IJKUAK opeuj kichiua ken Cristo, Pablo opeuj tenojnotsa ika miyek paktli itech iTekiuajyo toTajtsin. San ika, aman yejua akin kixikoskia tlajyouilistli. Yejuin xsiaujkayo itlatitlankauj Cristo melak uejka okistinen niman ijkon ouel otenojnots itech Tekiuajyotl, tlen melauak kichiuas ken toTajtsin kineki manemikan tlaltikpakchanejkej.

Ijkuak kachtopa oyaj okiteijlito kuajli tlajtoltin ipan miyek kalpamej, oyaj Listra niman ompa okipajti se tlakatl akin xueliya nejnemiya. Miyekej tlaltikpakchanejkej akin okitakej Pablo iuan Bernabé, opeujkej kintsajtsiliaj niman okijtokej ika yejuamej tajtsitsintin katkaj. Okichiujkej tlen ouelkej niman ijkon xonokauilijkej makinuentlalilikan. San ika, akin ompa chanejkej okimineltokakej tlen okijtokej akin kitlauelitayaj Pablo niman okitemojmotlakej. Maski yejuamej okinemilijkej omik, Pablo omakis niman xouejkauj oksejpa onokuep ipan yejon ueyikalpan niman okinyolchikauato inomachtijkauan Cristo.

Opanok seki xiujtin, niman sekimej judíos kinchiualtiayaj akin kineltokaya Cristo niman xjudíos katkaj, makitlakamatikan seki Tlanauatiltin tlen okimakakej Moisés. Pampa kinekiya manoyektlali yejuin tlauejli, Pablo oyaj itech itlatitlankauan Cristo niman tlayekankej akin nemiyaj Jerusalén. Ijkuak kuajli yonomachtijkej iTlajtol toTajtsin niman okitlajtlankej espíritu santo, okimintlajkuilouilijkej tlanechikoltin niman okiminauatijkej maka makinueyichiuakan tajtsitsintin niman maka makikuakan yestli nion nakatl tlen xnoyeskixtia niman maka maauilnemikan. Yejuin tlanauatiltin yejua “tlen más polijtikaj”, san ika, yejuin xkijtosneki tla nonekiya makitlakamatikan nochi Tlanauatiltin tlen okimakakej Moisés (Hechos 15:28, 29).

Ijkuak ika okpa oyaj, okiteijlito kuajli tlajtoltin ipan miyek kalpamej, Pablo oyaj Berea, kampa aman onka Grecia. Judíos akin ompa chantiyaj kuajli okiselijkej tlen okimijli, niman nomachtiayaj mojmostla ipan iTlajtol toTajtsin niman kitayaj tla melauak tlen nomachtijtoyaj. Xouejkauj, oksejpa Pablo okincholouilij akin kitlauelitayaj. Oyaj hasta Atenas, kampa otlajto imixpan akin ixtlamatkej niman melak noilnamiki pampa kualtsin otlajto niman nesiya ika tetlakaitaya.

Sakin, ijkuak ika yexpa oyaj okiteijlito kuajli tlajtoltin ipan miyek kalpamej, Pablo oyaj Jerusalén. Ijkuak oyaj teopan, tojlan onosentlalilok niman okinejkej kimiktiskej. San ika, soldados onokalaktijkej niman okuikakej Pablo kampa kiyolkuitiskiaj. Pampa yejua chanej Roma, okikauilijkej matlajto itech tlanauatijketl Félix. Judíos xkeman ouelkej okiteititijkej ika melauak tlen ika kitlajtlakoltijtoyaj. Maski ijkon, Festo —akin okitekipatlak Félix— kinekiya kiminmaktilis Judíos. Ika Pablo xkinekiya ijkon mapano, okitlajtlan yas itech César, kuakon tlanauatijketl okinankili: “Itech César tias” (Hechos 25:11, 12).

Pablo kiyolkuitiskiaj Roma. Kuakon otlejkok ipan se barco tlen kuikaskia Italia, san ika, ajakatl melak chikauak okitlauitek barco, pampa oxoxoton onokauato kampa tlaluaktli ipan iatlajkotian Malta, ijkuak melak seua katka. Ijkuak oajsik Roma, onen ome xiuitl ipan se kajli tlen san kitlaneujtiayaj. Maski ompa kitlajpiayaj soldados, nochipa yolchikaujtoya niman kiminojnotsaya itech Tekiuajyotl nochimej akin kontlajpalouayaj.

(Onokixti itech Hechos 11:22–28:31.)