PABLO cristianoña kaspanmi, kusikuyllawanña predicayta qallarirqa. Kunanmi ichaqa payña llumpay qatikachasqa kanan karqa. Kay mana pisipaq hina apostolmi karu-karuta illarqa Diospa gobiernonmanta willakunanpaq.

Punta illasqanpim Listra llaqtaman rirqa, chaypim suchu runata sanoyachirqa. Chayta qawaq runakunam qayaykachakuyta qallarirqaku Pablowan Bernabey dioskuna kasqankuta. Ñakayllatañam paykunaman sacrificio ruranankuta saqechirqaku. Ichaqa Pablota cheqniq runakunata qatikuspankum chay runakunaqa rumiwan choqaparurqaku. Wañurusqanta piensaptinkupas, Pabloqa hatariruspanmi kaqlla chay llaqtaman kutirqa iñiqmasinkunata kallpanchananpaq.

Wakin judio cristianokunam nirqaku, Moisespa chaskisqan Leyta mana judio cristianokuna kasukunankupaq. Chayta allichananpaqmi, Pabloqa rirqa Jerusalenpi kaq apostolkunamanwan ancianokunaman. Paykunam Diosta mañakuspanku hinaspa Palabranta allinta estudiaspanku, congregacionkunaman qellqarqaku taytacha-mamachakunata qepanchanankupaq, yawarniyoq aychatawan yawarta mana mikunankupaq chaynataq mana huchapakunankupaqpas. Chay kamachikuykunaqa allinpunim karqa, ichaqa manañam Moisespa chaskisqan Leytaqa qatinankuñachu karqa (Hechos 15:28, 29).

Iskay kaq illasqanpim, Pabloqa Grecia lawpi Berea llaqtaman rirqa. Chaypi judiokunaqa chaskikurqakum willakusqantaqa, paykunaqa Diospa Palabrantam sapa punchaw estudiaqku allinta entiendenankupaq. Pisi tiempollamantam Pabloqa enemigonkunamanta lluptikunan karqa. Atenas lawkamam illarqa, chaypim yachayniyoq runakunapa qayllanpi allintapuni respetowan yachachirqa.

Kimsa kaq illasqanmanta pasaytam, Pabloqa Jerusalenman rirqa. Temploman riptinmi runakunaqa wañurachiyta munarqaku. Romamanta tropakuna Pablota harkaykuspankum tapunankupaq aparurqaku. Roma llaqtayoq kasqanraykum saqerqaku kamachiq Felixman rinanpaq. Judiokunaqa manam Pablopa contranpi rimasqanku cheqap kasqantaqa qawachiyta atirqakuchu. Chaywanpas, Felixpa rantinpiña kamachiq Festopas runakunamanmi qoykuyta munarqa. Chaymi Pabloqa Cesar juzgananpaq mañakurqa, Festoñataqmi nirqa: “Chaynaqa Cesarmanmi rinki”, nispa (Hechos 25:11, 12).

Chay juicioqa Romapim apakunan karqa. Chaymi Pabloqa Italiaman buquepi illarqa, ichaqa chay risqan buquem yakupi chinkaykurqa, hinaptinmi para tiempo kasqanrayku Malta sutiyoq islapi qeparqa. Romaman chayaruspanmi arriendasqa wasipi iskay wata yacharqa. Wasinpi presochasqa kaptinpas, kusikuyninqa manam chinkarqachu, hinallamá lliw watukuqninkunaman predicarqa.

(Hechos 11:22–28:31.)