JE Pablo ñaki kao kjoatsjoa kitsoyason tʼatsʼe je Rey xi kiskoejin Niná kʼoa nga kʼoakisʼin tosa jé nʼio kitjenngikengá chjota. Je Pablo nʼio kisixále Niná kʼoa kjin kikakóyason tʼatsʼe je Rey xi kʼoasʼin jmeni xi tjínndajinle Niná xi kao chjotasonʼnde.

Kʼianga títjon kitjo je Pablo nga kjin kitsoyason, jaʼa ya Listra kʼoa jngo chjota kisindaya xi chjiʼngé kji saʼnda nga kitsin. Je chjotankjín xi tsabe tsakʼéjta kʼoa kʼoakitso nga niná je Pablo kao Bernabé. Toʼya koan tsakʼéchjoale nga tsín kitsjoatʼale je cho̱ xi kichokao. Tonga je kontrale Pablo tsakinyáʼa chjota kʼoa chjotankjín jebi la̱jao̱ tsakinyándone Pablo. Ninga kisikʼien koanle alikuini kʼien. Xijekoanni, je Pablo jaʼasʼen ijngokʼa ya Listra nga kitsjoanganʼiole je chjotale Cristo.

Nga koanskanni, tjínkʼa je chjotale Cristo xi kʼoakitso nga je chjotale Cristo xi li judíojin tjínnele sitjoson kʼa je Kjoatéxomale Moisés. Kʼianga sʼe̱ndajin kjoa jebi, je Pablo ya kinrʼoe je pastro kʼoa kao xi chjotajchínga sʼin tjío ya Jerusalén. Kʼianga je nda kiskotʼayajin je Énle Niná chjota jebi, kʼoa kisijéle nganʼiotsjele, kʼiaa kiskile xo̱n je jtín xi tjío nga kʼia kʼoa kʼoakitsole nga tsín xkóson katabʼétsʼoale, nga tsín njín katakjine, nga tsín yaole cho̱ xi tochjoʼndósin katakjine kʼoa nga tsín kjoachajngi katasʼín. Kʼoakitsole nga “tojé jebi xi nʼio machjén”, xi tsonile, nga likui timachjénni nga kui koaitjenngi Kjoatéxomale Moisés (Hechos 15:28, 29).

Xi koan jao kʼani nga kjin kitsoyason je Pablo, jaʼa ya Berea. ʼNde jña kʼoatsakʼin yaa tíjnajin jñani Grecia ʼmi ndʼaibi. Je chjota judío xi ya tjín koankjainle je én xi tsakakóya Pablo kʼoa nyaon nyaon kiskotʼajin je Xo̱nle Niná kʼianga skoe̱ tsa kʼoatjín jme xi tíʼmiyale. Xijekoan, je Pablo titʼaxin tsakangangáni xi totʼatsʼe chjota kontrale. Saʼnda Atenas ki, jñani jngo jtín chjotachjine kinchjayajinle. Je Pablo nʼio nda kinchja kʼoa alikui toxkia tsakjákao chjota.

Kʼianga je jetʼale xi koanni jan kʼa nga kjin kikakóyason, je Pablo ya ki Jerusalén. Kʼianga ki ya yo̱ngo̱, jngo jtín mani chjota xi mele kisikʼien. Tonga je sondado romano kjoan tsakʼéchjoale kʼoa kikao Pablo nga sijtsoʼa. Makjoanni nga chjota romano koan je Pablo, kitjoʼndele nga kinchjantjai yaole ngixko̱n chjotaxá Félix. Je chjota judío likʼia koanle tsakakó tsa kʼoatjín jme jée xi tsakáne je Pablo. Ninga kʼoalani, je xi tsakʼejnayangajaole Félix, xi Festo tsakʼin, mele nga ya tsjoátʼale chjota judío. Tonga nga tsín kʼoakoa̱ntʼain, je Pablo i̱ kitso: “Sijénía nganʼiona tʼatsʼe César”. Kʼoa je Festo kʼoakitso nga ya sikaséntʼale je César (Hechos 25:11, 12).

Je Pablo jngo chitso kinikʼéjnaya nga kinikasén ya Italia, nga yaa Roma sʼe̱ndajin kjoale. Tonga chitso jebi koanxkoaa ya jinndáchikon kʼoa Pablo yaa tsakʼejna jngo ʼnde xi Malta ʼmi xi ya tíjnajin ndáchikon kʼianga cha̱nnyʼán. Kʼianga je kicho ya Roma, jao nó kinikʼéjnayanʼio jngo ndʼia xi tomachjíntjai. Ningalani tíjnanʼio nikʼiajinla kisicha je kjoatsjoa xi kisʼele kʼoa tosi tonda kitsoyale tʼatsʼe je Rey xi kiskoejin Niná ngatsʼi chjota xi kichosíxatʼa.

(Yaa yʼangini Hechos 11:22–28:31.)