যীশুনা স্বর্গ কাখ্রবা মতুং নুমিৎ তারানি লৈরগা চাওরাক্না মাগী সেবোক ১২০মুক যেরূশালেমদা লৈবা য়ুম অমদা পুল্লম্মী। মতম অদু যিহূদিশিংগী কেলেন্দর মতুংইন্না ৩৩ শুবা খৃষ্টগী মতমদা পাংথোকখিবা পেন্টিকোষ্ট হায়না খংনবা যিহূদিশিংগী হরাও কুম্হৈ মতমনি। ইখং খংহৌদনা অকন্বা নুংশিৎ অমগুম লাকপা মখোল অমনা কা অদু পুংথল থল্লম্মী। অঙকপা মওং অমদা সেবোকশিংনা তোঙান তোঙানবা লোলদা ৱা ঙাংবা হৌরকখি। মতৌ করম্না অসিগুম্বা থবকসি থোকখিবনো? ঈশ্বরনা মহাক্কী সেবোকশিংদা থৱায় অশেংবা পীরম্বদগীনি।

য়ুম অদুগী মপান্দা খুল্লানবা ময়াম অমা ঙাইদুনা লৈরম্মী। মখোয় হরাও কুম্হৈ অদু য়াওবা লাক্লম্বনি। যীশুগী সেবোকশিংদুনা মখোয়গী মরোন ঙাংলম্বদুদা খুল্লানবশিংদু য়াম্না ঙক্লম্মী। পিতরনা মসি মতৌ করম্না ওইরম্লিবনো হায়বদু তাকখি। ঈশ্বরনা মসিগী অঙকপা খুদোলপোৎসি “হৈথগনি” হায়দুনা যোয়েলনা মাংজৌননা হায়দোক্লমখ্রবনি হায়দুনা মহাক্না হায়রম্মী। (যোয়েল ২:২৮, ২৯) থৱায় অশেংবগী শক্তি লৈরবা প্রমান অসিনা করিগুম্বা অচৌবা অহোংবা খরা লৈখ্রে হায়বা উৎলি। ইস্রায়েল মচাশিংদগী ঈশ্বরগী অয়াবদু মাংখ্রে অদুগা নৌনা শেম্লবা খৃষ্টিয়ান শীংলুপ্তা শিন্নখ্রে। ঈশ্বরবু সেবা তৌজনিংবশিংনা খৃষ্টগী তুংইনবা ওইগদবনি।

মরক অসিদা য়ৈখায় থিনগায়বা হেনগৎলম্মী। সেবোকশিং কৈশুমশঙদা থাজিল্লম্মী। যেহোবাগী স্বর্গ দুতনা অহিংদা থোঙ হাংদোকপিরবা মতুংদা মখোয়বু পাউ শন্দোক্নবা হায়রম্মী। মখোয়না লাইশংদা চৎতুনা যীশুগী মরমদা অফবা ৱা পাউ শন্দোক্লম্মী। মদুদা ধর্ম্মগী লুচিংবশিংনা শাওরম্মী অমসুং মখোয়বু পাউ শন্দোকপদু তোক্নবা হায়রম্মী। পাখোনচৎপশিংনা খুম্লম্মী: “মীশিংগী য়াথং ইনবদগী হেন্না ঐখোয়না ঈশ্বরগী য়াথং ইনবা তায়।”—পাখোনচৎপশিংগী থবক ৫:২৮, ২৯.

মীওৎ মীনৈ হেনগৎলক্লম্মী। যিহূদি খরনা স্তিফানবু ঈশ্বরদা মরাল লংশিল্লি হায়দুনা হাৎখি। তার্সস্তগী সোল কৌবা নহা অমনা মী হাৎপা অদু অয়াবা পীরম্মী। মহাক্না দমাস্কসতা চৎতুনা যীশুগী তুংইনবশিং ফানবা থিরম্মী। মহাক্না লম্বীদা চৎলিঙৈদা স্বর্গদগী মঙাল অমা লাক্লম্মী অদুগা খোন্জেল অমনা অসুম্না হায়রক্লম্মী: “সোল! সোল! নহাক্না ঐবু ওৎনৈরিবা করিগীনো?” সোল মমিৎ তাংলম্মী অমসুং মহাক্না হংলম্মী: “নহাক কনানো?” খোন্জেল অদুনা খুম্লক্লম্মী: “ঐদি . . . যীশুনি।”—পাখোনচৎপশিংগী থবক ৯:৩-৫.

নুমিৎ হুমনিগী মতুংদা যীশুনা সোলগী মমিৎ অদু ফহনবিনবা অনানীয়াবু থারম্মী। সোলনা বাপ্তিজম লৌরবা মতুংদা থৌনা লৈনা যীশুগী মরমদা পাউ শন্দোক্লম্মী। সোলবু পোল হায়না খংনরম্মী। মহাক খৃষ্টিয়ান শীংলুপকী য়াম্না থৱায় য়াওবা মীশক অমা ওইখি।

যীশুগী সেবোকশিংনা ঈশ্বরগী নিংথৌ লৈবাক্কী অফবা ৱা পাউ অদু যিহূদিশিং অমদি সমরিয়াশিংখক্তদা শন্দোক্লম্মী। কোর্নিলিয়াদা স্বর্গ দুত অমা লাক্লম্মী। মহাক ঈশ্বর কিজবা রোমগী লান্মীগী মকোক থোংবা ওইরম্মী। স্বর্গ দুত অদুনা পাখোনচৎপা পিতরবু কৌনবা হায়রম্মী। অতোপ্পা মীওইশিংগা লোইননা পিতরনা কোর্নিলিয়া অমদি মহাক্কী ইমুংদা পাউ শন্দোক্লম্মী। পিতরনা ৱা ঙাংলিঙৈদা যিহূদী নত্তবা জাতিশিং অদুগী মথক্তা ঈশ্বরগী থৱায় অশেংবা চংলক্লম্মী। পাখোনচৎপদুনা মখোয়বু যীশুগী মিংদা বাপ্তিজম লৌনবা খংহলম্মী। লোম্বা নাইদবা পুন্সি ফংননবগী খুদোংচাবা অদু হৌজিক্তি জাতি খুদিংমক্তা ফংজরে। খৃষ্টিয়ান শীংলুপ অদু হৌজিক্তি পাক শন্না অফবা ৱা পাউ শন্দোক্নবা শেম শারে।

​—পাখোনচৎপশিংগী থবক ১:১–১১:২১​দা য়ুম্ফম ওইবা।