SAMPLORAN agew kayari insegep nen Jesus ed tawen, manga 120 a babangatan to so nantitipon ed sakey ya abung ed Jerusalem nen panaon na Judion Piesta na Pentecostes, 33 C.E. Kabebekta et walay manungol a singa palasapas na dagem ed loob na abung. Mamilagron akapansalita iray babangatan na nanduruman lenguahe a datin agda amta. Anto kasi rason ed sarayan agawa? Inter na Dios so masanton espiritu to ed saray babangatan.

Diad paway et dakel so totoon sinmasabi a nanlapud nanduruman pasen parad piesta. Nikelawan ira sanen arengel day mismon lenguahe ra a sasalitaen na saray babangatan nen Jesus. Diad pangipapaliwawa nen Pedro ed no antoy agawa, binitla toy impasakbay nen propeta Joel ya ‘ikalbo’ na Dios so espiritu to, a satan so mangiter na mamilagro iran langkap ed saramay makaawat ed satan. (Joel 2:28, 29) Sayan mabiskeg ya ebidensia na masanton espiritu so angipalinew a walay importantin pananguman ya agawa: Inekal la na Dios so pabor to ed Israel tan inyalis to ed balo nin aporma a Kristianon kongregasyon. Kanian saramay malabay ya awaten na Dios so panaglingkor da et kaukolan a magmaliw a papatumbok nen Kristo.

Kaleganan na satan, linmoor so isusumpa, tan impriso na kakabusol iray babangatan. Pero legay labi, inlukas na anghel nen Jehova iray puerta na prisoan tan imbilin to ed saray babangatan ya ituloy day manpulong. Kanian diad kaimbuasan, ontan so ginawa ra. Linmoob ira ed templo tan ginapoan dan imbangat so maong a balita nipaakar ed si Jesus. Sinmanok iramay onsusumpa ed sikara tan ingganggan dan ontunda la ran manpulong. Balet, makpel ya inmebat iray apostol: “Nakaukolan ya unoren mi so Dios, nen saray totoo.”—Gawa 5:28, 29.

Linmoor so panamasegsegang. Inakusaan na pigaran Judio so disipulon si Esteban na agpanamagalang ed Dios tan tinutupak da anggad inatey. Sakey a kalangweran—si Saulo a taga Tarso—so akatasi tan inabuloyan to iman ya impamatey. Insan sikatoy amaarap ed Damasco pian erelen so siopaman a patumbok nen Kristo. Legan a walad dalan si Saulo, sakey a liwawa manlapud tawen so sinminag ed sikato tan inkuan na sakey a boses: “Saulo, Saulo, akin et uusilan mo ak?” Abulag si Saulo lapud satan a liwawa, tan intepet to: “Siopa ka, Katawan?” Inkuan na boses: “Siak si Jesus.”—Gawa 9:3-5.

Kalabas na taloy agew, angibaki si Jesus na babangatan a manngaran na Ananias pian ipawil so pakanengneng nen Saulo. Abautismoan si Saulo tan ginmapon makpel a nampulong nipaakar ed si Jesus. Kanian akabat si Saulo bilang apostol Pablo tan nagmaliw a maseet a membro na Kristianon kongregasyon.

Dati et ipupulong na saray babangatan nen Jesus so maong a balita na Panariay Dios ed saray Judio tan Samaritano labat. Balet natan sakey ya anghel so nampanengneng ed si Cornelio, a Romanon sundalon opisyal a walaay takot ed Dios, tan imbaga na anghel ya ipatawag toy apostol Pedro. Inibaan na arum si Pedro a pulongan si Cornelio tan saray membro na pamilya to. Legan a mansasalitay Pedro, niwala so masanton espiritu ed sarayan mananisian aliwan Judio, tan imbaga to ed sikaran manpabautismo ra diad ngaran nen Jesus. Kanian nilukas ed totoo ed amin a nasyon so dalan a mamaarap ed andi-anggaan bilay. Say kongregasyon so akaparaan lan mangipulong a malaknab ed maong a balita.

—Nibase ed Gawa 1:1–11:21.