TÁ SA̱ ni̱ nduu Pablo iin na̱ ndíko̱ Cristó, jaá kía̱n ni̱ ndi̱ʼi ndiva̱ʼo ini ra ni̱ xika̱nuu ra ni̱ si̱ ja̱náʼa̱ ra̱ saʼa̱ Gobiernó Ndio̱s. Jo viti kía̱n mií vá rá kúú ta̱ kasáʼá na̱yivi kee nda̱va̱ʼa na xíʼín. Ta nuu̱ kuaʼa̱ ñuu xíká ni̱ saʼa̱n apóstol yóʼo, já ni̱ kaʼa̱n ra̱ saʼa̱ Gobiernó ña̱ kachúun Ndio̱s já kee si ña̱ nakandoyi va̱ʼa tuku na̱yivi tátu̱ʼun ni̱ kuni̱ si nda̱ míí saʼa̱ ñuyíví yóʼo.

Tá mínu̱ú ni̱ saʼa̱n Pabló ni̱ ja̱náʼa̱ ra̱ sa̱ʼá Tu̱ʼun Ndio̱s, jaá ni̱ ya̱ʼa ra ñuu Listrá, ta yóʼo ni̱ ja̱ndúva̱ʼa ra iin ta̱ ko̱ kuú kaka nda̱ ki̱ví ni̱ kaku ra. Ndijaá na̱yivi kúaʼa̱ na̱ ni̱ xini ña̱yóʼo ni̱ ka̱sáʼá ná káyuʼú ná ña̱, ndio̱s va kúú Pabló xíʼín Bernabé. Ta iʼvi̱ ndiva̱ʼo já ni̱ ka̱ndeé na̱yóʼo ni̱ chi̱tivi na na̱yivi íkáa já ko̱ ní joko̱ ná ña̱ʼa nuu̱ ná. Jo chááka̱ ni chínuu̱ jaá kía̱n mií tuku va na̱yivi yóʼo ni̱ kuun na yuu̱ sata̱ Pabló, jáchi̱ ni̱ ja̱káʼa̱n ñaʼá na̱ xiní iʼvi̱ ra̱. Ta va̱árá si̱ ni̱ siʼi̱ va Pabló yóʼo ni̱ kaʼán ná, jo ko̱ ní siʼi̱ taʼon na̱ apóstol yóʼo, ta chááka̱ ni chínuu̱, ni̱ nandióko̱o tuku va Pabló ni̱ na̱ki̱ʼa ra to̱ndeé iní nu̱ú na̱ ndíko̱ Jesús na̱ ndóyi ñuu íkáa.

Ta java na̱ ñuu Judá na̱ ndíko̱ Jesús, ni̱ kaʼa̱n na̱ ña̱ míía̱n ndúsa̱ kánian kundiko̱ na̱ kándísa Jesús na̱ ko̱ kúú na̱ ñuu Judá java chuun saʼndá Ndio̱s va̱si nuu̱ ley ni̱ si̱ʼa si nuu̱ Moisés. Ta ni̱ saʼa̱n Pabló nu̱ú na̱ ni̱ xika tuun xíʼín Jesús xíʼín na̱ sáʼno ndóyi Jerusalén, já ni̱ kee yíko̱ na̱ tu̱ndóʼó yóʼo. Ta tá ni̱ ndiʼi ni̱ kaʼvi va̱ʼa na̱yóʼo Tu̱ʼun Ndio̱s ta ni̱ xika̱ na̱ ndée̱ ii̱ sí, jaá kía̱n ni̱ taa na̱yóʼo iin tutu ni̱ chi̱ndaʼá ná ni̱ saʼa̱n nuu̱ ndijaá na̱ kuendá Jesús, ta ni̱ saʼnda na chuun ña̱ ko̱ kánian keekáʼno na yoko̱, ni ko̱ kánian kaxí ná nii̱, ni ko̱ kánian kaxí ná ku̱ñu kirí ko̱ ní xita̱ nii̱, ta ni ko̱ kánian kee na kua̱chi xíʼín na̱ ko̱ kúú ñajiʼí na á yíi̱ ná. Ta ndijaá ña̱yóʼo kúú “ña̱ [ko̱] kánian kee ndó”, jo ko̱ kúni̱a̱n kachian ña̱ kánian kundiko̱ na̱ ley ni̱ si̱ʼa Ndio̱s nuu̱ Moisés (Hechos 15:28, 29).

Taʼndá kúú uvi̱ ni̱ saʼa̱n Pabló ni̱ ja̱náʼa̱ ra̱ sa̱ʼá Tu̱ʼun Ndio̱s, jaá ni̱ saʼa̱n ra̱ ñuu Berea, ña̱ kúú ñuu Grecia kivi̱ víti. Ta ndinuʼu iní na̱ ñuu Judá na̱ ndóyi nuu̱ ñuu íkáa ni̱ na̱tiin va̱ʼa na tu̱ʼun ña̱ ni̱ sinajo̱ʼo na, ta ndin kivi̱ ni̱ si̱ kaʼvi na Tutu Ii̱ já ni̱ si̱ si̱nde̱ʼé ná á ña̱ ndaa̱ ndisa kía̱n ni̱ si̱ ja̱náʼa̱ Pabló nuu̱ ná. Ta chááka̱ ni chínuu̱, jaá kía̱n tuku ni̱ kanian ni̱ xino Pabló nu̱ú na̱ xiní iʼvi̱ ñaʼá. Jaá ni̱ saʼa̱n ra̱ nda̱ ñuu Atenas, ta yóʼo kúú nu̱ú ni̱ kaʼa̱n ndojó rá nu̱ú na̱ ti̱ʼa tutu, ta va̱ʼa ndiva̱ʼo ni̱ kaʼa̱n Pabló yóʼo xíʼín na̱ ñuu íkáa, ta ko̱ ní kaʼa̱n nda̱va̱ʼa ra xíʼín ná.

Tá ni̱ ndiʼi ña̱ ni̱ saʼa̱n Pabló taʼndá kúú uni̱ ni̱ ja̱náʼa̱ ra̱ sa̱ʼá Tu̱ʼun Ndio̱s, jaá ni̱ kiʼin ra kuaʼa̱n ra̱ ñuu Jerusalén. Ta tá ni̱ saʼa̱n ra̱ veʼe nu̱ú kéekáʼno na Ndio̱s, jaá ni̱ na̱kitáʼan kuaʼa̱ na̱yivi kuaʼa̱n na̱ kaʼní ná ra̱. Jo ni̱ chi̱ndeé ñaʼá java ta̱ soldadó ñuu Romá, ta néʼe na ra̱ kuaʼa̱n ra̱ já ndakatu̱ʼún ná ra̱. Jo ni̱ si̱ʼa na íchi̱ ña̱ ni̱ saʼa̱n ra̱ nu̱ú ta̱ néʼe chuun káʼno naní Félix, sa̱ʼá ña̱ kúú rá iin ta̱ ñuu Romá. Ta ko̱ ní kúu mií vá naʼa̱ na̱ ñuu Judá ña̱, ña̱ ndaa̱ ndisa kía̱n ni̱ si̱ káʼa̱n kua̱chi na saʼa̱ Pabló. Ta va̱árá jaá, si̱ió va ini inga̱ ta̱ néʼe chuun naní Festo na̱ki̱ʼa ra Pabló nuu̱ ndáʼa̱ na̱ ñuu Judá. Ta sa̱ʼá ña̱yóʼo ni̱ xika̱ Pabló ña̱ ya̱ʼa ra kuʼu̱n ra̱ nuu̱ César, inga̱ ta̱ néʼe chuun káʼno chááka̱, jaá ni̱ kachi Festo: “Tandaʼí yo̱ʼó koʼo̱n noo̱ rá” (Hechos 25:11, 12).

Ta néʼe na Pabló kuaʼa̱n na̱ ñuu Italia já kee yíko̱ na̱ saʼa̱ rá. Jo ni̱ ke̱ta kaʼni va varcó nu̱ú kuaʼa̱n ra̱ ini ta̱ñuʼu̱, ta ni̱ kanian ni̱ ya̱ʼa ra yoo̱ víxi nuu̱ yúku̱ Malta ña̱ íin ini ta̱ñuʼu̱. Ta tá ni̱ kandeé rá ni̱ saa̱ ra̱ ñuu Romá, uvi̱ kuia̱ ni̱ chiya̱ʼvi ndojó rá veʼe ni̱ si̱io ra. Ta va̱árá ni̱ si̱ndoyi ta̱ soldadó ni̱ si̱ndaa ra Pabló veʼe nu̱ú ni̱ si̱io ra, jo ni iin kivi̱ ko̱ ní ndi̱ko ini ra, jaá ni̱ si̱ ja̱náʼa̱ va ra sa̱ʼá Tu̱ʼun Ndio̱s nu̱ú na̱ ni̱ si̱sáʼa̱n ni̱ si̱ xito niʼni ñaʼá.

(Ña̱yóʼo va̱sian nuu̱ tutu Hechos 11:22–28:31.)