OMBUSA jate̱le̱ lao, Paulo a ta a bīse̱ myango ma bwam ma Janea la Loba na bokenju, nika e bola ná, mo̱ ńena nu ta nu te̱nge̱ne̱ bato, a kusa jate̱nge̱ne̱ le ngińa. Ńamuloloma a ta āla o malo̱ndo̱ jita, a dangwa o mindi mipo̱ti esibe̱ mo̱ wo̱lo̱, o camane̱ myango ma bwam ma Janea mena mi me̱nde̱ londise̱ mwano ma Loba ma bebayedi ońol’a mbel’a moto.

O lo̱ndo̱ lao laboso o Listra, Paulo a bo̱lise̱ moto nu yabane̱ m’boko. Mamuti ma botea te̱ musea ná Paulo na Barnabas mwenj’ao ńa lo̱ndo̱ be nde maloba. E ta babo̱ babāne̱ ndutu o jeka ba bato ná ba si bola babo̱ mabea. Nde, basingedi ba Paulo ba ta ba tute̱le̱ mi milemlem ma mamuti o jangwa Paulo madale, ombusa póndá ba dia mo̱ wa na jo̱nge̱le̱ ná a wedi. Paulo ongi a timba o mu mundi o bola bókwedi ngińa tongwea na byala be membisane̱.

Kriste̱n iwo̱ ya bonayuda i ta i sue̱le̱ ná badúbedi bena ba titi Bonayuda ba ta bángame̱ne̱ bupe̱ Mbend’a Mose. Na Paulo ondane̱ mu muedi o Yerusale̱m o baise̱ bamuloloma na batudu. Ombusa babo̱ wase̱le̱ Betiledi ná lo̱pe̱lo̱pe̱ na jongwane̱ la bediedi ba edi e sangi a Loba pe̱, na babo̱ batilea myemba, bōme̱le̱ babo̱ ná bīye jowē̱ la losango, dá la maya, ńama i tim na musonje. Yinka myeka me nde “mambo mena ma titi ná mesabe̱le̱,” nde jombwea la mi myeka di si ma baise̱ bupe̱ la Mbend’a Mose.​—Bebolo 15:28, 29.

O lo̱ndo̱ lao di londe̱ mabā, Paulo a ta a pe̱pe̱le̱ bato ba Berea mundi mu bian we̱nge̱ ná Grikia. Bonayuda bena ba ta o mu mundi, ba ta ba kasa eyala na makwasi, ba wase̱le̱ Betiledi o jemba belēdi ba Paulo. Báte̱nge̱ne̱ mo̱ ba ta ba ńakisane̱ pe̱te̱nge̱ mo̱ o busa o mundi, nin ngedi wala o Aten. Paulo a bola ekwali a ngińa oboso ba babiedi ba kalati ba Aten, yena ye nde patan a bia la po̱so̱ byala, ye̱ne̱ na bia l’ekwali.

Ombusa lo̱ndo̱ lao di londe̱ malalo, Paulo a ta āla o Yerusale̱m. Póndá alono̱ o pe̱pe̱le̱ tempe̱l ńe oten, Baju bō̱ ba botea eto̱ise̱ ende̱ne̱ o pula bwa mo̱. Sonja ya Roma yeka nika, na babo̱ ba kaise̱ Paulo. Ka mot’a Roma, a timba kaye̱ mo̱me̱ne̱ oboso ba Felix, Gobin’a Roma. Baju ba si we̱li bola mboṅ a njo̱m ba tano̱ ba numa Paulo. O jeka ná Festo, gobin’a Roma nipe̱pe̱, e si bake̱ mo̱ o mā ma Baju, Paulo a kwala ná: “Na mapula nde ka oboso ba kaisa.” Festo ālabe̱ ná: “O me̱nde̱ so̱ wala oboso ba kaisa.”​—Bebolo 25:11, 12.

Ba ta bālane̱ Paulo na bo̱lo̱ o Italia o te̱me̱ o muka. O di lo̱ndo̱ bo̱lo̱ bwinda na babo̱ ba be̱ mińakisan o tombise̱ epupa o eyondi a Kreta. Póndá ba tunge̱no̱ o Roma, a jai mbu mibā o bolongi ba re̱nt. To̱ ná a tano̱ o was’a betatedi ba sonja, ńamuloloma ńa ko̱di a tiki nde o te̱ye̱ bato be̱se̱ bena ba ta bape̱pe̱le̱ mo̱ dikalo jombwea Janea la Loba.

​—Nika e se̱medi o Bebolo 11:22–28:31.