserviséva Ñandejárape oikevaʼerã pe kongregasiónpe.

Umi ndaijaʼéiva Cristo rehe oñepyrũ opersegi idisipulokuérape ha ogueraha chupekuéra préso. Péro upe pyharépe ou peteĩ ánhel opoi chuguikuéra osegi hag̃ua opredika. Ha koʼẽmba rire haʼekuéra oike pe témplope omombeʼu pe marandu porã. Umi rrelihión omoakãva ipochyeterei upévare ha heʼi chupekuéra anivéma hag̃ua opredika. Umi apóstol katu ndoguevíri ni michĩmi, ha ombohovái chupekuéra: ‘Ore oreñeʼẽrenduvaʼerã Ñandejárape kuimbaʼépe rangue’ (Hechos 5:​28, 29).

Umi ndaijaʼéiva hesekuéra iñañave rei ha koʼýte opersegi chupekuéra. Esteban rehe heʼi oñeʼẽ vaiha Ñandejárare ha ojuka chupe hikuái. Upérõ oĩ hendivekuéra Saulo de Tarso, ko kariaʼy ndaijaʼéi kristianokuérare. Upe rire haʼe osẽ oho Damáscope ojagarra hag̃ua umi Jesús remimboʼe oĩva upérupi. Og̃uahẽmbotávo ohesape hese yvágagui peteĩ tata rendyichagua ha opyta ndohechavéi. Upépe ohendu peteĩ heʼíva chupe: ‘Saulo, Saulo, mbaʼére piko chepersegi?’. Haʼe nontendéi mbaʼépa la oikóva ha oporandu: “Máva piko nde”. Ha ombohovái chupe: ‘Che hína Jesús’ (Hechos 9:​3-5).

Tres día haguépe Jesús omondo hendápe Ananíaspe, upe rire Saulo ohecha jey. Upépe haʼe ojevautisa ha kyreʼỹme oñepyrũ opredika. Upéi oiko chugui misionéro vale, ha oñehenói chupe apóstol Pablo.

Upe tiémpope ojepredika umi hudío ha Samariayguápente, neʼĩra ojepredika umi tetã ambueguápe. Péro upéi Ñandejára ombou hiʼánhel Cornelio rendápe, haʼe ningo peteĩ ofisiál oĩva Roma ehérsitope. Ko ánhel heʼi chupe ohenoiuka hag̃ua apóstol Pédrope. Cornelio ojapo upéva ha Pedro ou opredika chupe ha umi hogayguápe. Pedro oñeʼẽ aja oguejy hiʼarikuéra espíritu sánto. Upémarõ haʼe heʼi Cornelio ha hogayguakuérape ojevautisa hag̃ua Jesucristo rérape. Ha upe ára guive opaichagua yvypóra tahaʼe haʼéva tetãygua ikatúma ohupyty pe jeikove opaʼỹva. Upévare pe marandu porã ojepredikavaʼerã opa tetã rupi.

(Oñeguenohẽ Hechos 1:1–11:​21-gui.)