GU̱WA̱ʼ mbiʼi nda̱wa̱á rí Jesús nitsima̱a̱ náa mekhuíí, índo̱ rí kúwi̱i̱n rúni ndxa̱a̱ bi̱ judíos rí egumbiʼyuu Pentecostés, tsiguʼ 33, mbá cientu i̱mba̱ muskiñíinʼ discípulos nigimbíin náa mbá guʼwá náa Jerusalén. Ikhú, niwan xóo mbá giñanʼ dí naxnúu gakhi̱i̱ wéñuʼ, ikhú discípulos nigi̱ʼdi̱i̱ nithi ajngáa dí nangua eniʼnuuʼ. Ndiéjunʼ la niguaʼníín xá. Rí Diúu̱ nixnún espíritu santo ndrígóo.

Náa xuajin rúʼko̱ kajthin mbiʼin xa̱bu̱ bi̱ niguwaʼ mixtiʼkhu xuajin mu muniriyaa mbá ndxa̱a̱. Xúgínʼ niguanún tsiángua índo̱ rí nidxawíín rí discípulos ndrígióo Jesús najmañun nuthi ajngáa ndrígu̱ún. Mu miʼthúún ndiéjunʼ nirígá, Pedro niʼni marmáʼáan a̱jkiu̱ún rí gaʼyee Joel niʼtiriyaa rí Diúu̱ maxnún espíritu xa̱bi̱i̱, ma̱ngaa niʼniún muni rí nimbáa tsejmañu maʼni (Joel 2:28, 29). Milagro rígi̱ nisngájma kaʼwu rí Diúu̱ niʼni tsajkurámáʼ congregación cristiana, raʼkháa náa xuajin Israel. Mbiʼi rúʼko̱ nigi̱ʼdu̱u̱ rí ndiyóóʼ rí xúgínʼ bi̱ gaʼnduun mani̱ndxu̱ún xa̱bi̱i̱ Diúu̱ gíʼmaa dí mani̱ndxu̱ún cristiano.

Mú, xa̱bu̱ bi̱ guaʼdá sia̱nʼ náa Cristo ndiñíinʼ mu maxtu̱gui̱i̱n discípulos ndrígio̱o̱. Nijkha̱nú mbóo mbiʼi rí nixudiinʼ tikhuin náa guʼwáejua̱nʼ, mú mbruʼun rúʼko̱, ni̱ʼkha̱ mbáa ángel gáʼnikáwíín ma̱ngaa niʼthúún rí mutaraʼa ma xúʼko̱. Índo̱ niguajtsi, nitu̱ʼu̱u̱n náa guʼwóo Jeobá nigi̱ʼdi̱i̱ nithi ga̱jma̱a̱ numuu Jesús. Ra̱ʼkhá tháán nikiʼniin wéñuʼ xa̱bu̱ ede̱ bi̱ ñajúúnʼ religioso ma̱ngoo nithun rí muniñaʼ rutaraʼa. Mú apóstoles asndu gakhi̱i̱ a̱jkiu̱ún niriʼña̱a̱: «Pu-ndaʼyo ri manimbaʼxoʼ-juyaxoʼ ri naʼtan Dios gini, xo ri nuthan xabo» (Hechos 5:28, 29, AMM).

Táguanúu aʼkhuíí dí nikhiʼniin. Tikhun xa̱bu̱ judíos ninitsu̱di̱i̱ discípulo Esteban, mu niʼthí rí xkawiiʼ náa inuu Diúu̱ ikhú nigi̱ʼdu̱u̱ nixnáá ga̱jma̱a̱ itsí. Mbáa dxáma bi̱ mbiʼyuu Saulo de Tarso bi̱ niguiyuʼ kaʼñún cristiano, ikhaa ndiʼyoo xú nixiya̱a̱ Esteban. Nda̱wa̱á rí nirígá rígi̱, nijkha̱ náa Damasco mu maguguin xúgínʼ xa̱bi̱i̱ Jesús bi̱ gaxkamin makudiinʼ guʼwá. Mú índo̱ e̱jkha̱ náa ka̱mba̱a̱ mbá aguʼ nijka̱tiguíí mekhuíí niʼni rí na xayexi. Ikhú niʼdxun aʼwá rí niʼthí: «Saulo, Saulo, narijngo itaxkriñu [o etraxkoʼ]-roʼ». Asndu nangua eʼyoo káʼnii erígá, niraxi̱: «Tsa ñajuanʼ-roʼ». Aʼwá niriʼña̱a̱: «Ikun ñajunʼ Jesús» (Hechos 9:3-5, AMM).

Ajtsú mbiʼi nda̱wa̱á, Jesús nikuʼmaa mbáa discípulo bi̱ mbiʼyuu Ananías mu maʼni mayaxi mbu̱júu̱. Saulo nijngúun iyáaʼ ikhú nigíʼdu̱u̱ niʼtáraʼa ga̱jma̱a̱ gagi. Nda̱wa̱á nijkha̱nú nijmaʼniiʼ xóo apóstol Pablo, mbáa cristiano bi̱ niʼtáraʼa mbá xojin ga̱jma̱a̱ i̱mba̱, ikhaa bugi nini̱ndxu̱u̱ misionero.

Nákha ginii, bi̱ discípulos i̱ndó bi̱ judíos ga̱jma̱a̱ samaritanos etun ga̱jma̱a̱ numuu Reino ndrígóo Diúu̱. Mú mbóo mbiʼi, mbáa ángel ni̱ʼkha̱ náa Cornelio mbáa xa̱bu̱ bi̱ nañajunʼ náa ejército romano bi̱ naʼnimbo̱o̱ kaʼyoo Diúu̱ gajkhuwin, ikhaa nindxaʼwóo apóstol Pedro. Ikhú Pedro nijkha̱nú gajmíi̱n eʼwíínʼ discípulos ma̱ngaa niʼthúu̱n Ajngáa rawunʼ Diúu̱ Xa̱bu̱ Ñajunʼ bugi ga̱jma̱a̱ bi̱ kúwi̱i̱n náa guʼwóo. Índo̱ apóstol xtáa raʼthúún, núkhu má ikhú nindrigú espíritu santo, Pedro niʼtáñajunʼ rí majngún iyáaʼ ga̱jma̱a̱ nambiʼyuu Jesús. Mbiʼi rúʼko̱ asndu xúgi̱, asndu xú káʼnííʼ xa̱bu̱ bi̱ kúwi̱i̱n mixtiʼkhu xuajin ma̱ndoo makuwíín kámuu mbiʼi. Ajngáa rí májánʼ miʼtáraʼa mbá xúgíʼ numbaaʼ.

(Na̱ʼkha̱ náa Hechos 1:1–11:21.)