ភាគ២២
ពួកសាវ័កផ្សព្វផ្សាយដោយចិត្ដអង់អាច
ក្រុមជំនុំនៃពួកគ្រិស្ដសាសនិកចម្រើនឡើងយ៉ាងឆាប់រហ័សទោះជាមានការបៀតបៀនក៏ដោយ
ដប់ថ្ងៃក្រោយពីលោកយេស៊ូឡើងទៅស្ថានសួគ៌ នោះមានអ្នកកាន់តាម១២០នាក់បានជួបជុំគ្នានៅក្នុងផ្ទះមួយនាក្រុងយេរូសាឡិមនៅពេលបុណ្យថ្ងៃទី៥០ ឆ្នាំ៣៣ គ.ស.។ ស្រាប់តែមានសូរសំឡេងដូចសន្ធឹកខ្យល់បក់យ៉ាងខ្លាំង ឮពេញផ្ទះនោះ។ ដោយអព្ភូតហេតុពួកអ្នកកាន់តាមចាប់ផ្ដើមនិយាយភាសាផ្សេងៗដែលគេមិនធ្លាប់ចេះ។ ហេតុអ្វីមានព្រឹត្ដិការណ៍ដ៏ចម្លែកទាំងនេះ? ព្រះបានឲ្យសកម្មពលបរិសុទ្ធដល់ពួកអ្នកកាន់តាម។
នៅខាងក្រៅមានមនុស្សមួយក្រុមធំ ពីព្រោះភ្ញៀវទាំងនេះមកពីស្រុកផ្សេងៗដើម្បីធ្វើបុណ្យថ្ងៃទី៥០។ ពួកគេកោតស្ងើចក្រៃលែង ដោយឮពួកអ្នកកាន់តាមលោកយេស៊ូនិយាយភាសារបស់ពួកគេបានយ៉ាងល្អ។ ពេត្រុសពន្យល់អ្វីដែលបានកើតឡើងដោយសំដៅទៅទំនាយរបស់យ៉ូអែលដែលថាព្រះ«នឹងចាត់»វិញ្ញាណឬសកម្មពលរបស់លោក ដែលនឹងផ្ដល់អំណោយឬសមត្ថភាពដ៏អស្ចារ្យដល់ពួកអ្នកដែលទទួលសកម្មពលនោះ។ (យ៉ូអែល ២:២៨, ២៩) ទីសំអាងជាក់ស្ដែងនេះពីសកម្មពលបរិសុទ្ធ ធ្វើឲ្យឃើញច្បាស់ថាមានការផ្លាស់ប្ដូរដ៏ធំមួយបានកើតឡើង ពោលគឺព្រះពេញចិត្ដនឹងក្រុមជំនុំនៃពួកគ្រិស្ដសាសនិកដែលទើបនឹងបង្កើតនេះ មិនមែនជនជាតិអ៊ីស្រាអែលទេ។ អ្នកដែលចង់បម្រើព្រះតាមរបៀបដែលលោកពេញចិត្ដ ឥឡូវត្រូវតែក្លាយទៅជាអ្នកកាន់តាមគ្រិស្ដ។
ដំណាលគ្នានោះ មានការប្រឆាំងកាន់តែខ្លាំងឡើង ហើយពួកសត្រូវចាប់ពួកអ្នកកាន់តាមដាក់គុក។ ប៉ុន្ដែនៅពេលយប់ ទេវតារបស់ព្រះយេហូវ៉ាបានបើកទ្វារគុក ហើយប្រាប់ពួកអ្នកកាន់តាមឲ្យបន្ដផ្សព្វផ្សាយ។ ព្រឹកឡើង ពួកគាត់បន្ដផ្សព្វផ្សាយមែន។ ពួកគាត់បានចូលវិហារ ហើយចាប់ផ្ដើមបង្រៀនអំពីដំណឹងល្អស្ដីអំពីលោកយេស៊ូ។ ពួកអ្នកប្រឆាំងខឹងខ្លាំងណាស់ ហើយបានបង្គាប់ពួកគាត់ឲ្យឈប់ផ្សព្វផ្សាយ។ ពួកសាវ័កតបឆ្លើយដោយចិត្ដអង់អាចថា៖ «យើងត្រូវស្តាប់បង្គាប់ព្រះជាអ្នកគ្រប់គ្រង ជាជាងមនុស្ស»។—សកម្មភាព ៥:២៨, ២៩
ការបៀតបៀនមានកាន់តែខ្លាំងឡើង។ ជនជាតិយូដាខ្លះបានចោទប្រកាន់ស្ទេផានជាអ្នកកាន់តាមថាបានប្រមាថព្រះ ហើយបានគប់ដុំថ្មសម្លាប់គាត់។ យុវជនម្នាក់ឈ្មោះសុលពីក្រុងតើសុសបានធ្វើជាសាក្សី ហើយពេញចិត្ដនឹងឃាតកម្មនោះ។ រួចមក គាត់ទៅក្រុងដាម៉ាស់ដើម្បីចាប់អ្នកណាដែលកាន់តាមគ្រិស្ដ។ កាលដែលសុលធ្វើដំណើរតាមផ្លូវ នោះស្រាប់តែមានពន្លឺពីលើមេឃចាំងជុំវិញគាត់ ហើយឮសំឡេងមួយបន្លឺមកថា៖ «សុល សុល ហេតុអ្វីអ្នកបៀតបៀនខ្ញុំ?»។ សុលបានខ្វាក់ភ្នែកដោយសារពន្លឺនេះ ហើយបានសួរថា៖ «តើលោកម្ចាស់ជាអ្នកណា?»។ សំឡេងនោះបន្លឺថា៖ «ខ្ញុំគឺយេស៊ូ»។—សកម្មភាព ៩:៣-៥
បីថ្ងៃក្រោយមក លោកយេស៊ូបានចាត់អ្នកកាន់តាមម្នាក់ឈ្មោះអាណានាសឲ្យទៅធ្វើឲ្យភ្នែកសុលមើលឃើញវិញ។ សុលបានទទួលការជ្រមុជទឹក ហើយចាប់ផ្ដើមផ្សព្វផ្សាយអំពីលោកយេស៊ូដោយចិត្ដក្លាហាន។ ក្រោយមក សុលបានត្រូវគេស្គាល់ថាជាសាវ័កប៉ូល ហើយបានក្លាយទៅជាសមាជិកម្នាក់ដែលមានចិត្ដខ្នះខ្នែងក្នុងក្រុមជំនុំនៃពួកគ្រិស្ដសាសនិក។
ពួកអ្នកកាន់តាមលោកយេស៊ូបានប្រកាសដំណឹងល្អអំពីរាជាណាចក្ររបស់ព្រះដល់ជនជាតិយូដានិងជនជាតិសាម៉ារីប៉ុណ្ណោះ។ ឥឡូវទេវតាមួយរូបលេចមកឲ្យមេទាហានជាតិរ៉ូមឈ្មោះកូនេលាសឃើញ។ កូនេលាសជាអ្នកគោរពកោតខ្លាចព្រះ។ ទេវតានោះប្រាប់គាត់ឲ្យចាត់គេទៅហៅសាវ័កពេត្រុស។ ដោយមានអ្នកឯទៀតទៅជាមួយ នោះពេត្រុសបានផ្សព្វផ្សាយដល់កូនេលាសនិងក្រុមគ្រួសាររបស់គាត់។ កាលដែលពេត្រុសកំពុងនិយាយ នោះសកម្មពលបរិសុទ្ធបានសណ្ឋិតលើពួកអ្នកជឿដែលជាជនជាតិដទៃ ហើយសាវ័កនេះបានបង្គាប់ពួកគេឲ្យទទួលការជ្រមុជទឹកក្នុងនាមលោកយេស៊ូ។ ឥឡូវ ផ្លូវដែលនាំទៅជីវិតដែលគ្មានទីបញ្ចប់បានត្រូវបើកឲ្យមនុស្សគ្រប់ជាតិសាសន៍។ ក្រុមជំនុំបានត្រៀមខ្លួនផ្សព្វផ្សាយដំណឹងល្អដល់ទីកន្លែងជិតឆ្ងាយ។
—មានមូលដ្ឋានលើសៀវភៅសកម្មភាព ១:១–១១:២១។