PAL kristian takan taim, Gâd Kingka lâka ba smalki kan. Sakuna nanara witin ra nina bliki rausauhkaia kan. Naha apastilka ba plis laihura wan Gâd Kingka lâka smalkaia. Naha bâk Gâd upla nani dukiara dîa luki ba daukbia.

Pal misan baku Listra tawanka ra pas trip wan ba ra, waitna skahwa kum ra rakan. Upla nani baha kaikan taim, win Pal bara ai pânika Bernabé gâd nani kan. Sakuna witin nani ba alki takaskan sakripais nani daukbia apia dukiara. Baha wina sim uplika nani Pal waihla nani ba bîla walan bara witin ra walpa ni sabi ikra luan. Witin nani ba lukan Pal ba pruan kan, sakuna witin ba kli ai mina ra bûi swakwi takan. Baha wina kli tawan ra dimi disaipil nani ra maisa nihkan.

Piua luan ningkara, Ju kristian kum kum ba win kristian apia uplika nani ba Moses Lâka nani alki daukaia kan. Naha blahwanka wapnika mangkaia dukiara, Pal ba Jerusalem ra kangrigisan almukka bara apastil wala nani ra wan. Ulbanka nani ba laki kaikan bara spirit holikira hilpka wal kangrigisan nani ra ulbi adar yaban aidul lâka ba wina sait ra kaia, tala apia kaka daiwan wîna nani tala bri kaka, piaia apia win. Baku sin rug lâka ba daukaia apia win. Naha dukia nani ba ‘kupia kraukanka nani baman’ kan, sakuna tânka apia kan Moses Lâka ba alki daukaia (Apastil Nani Sturka 15:28, 29).

Pal ba misan warkka wala ba dauki kan taim, Berea tawanka ra wan. Naha pliska ba Grecia kuntrika ra sa. Ju uplika nani bahara iwi kan ba smalkanka liliakira walan. Sakuna Ulbanka Holikira nani ra tânka pliki kan naha ba rait kan sapa. Baha wina, Pal kli ai waihla nani wina plapaia kan. Witin Atenas tawanka ra wan. Bahara upla sinskira nani mawanra aisanka painkira kum yaban.

Pal ba misan warkka yumhpa daukan taim, Jerusalem ra wan. Tempel ra diman taim, upla kwâra tara kum mita witin ra ikaia munan. Sakuna, Rom suldawika nani ba swaki sakan bara Pal ra brih wan diara makabi walaia dukiara. Pal ba Rom uplika kum kan ba mita, wihta tara Félix mawanra aisaia adar yaban. Ju uplika nani ba Pal dukiara dîa aisi kan rait sapa sip marikras kan. Sakuna Festo —naha ba Félix ningkara wihta baku aimakan— wilin kan Pal ba ai waihla nani mihta ra mangkaia. Pal ai rayaka swaki sakaia dukiara makaban Sisar wal aisaia. Baha mita Festo mita win: ‘Rom kingka ra waia sma’ (Apastil Nani Sturka 25:11, 12).

Pal ra Rom tawanka ra lâka daukan. Baha mita, witin duri tara kum ra Italia kuntrika ra wan, sakuna dwarka ba rungwan bara lî piua lubia kî kum ra Malta nina mâki ba ra takaskan. Rom tawanka ra wan taim, utla kum rent munan bara mani wâl bahara iwan. Suldawa nani mita main kaiki kan, sakuna Pal ba takaskraskira smalki kan bara ya ai watla ra wi kan ba King lâka dukiara smalkan.

(Apastil Nani Sturka 11:22–28:31 wina sakan sa.)