JIISUSIP qilaliarnerata kingorna ullut qulit qaangiuttut ajoqersugai 120-t missaanniittut illumi Jerusalemimiittumi juutit piinsisiornerata nalaani ukiumi 33-mi katersuupput. Tassanngaannaq perpaluup anorip siorsuppalunneratut nipillip illu ulikkaarpaa. Ajoqersukkat oqaatsit ilinniarsimanngisatik atorlugit tupinnartuliornikkut oqalulerput. Pisut eqqumiitsut tamakku qanoq nassuiarneqarsinnaappat? Ajoqersukkat Guutimit anersaamik illernartumik tunineqarsimapput.

Inuppassuit nunanit amerlasuuneersut piinsisioriartorlutik tikissimasut illup silataaniipput. Tupaallaqaat namminneq oqaatsitik atorlugit Jiisusip ajoqersugai oqaluttut tusaramikkik. Petrusip susoqarneranik nassuiaanermini pruffiitip Joelip Guutip anersaaminik ‘kuisiumaarneranik’ taassuminngalu pisut tupinnartuliorsinnaanngornissaannik siulittuutaa innersuussutigaa. (Joeli 3:1, 2) Anersaap illernartup sunniuteqarneranut uppernarsaammi kimittuumi tamatumani erseqqippoq allannguutaasumik pingaarutilimmik matuminnga pisoqartoq: Israelikkut Guutimit iluarisaajunnaarlutik ilagiit kristumiut pilersinneqaqqammersut iluarisaalerput. Guutip iluarisaanik kiffartorusuttut maanna Kristusimut ajoqersuganngortariaqarput.

Piffissap ingerlanerani akerlilersorneqarneq sakkortusivoq, ajoqersukkallu akeraasunit parnaarussaapput. Unnuakkulli Jehovap inngiliata parnaarussiviup isaaffii ammarpai ajoqersukkallu peqqullugit oqaluussinertik ingerlatiinnassagaat. Ullaanngortorlumi taamaaliorput. Naalaffimmut iserlutik Jiisusi pillugu nutaarsiassaq nuannersoq ilinniartitsissutigilerpaat. Upperisarsiornikkut akerlilersortaasa kamaqalutik taakku peqquaat oqaluussinertik unitsissagaat. Apustilit sapiillutik ima akipput: “Guuti inunnit naalattariaqarneruvoq.” — Apustilit Suliaat 5:28, 29.

Malersorneqarneq sakkortusivoq. Juutit ilaasa ajoqersugaq Stefanusi Guutimik mitaatiginnittutut unnerluutigaat ujaqqanillu milloorlugu toqullugu. Angut inuusuttoq — Saulusi Tarsusimioq — toqutsinermik tamatuminnga isiginnittuullunilu iluarinnippoq. Taava Damaskusiliarpoq Kristusip ajoqersugai tamaasa parnaarussaatinniarlugit. Aqqusinikkoortillunili qaamanermit qilammeersumit iluneqarpoq nipilu ima oqartoq tusarlugu: “Sauli, Sauli, sooq qinugaanga?” Saulusi qaamanermit tappingertinneqartoq ima aperivoq: “Kinaavit?” Nipi ima akivoq: “Jiisusiuvunga.” — Apustilit Suliaat 9:3-5.

Ullut pingasut qaangiuttut Jiisusip ajoqersugaq Ananiamik atilik aallartippaa Saulusi isigisaqaqqilersikkiartortillugu. Saulusi kuisippoq Jiisusilu pillugu nakimaalluni oqaluussilerluni. Saulusi apustilitut Paulusitut ilisimaneqalerpoq ilagiinnullu kristumiunut ilaalerluni aallussilluartoq.

Jiisusip ajoqersugaasa Guutip naalagaaffia pillugu nutaarsiassaq nuannersoq juutinuinnaq Samariamiunuinnarlu oqaluussissutigisimavaat. Maannali inngilip Corneliusi, Romamiut sakkutuuisa naalagaat Guutimik mianerinnittoq, saqqummerfigaa oqarfigalugulu Petrusi aatissagaa. Petrusi allanik ilaqarluni Corneliusimukarpoq, taannalu inoqutaalu oqaluussiffigai. Petrusi oqalutsillugu anersaaq illernartoq juutiunngitsunut uppertunut taakkununnga kuineqarpoq, apustililu peqqusivoq Jiisusip aqqani kuisissasut. Maanna inuit inuiannit tamaneersut naassaanngitsumik inuunissamut aqqutissiuunneqarput. Ilagiit sumi tamani nutaarsiassap nuannersup oqaluussissutiginissaanut piareerput.

— Tunngavigineqartut: Apustilit Suliaat 1:1–11:21.