ENDZHAKU ka masiku ya khume Yesu a tlhandlukele etilweni, vadyondzisiwa va yena va kwalomu ka 120 a va hlengeletane endlwini eYerusalema hi nkarhi wa Nkhuvo wa Vayuda wa Pentekosta hi 33 C.E. Hi xitshuketa, pongo leri fanaka ni ra moya ri tate yindlu. Hi singita vadyondzisiwa va sungule ku vulavula hi tindzimi leti a va nga ti tivi. I yini lexi vangeke leswaku ku endleka swilo leswi nga tolovelekangiki? Xikwembu a xi nyike vadyondzisiwa moya lowo kwetsima.

Ehandle ka yindlu yoleyo a ku tele vaendzi lava a va huma etindhawini to hambana-hambana leswaku va ta tlangela nkhuvo wolowo. Va hlamarile loko va twa vadyondzisiwa va Yesu va ti vulavula kahle tindzimi ta vona. Loko Petro a hlamusela leswi humeleleke, u vulavule hi vuprofeta bya muprofeta Yuwele bya leswaku Xikwembu a xi ta “chululela” moya wa xona, lowu a wu ta nyika lava nga ta wu amukela tinyiko to endla masingita. (Yuwele 2:28, 29) Vumbhoni lebyi bya matimba bya moya lowo kwetsima byi swi veke erivaleni leswaku a ku ri ni ku cinca lokukulu: Xikwembu a xi nga ha tirhisani ni Vaisrayele kambe se a xi amukela vandlha ra Vukreste leri a ra ha ku simekiwa. Lava a va lava ku tirhela Xikwembu hi ndlela leyi amukelekaka a va fanele va va valandzeri va Kreste.

Hi nkarhi wolowo, nxaniso wu tinyike matimba naswona valala va pfalele vadyondzisiwa ekhotsweni. Kambe nivusiku, ntsumi ya Yehovha yi pfule tinyangwa ta khotso ivi yi byela vadyondzisiwa leswaku va ya emahlweni va ya chumayela. Loko ri xa, va ye emahlweni va chumayela. Va nghene etempeleni kutani va sungula ku dyondzisa mahungu lamanene malunghana na Yesu. Vakaneti va vona va vukhongeri a va hlundzuke swinene hiloko va va lerisa ku tshika ku chumayela. Vaapostola va hlamule hi xivindzi va ku: “Hi fanele ku yingisa Xikwembu tanihi mufumi ku tlula vanhu.”—Mintirho 5:28, 29.

Nxaniso wu tinyike matimba. Vayuda van’wana va hehle mudyondzisiwa Stefano va vula leswaku wa sandza hiloko va n’wi khandla hi maribye kukondza a fa. Jaha rin’wana leri vuriwaka Sawulo wa le Tarso a ri hlalerile naswona a ri ku seketela ku dlayiwa ka yena. Endzhaku ka sweswo ri ye eDamaska ri ya khoma un’wana ni un’wana loyi a a landzela Kreste. Loko Sawulo a ha ri endleleni, ku vonakala loku humaka etilweni loku tlhavaka ku n’wi rhendzerile hiloko rito ri vulavula na yena ri ku: “Sawulo, Sawulo, u ndzi xanisela yini?” Leswi ku vonakala koloko a ku n’wi endle a nga ha voni, Sawulo u vutisile a ku: “Hi wena mani?” Rito ri hlamurile ri ku: “Hi mina Yesu.”—Mintirho 9:3-5.

Endzhaku ka masiku manharhu, Yesu u rhumele mudyondzisiwa Ananiya leswaku a ya pfula mahlo ya Sawulo. Sawulo u khuvuriwile kutani a sungula ku chumayela hi xivindzi malunghana na Yesu. Sawulo u tiviwe tanihi muapostola Pawulo naswona u ve xirho lexi hisekaka xa vandlha ra Vukreste.

Vadyondzisiwa va Yesu a va chumayela mahungu lamanene ya Mfumo wa Xikwembu eka Vayuda ni le ka Vasamariya ntsena. Ntsumi yi humelele eka Korneliyo, ndhuna ya vuthu ya Murhoma leyi a yi chava Xikwembu, yi n’wi byela leswaku a rhuma vanhu va ya vitana muapostola Petro. Petro u fambe ni vanhu van’wana va fika va chumayela Korneliyo swin’we ni ndyangu wa yena. Loko Petro a ha vulavula, vapfumeri volavo va Matiko va amukele moya lowo kwetsima, hiloko muapostola yoloye a lerisa leswaku va khuvuriwa hi vito ra Yesu. Ndlela yo ya evuton’wini lebyi nga heriki se a yi pfuleriwe vanhu va matiko hinkwawo. Vandlha a ri lunghekele ku chumayela mahungu lamanene etindhawini ta le kule.

—Xi sekeriwe eka Mintirho 1:1–11:21.