MI MU̱DI rä Pablo bi de̱ni rä Hesu, ꞌnehe bi mu̱di bi ungä ntꞌo̱de yä hogä noya de rä Tsꞌu̱tꞌhui Äjuä. Pe nubye̱ rä Pablo go geꞌä bi tꞌo̱ꞌtuäbi yä ntsꞌomꞌu̱i. Rä Pablo himbi zabi bi ñꞌo pa bi mää ge rä Tsꞌu̱tꞌhui Äjuä ma dä me̱fi gatꞌho näꞌä xä mää pa rä mexiꞌmhai.

Näꞌä rä mu̱di rä biahe bi yꞌo̱tꞌe rä Pablo, bi zo̱ni ha Listra ꞌne bi yꞌo̱the nꞌa rä ñꞌo̱ho̱ ngeꞌä dende xki mꞌu̱i himi tsa dä ñꞌo. Kongehnä yä jäꞌi mi mafi ntsꞌe̱di ꞌne mi enä ge rä Bernäbe ꞌne rä Pablo mñä zidada. Yä jäꞌi mi ne dä hyo yä mboꞌni pa dä nsunda rä Pablo ꞌne rä Bernäbe, pe nuꞌu̱ himbi ne njabu̱. Mꞌe̱fa nuꞌu̱ yä nkontra rä Pablo bi xipi yä jäꞌi dä kꞌahni rä Pablo ko yä do. Rä Pablo bi te pe yä jäꞌi bi huyämu̱i ge ya xki du. Mꞌe̱fa bi mengi ha näꞌä rä hnini pa dä nupäbi yä mfeni nuꞌu̱ märꞌa yä de̱ni rä Hesu.

Mꞌe̱fa, rꞌa yä gamfri nuꞌu̱ mñä judio, mi japäbi nuꞌu̱ hingä mñä judio dä me̱fi nuꞌu̱ rꞌa yä Mhända bi tꞌumbi rä Moises. Rä Pablo bä xipi nunä rä xuñha nuꞌu̱ yä apostol ꞌne yä däkꞌei mñä me Jerusalen. Nuyu̱ bi hyandi te mi mängä rä Mäkä Tꞌofo ꞌne bi yꞌapäbi rä mäkä tsꞌe̱di Äjuä pa bi bädi te dä me̱fi ko nunä rä xuñha mi ja. ꞌNepu̱ bi yꞌopäbi nuꞌu̱ yä mhuntsꞌi habu̱ bi xipäbi ge hindä xo̱kämbeni nuꞌu̱ yä zidada hingä mäjuäni, hindä ñhuxhui nꞌa rä ꞌme̱hñä mu̱ hixki nthätui, hindä zi yä ji ꞌne hindä zipäbi yä ngo̱ nuꞌu̱ yä mboꞌni hixki po̱mbäbi yä ji. Rä Pablo bi ꞌñenä: «yꞌo̱thu̱ nuꞌä [yä mhända] xi mähyoni», pe himbi tꞌembi dä me̱fi gatꞌho nuꞌu̱ yä Mhända bi tꞌumbi rä Moises (Hechos 15:28, 29).

Näꞌä rä yoho rä biahe bi yꞌo̱tꞌe rä Pablo, bi zo̱ni ha Berea, nꞌa rä tꞌu̱kä hnini mi ja ha Gresia. Nuꞌu̱ yä judio mi ꞌmu̱hni bi yꞌo̱de xä ñho rä Noya Äjuä, nzäntho mi handi te mi mängä rä Mäkä Tꞌofo pa dä bädi mu̱ näꞌä mi sipäbi mi geꞌä o hinä. Mꞌe̱fa, rä Pablo bi ꞌmatꞌi de nuꞌu̱ yä nkontra. Bi ma ha Atenäs habu̱ bä ñäui rꞌa yä jäꞌi mñä bämhñä de gehni. Ko rä tꞌekꞌei, rä Pablo bi ñä xä ñho ꞌne bi ungä ntꞌo̱de rä noya Äjuä.

Mꞌe̱fa de näꞌä rä hñuu rä biahe bi yꞌo̱tꞌe rä Pablo de gä misionero, bi ma pa ha Jerusalen. Bi ma ha rä templo pe rꞌa yä tsꞌomꞌu̱i jäꞌi mi ne dä hyo. Pe nuꞌu̱ yä ndaro mñä me Romä bi hyeke ꞌne bi zitsꞌi rä Pablo pa dä tꞌo̱ꞌtuäbi rꞌa yä ntꞌani. Koꞌmu̱ rä Pablo ꞌnehe mrä me Romä, bi za bi thogi ko rä Feli näꞌä rä ndä de gehni. Yä judio himbi za bi ꞌñudi te mä tsꞌoki mi pe̱ꞌtsi rä Pablo. Mäske njabu̱, mi zo̱ho̱ näꞌä rä rꞌayꞌo ndä mrä thuhu rä Festo, mi ꞌne dä hyopi nuꞌu̱ yä judio dä zitsꞌi rä Pablo. Pe rä Pablo himbi ne, bi yꞌadi dä thogi ko mänꞌa rä dängä ndä mrä thuhu rä Sesar. Hänge näꞌä rä Festo bi ꞌñembäbi rä Pablo: «Ma gi ma pa gehni [ko rä Sesar]» (Hechos 25:11, 12).

Rä Pablo bi tꞌembi ge näꞌä rä nthanthiä dri nja ha Romä. Hänge rä Pablo bi tꞌe̱ntꞌä ha nꞌa rä barko ꞌne bi ma ha Italia, pe mä ꞌñuu bi nja nꞌa rä dängä bu̱nthi ꞌne näꞌä rä barko bi mfantꞌui rꞌa yä do, hänge bi tso̱ni ha nꞌa rä xe̱kä hai mi o ha rä ndehe mrä thuhu Mälta. Ja bi gohini asta xa bi thogi nuꞌu̱ yä tse̱. Mi tso̱ni ha Romä, bi mhipi nꞌa rä nguu habu̱ bi mꞌu̱i yo nje̱ya. Nzäntho mri su rä Pablo, pe mäske njabu̱, ko nꞌa rä johya mi umbäbi ntꞌo̱de rä noya Äjuä gatꞌho nuꞌu̱ yä zo̱nte.

(Ehe ha rä Hechos 11:22–28:31.)